អង្គការសុខភាពពិភពលោកស្វាគមន៍កំណើននៃការពិគ្រោះនិងព្យាបាលជំងឺរបេង
របេងជាមូលហេតុទីពីរនៃមរណភាពនៅលើពិភពលោក។ ប៉ុន្តែដោយសារកំណើនផ្នែកធ្វើរោគវិនិច្ឆ័យនិងការព្យាបាល អត្រាមរណៈដោយជំងឺរបេងបានធ្លាក់ចុះគួរឱ្យកត់សម្គាល់នៅឆ្នាំ២០២២។ នេះបើតាមសេចក្តីប្រកាសរបស់អង្គការសុខភាពពិភពលោក។
ចុះផ្សាយនៅថ្ងៃ៖
ស្តាប់ - ០២:៥៩
នៅក្នុងរបាយការណ៍ថ្មី អង្គការសុខភាពពិភពលោកបានរំលឹកថាផលរំខានបង្កឡើងដោយវិបត្តិកូវីដ១៩បានធ្វើឱ្យអត្រាមរណភាពដោយជំងឺរបេងកើនឡើងនៅឆ្នាំ២០២០និង២០២១ ដោយបង្កឱ្យមានអ្នកស្លាប់ឡើងបន្ថែមជិតកន្លះលាននាក់។
ប៉ុន្តែនិន្នាការចាប់ប្តូរផ្លាស់ ការវិនិច្ឆ័យរោគ និងការព្យាបាលជំងឺរបេង ចាប់សកម្មនិងមានកំណើនឡើងវិញ នៅឆ្នាំ២០២២កន្លងទៅ ដែលជាហេតុធ្វើឱ្យមានការបាត់បង់ជីវិតតិចជាងមុន គឺតែប្រមាណ១,៣លាននាក់នៅឆ្នាំទល់នឹង១,៤លាននាក់កាលពីឆ្នាំ២០២០និង២០២១។ របាយការណ៍ដដែលបានលម្អិតទៀតថា ក្នុងឆ្នាំ២០២២ មានអ្នកជំងឺប្រមាណ៧លាន៥សែនបានចូលមកធ្វើរោគវិនិច្ឆ័យជំងឺរបេង ពោលគឺច្រើនជាងកាលពីឆ្នាំ២០២១ចំនួន១៦%និងដល់ទៅ២៨%បើប្រៀបទៅនឹងឆ្នាំ២០២០។ សម្រាប់អង្គការសុខភាពពិភពលោក នេះជាកំណើនដ៏ខ្ពស់បំផុតមិនធ្លាប់មានទេគិតចាប់តាំងពីស្ថាប័នអង្គការសហប្រជាជាតិចាប់ផ្តើមតាមដានជំងឺនេះនៅឆ្នាំ១៩៩០មក។
អាចព្យាបាលជាសះស្បើយ និងបញ្ចៀសបាន ជំងឺរបេងនៅតែជាមូលហេតុទីពីរនៃមរណភាពដោយជំងឺឆ្លងនៅលើពិភពលោក បន្ទាប់ពីជំងឺកូវីដ១៩ និងសម្លាប់មនុស្សច្រើនជាងជំងឺអេដស៍ឬស៊ីដា ដល់ទៅពីរដង។ បង្កឡើងដោយបាក់តេរីដែលចម្លងចូលតាមផ្លូវដង្ហើម និងវាយលុកជាពិសេសទៅលើសួត របេងនៅតែបន្តចម្លង បង្កឱ្យមានអ្នកឆ្លងថ្មីកើនឡើងជាលំដាប់។ នេះបើតាមកំណត់សម្គាល់របស់អង្គការសុខភាពពិភពលោក ដោយប៉ាន់ប្រមាណថា មានមនុស្សផ្ទុកជំងឺរបេងចំនួនប្រមាណ១០លាន៦សែននាក់នៅក្នុងឆ្នាំ២០២២ ទល់នឹង១០លានបីសែននាក់កាលពីឆ្នាំ២០២១ និងតែ១០លាននាក់កាលពីឆ្នាំ២០២០។
អង្គការសុខភាពពិភពលោកអះអាងថា ករណីឆ្លងថ្មីអាចនឹងចាប់ផ្តើមថយចុះនៅឆ្នាំក្រោយ ឬឆ្នាំក្រោយមួយទៀត។ ចំណែកកំណើនអ្នកឆ្លងថ្មីពេលនេះឆ្លុះឱ្យឃើញថាសេវាសុខាភិបាលចាប់ដំណើរការឡើងវិញនៅក្នុងបណ្តាប្រទេសជាច្រើនបន្ទាប់ពីរអាក់រអួលដោយកូវីដ។ តែកម្មវត្ថុជាយុទ្ធសាស្ត្រប្រកបដោយមហិច្ឆតារបស់អង្គការសុខភាពពិភពលោក ដែលចង់កាត់បន្ថយអត្រាអ្នកឆ្លងថ្មីឱ្យបាន៥០%នៅឆ្នាំ២០២៥ ទំនងជាមិនអាចសម្រេចបានទេព្រោះករណីអ្នកឆ្លងថ្មីបានថយចុះត្រឹម៨,៧%ប៉ុណ្ណោះតាំងពីឆ្នាំ២០១៥មក។ ពីរភាគបីនៃបរិមាណអ្នកជំងឺរបេងសរុបនៅលើពិភពលោកផ្តុំតែលើ៨ប្រទេសប៉ុណ្ណោះគឺ ឥណ្ឌា ឥណ្ឌូណេស៊ី ចិន ហ្វីលីពីន ប៉ាគីស្ថាន នីហ្សេរីយ៉ា បង់ក្លាដែស និងសាធារណរដ្ឋកុងហ្កោ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ