មូលនិធិប្រយុទ្ធប្រឆាំងនឹងស៊ីដា របេង គ្រុនចាញ់ ៖ ការប្រែប្រួលអាកាសធាតុផ្តើមសម្លាប់មនុស្សតាមរយៈជំងឺឆ្លង
ការប្រែប្រួលអាកាសធាតុ បានចាប់ផ្តើមសម្លាប់មនុស្សរួចទៅហើយ តាមរយៈការរីករាលដាលនៃជំងឺឆ្លង។ នេះជាការទាញសញ្ញាអាសន្នរបស់មូលនិធិពិភពលោកប្រយុទ្ធប្រឆាំងនឹងជំងឺស៊ីដា របេង និងគ្រុនចាញ់។ ឆ្នាំ២០២២ ជាសាក្សីបង្ហាញឱ្យឃើញអំពីផលប៉ះពាល់នៃការប្រែប្រួលអាកាសធាតុទៅលើសុខភាព។
ចុះផ្សាយនៅថ្ងៃ៖
ស្តាប់ - ០១:០៤
ដោយហេតុអាកាសធាតុប្រែប្រួល តំបន់មិនធ្លាប់មានជំងឺគ្រុនចាញ់ ស្រាប់តែក្លាយជាតំបន់មានហានិភ័យ។ សីតុណ្ហភាពឡើងកម្តៅ បានធ្វើឱ្យកើតមូស ចម្លងជំងឺ នៅតំបន់ត្រជាក់ នៅតំបន់មានរយៈកម្ពស់ខ្ពស់ ... ។ រហូតមកទល់ពេលនេះ គេសង្កេតឃើញជំងឺគ្រុនចាញ់កើនឡើង អាស្រ័យទៅលើកំណើនព្យុះភ្លៀងត្រូពិក។ ប៉ុន្តែគ្រោះទឹកជំនន់នៅប៉ាគីស្ថាន បានធ្វើឱ្យជំងឺគ្រុនចាញ់រីករាលដាលក្នុងទម្រង់ធំបែបផ្សេងទៀត។ ជាមួយនឹងចរន្តអន្តោប្រវេសន៍ និងបំលាស់ទីគេចពីគ្រោះអាកាសធាតុ ជំងឺរបេងក៏កើនឡើងដែរ។
លោកស្រី ហ្វ្រង់ស័រ វ៉ាន់នី អ្នកទទួលខុសត្រូវផ្នែកទំនាក់ទំនងការបរទេសនៃមូលនិធិពិភពលោកប្រយុទ្ធប្រឆាំងនឹងជំងឺស៊ីដា ៖
"អ្វីដែលជាក់ស្តែងបំផុត គឺការប្តូរផ្លាស់យន្តការនៃការចម្លងជំងឺគ្រុនចាញ់ និងទីតាំងភូមិសាស្ត្រនៃជំងឺគ្រុនចាញ់ ព្រោះសត្វមូស វាអាចកើត អាចរស់បានអាស្រ័យលើអាកាសធាតុ។ ហេតុដូច្នេះហើយបានជាបច្ចុប្បន្ននេះ គេសង្កេតឃើញមានលេចជំងឺគ្រុនចាញ់ នៅតំបន់ដែលពុំធ្លាប់ និងដែលពុំមានការត្រៀមលក្ខណៈប្រឆាំងនឹងជំងឺគ្រុនចាញ់។
ផលប៉ះពាល់ទីពីរ ជាឥទ្ធិពលផ្ទាល់ដែរនោះ គឺកំណើននៃគ្រោះធម្មជាតិកំណាចផ្ទួនៗ មានជាអាទិ៍ទឹកជំនន់ រំខានប្រព័ន្ធសុខភាពខ្លាំងណាស់។ ក្នុងករណីមានភាពរាំងស្ងួត និងការធ្វើបំលាស់ទីវិញ មនុស្សងាយប្រឈមនឹងជំងឺឆ្លង ពពួកជំងឺរបេង។ ក្នុងបរិបទនៃការខ្វះស្បៀងអាហារ ទទួលទានមិនគ្រប់គ្រាន់ ដោយហេតុតែអាកាសធាតុប្រែប្រួលមានភាពរាំងស្ងួតខ្លាំង ផលវិបាករបស់ពួកគេទាំងអស់នោះ គឺមានសុខភាពធ្លាក់ទន់ខ្សោយជាទូទៅ និងងាយប្រឈមនឹងជំងឺស៊ីដា របេង និងជំងឺគ្រុនចាញ់។"
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ