មូលនិធិពិភពលោកស្វែងរកថវិកា១៨ពាន់លានសម្រាប់ប្រយុទ្ធនឹងជំងឺស៊ីដា របេងនិងគ្រុនចាញ់
សន្និសីទលើកទី ៧របស់អង្គការមូលនិធិពិភពលោកប្រយុទ្ធប្រឆាំងនឹងជំងឺស៊ីដា របេង និងគ្រុនចាញ់ ចាប់បើកពីថ្ងៃទី ១៨ដល់ថ្ងៃ២១កញ្ញានៅទីក្រុងញូវយ៉ក។ ដើម្បីឈានទៅសម្រេចកម្មវត្ថុលុបបំបាត់ជំងឺទាំងបី នៅឆ្នាំ២០៣០ អង្គការត្រូវការមូលនិធិចំនួន ១៨ពាន់លានដុល្លារសម្រាប់រយៈពេលបីឆ្នាំខាងមុខ។
ចុះផ្សាយនៅថ្ងៃ៖
ស្តាប់ - ០១:៤៦
ពុំសូវល្បីឈ្មោះដូចស្ថាប័នផ្សេងទៀតរបស់អង្គការសហប្រជាជាតិ មូលនិធិពិភពលោកប្រឆាំងនឹងជំងឺស៊ីដា របេង និងគ្រុនចាញ់ ដើរតួសំខាន់ខ្លាំងណាស់ក្នុងការប្រយុទ្ធប្រឆាំងនឹងជំងឺទាំងបីនេះ។ គេប៉ាន់ប្រមាណថា ក្នុងរយៈពេល២០ឆ្នាំកន្លងមកនេះ កម្មវិធីរបស់មូលនិធិបានសង្គ្រោះជីវិតមនុស្សបាន៥០លាននាក់។
ដើម្បីអាចសម្រេចកម្មវត្ថុ និងបន្តសង្គ្រោះជីវិតមនុស្ស មូលនិធិពិភពលោកត្រូវបន្តស្វះស្វែងរកថវិកាមកបំពេញហិបរបស់មូលនិធិ ជារៀងរាល់បីឆ្នាំម្តង តាមរយៈការរៀបចំសន្និសីទទ្រង់ទ្រាយធំប្រមូលផ្តុំរដ្ឋ ប្រទេសនៅទូទាំងពិភពលោក ឱ្យជួយបង់វិភាគទាន។ នៅក្នុងសន្និសីទប្រមូលប្រាក់វិភាគទាន កាលពីលើកមុន (ឆ្នាំ២០១៩) មូលនិធិពិភពលោកបានទទួលថវិកាចំនួន ១៤ពាន់លានដុល្លារ ពោលគឺជាចំនួនទឹកប្រាក់ដ៏ច្រើនសន្ធឹកសន្ធាប់ ដែលអង្គការសុខភាព របស់ពិភពលោក ណាធ្លាប់បានទទួលច្រើនដូចទេ។ នេះបើតាមនាយិកាទំនាក់ទំនងសាធារណៈរបស់អង្គការមូលនិធិពិភពលោក អ្នកស្រី Françoise Vanni។
នៅឆ្នាំនេះ មូលនិធិពិភពលោកមានកម្មវត្ថុចង់ស្វះស្វែងប្រមូលថវិកា ឱ្យបានកាន់តែច្រើនជាងមុន។ អង្គការត្រូវការហិរញ្ញវត្ថុយ៉ាងហោច១៨ពាន់លានដុល្លារ សម្រាប់រយៈពេលបីឆ្នាំខាងមុខ ដើម្បីបន្តសកម្មភាពទ្រទ្រង់សុខភាពនៅតាមបណ្តាប្រទេសមានចំណូលទាប និងមធ្យម ដែល ប្រឈមនឹងជំងឺស៊ីដា របេង និងគ្រុនចាញ់ ជាងគេ។
អ្នកស្រី Françoise Vanni ៖
“សន្និសីទរបស់យើងលើកនេះ មានកម្មវត្ថុប្រមូលថវិកាឱ្យបានយ៉ាងហោច១៨ពាន់លានដុល្លារ។ ហេតុអ្វី១៨ពាន់លានដុល្លារ ? ១៨ពាន់លាន គឺច្រើនជាងគម្រោង១៤ពាន់លានកាលពីបីឆ្នាំមុន ឆ្ងាយណាស់។ ប៉ុន្តែគួរឱ្យសោកស្តាយ នេះគឺបណ្តាលមកពីវិបត្តិកូវីដ១៩។ វិបត្តិកូវីដ១៩ បានធ្វើឱ្យការប្រយុទ្ធប្រឆាំងនឹងជំងឺស៊ីដា របេង និងគ្រុនចាញ់ ធ្លាក់ចុះ។ ពីរឆ្នាំកន្លងមកនេះ សកម្មភាពប្រយុទ្ធប្រឆាំងនឹងជំងឺទាំងបីបានដើរថយក្រោយ។ នៅឆ្នាំ២០២១ សកម្មភាពប្រយុទ្ធប្រឆាំងនឹងស៊ីដា របេង និងគ្រុនចាញ់ បានស្ទុះឡើងវិញ។ របាយការណ៍ពិភពលោកបានបង្ហាញថា ប្រទេសបានទទួលជំនួយថវិកាពីមូលនិធិពិភពលោក បានចាប់ផ្តើមសកម្មភាពឡើងវិញ ស្តារពេលវេលាបាត់បង់ទៅ។ ប៉ុន្តែស្តារអ្វីដែលបាត់បង់មិនគ្រប់គ្រាន់ទេ ព្រោះកាលពីឆ្នាំ២០២០ ពេលកំពុងពេញវិបត្តិកូវីដ១៩ យើងបាត់បង់សកម្មភាពខ្លាំងណាស់ ដែលចាំបាច់ត្រូវពន្លឿនសកម្មភាពមែនទែននៅពេលនេះ ទើបត្រូវការថវិកាច្រើនខ្លាំងនោះ។
កម្មវត្ថុបិទបញ្ចប់ការចម្លងជំងឺស៊ីដា របេងនិងគ្រុនចាញ់ នៅឆ្នាំ២០៣០ កាន់តែខិតជិតមកដល់ហើយ ដោយនៅសល់តែ៨ឆ្នាំ ទៀតទេ។ ដូច្នេះ ដើម្បីសម្រេចទិសដៅដែលកំណត់ហើយនិងពិសេសជួយសង្គ្រោះជីវិតមនុស្ស យើងត្រូវតែមានថវិកាច្រើនជាងមុន។ យើងត្រូវតែពន្លឿនសកម្មភាព សងអ្វីមិនបានបាត់បង់នៅពេលមានវិបត្តិកូវីដ និងដើម្បីបិទបញ្ចប់នៅឆ្នាំ២០៣០ ការរីករាលដាលនៃជំងឺទាំងបី៕"
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ