អង់គ្លេសអ៊ុយក្រែនចុះកិច្ចព្រមព្រៀងសន្តិសុខទ្វេភាគីជាប្រវត្តិសាស្ត្រ
ក្នុងពេលដែលប្រមុខការទូតបារាំងថ្មីបានជ្រើសរើសធ្វើដំណើរទៅអ៊ុយក្រែន នៅថ្ងៃសៅរ៍ទី ១៣មករា ជាទិសដៅទស្សនកិច្ចដំបូងគេ ប្រមុខរដ្ឋាភិបាលអង់គ្លេសក៏បានអញ្ជើញទៅក្រុងកៀវដែរ ដោយគ្មានប្រាប់ដំណឹងជាមុនទេ។ ហើយនាយករដ្ឋមន្ត្រីអង់គ្លេសមិនទៅដៃទទេឡើយ។ ក្នុងពេលបំពេញទស្សនកិច្ចនៅក្រុងគៀវ លោក រីស្ហ៊ី ស៊ូណាក់ បានប្រកាសថាឡុងដ៍នឹងផ្គត់ផ្គង់អ៊ុយក្រែននូវជំនួយជិតបីពាន់លានអឺរ៉ូ សម្រាប់រយៈពេលពីរឆ្នាំខាងមុខ។ ក្រៅអំពីជំនួយផ្នែកយោធា អង់គ្លេសនឹងចុះកិច្ចសហប្រតិបត្តិការក្នុងវិស័យសន្តិសុខជាមួយអ៊ុយក្រែនទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៣
នៅក្នុងដំណើរទស្សនកិច្ចដោយឥតព្រាងទុកទៅកាន់ក្រុងកៀវ លោកនាយករដ្ឋមន្ត្រីអង់គ្លេសមិនត្រឹមតែសន្យាបង្កើនជំនួយយោធា ជិតបីពាន់លានអឺរ៉ូ សម្រាប់រយៈពេលពីរឆ្នាំខាងមុខដល់អ៊ុយក្រែនទេ តែថែមទាំងប្រកាសចុះហត្ថលេខាលើកិច្ចព្រមព្រៀងទ្វេភាគីស្តីអំពីកិច្ចសហប្រតិបត្តិការទ្វេភាគីក្នុងវិស័យសន្តិសុខរវាងកៀវនិងឡុងដ៍ទៀត។ “ជាកិច្ចព្រមព្រៀងដែលមានលក្ខណៈប្រវត្តិសាស្ត្រ”។ នេះបើតាមប្រសាសន៍របស់លោកប្រធានាធិបតី ហ្សេឡេនស្គី។
នេះជាលើកទីមួយហើយដែលមានប្រទេសមួយព្រមចុះកិច្ចព្រមព្រៀងជាមួយអ៊ុយក្រែន ដើម្បីជួយគ្នាផ្នែកសន្តិសុខដូច្នេះ។ បើតាមខ្លឹមសារនៃកិច្ចព្រមព្រៀង នៅពេលណាអ៊ុយក្រែនរងការបំពារបំពានពីអ្នកខាងក្រៅ ឬស្ថានភាពនៅអ៊ុយក្រែនបច្ចុប្បន្នស្រាប់តែធ្លាក់ចុះធ្ងន់ធ្ងរខ្លាំង អង់គ្លេសសន្យានឹងផ្តល់ការសម្របសម្រួលបន្ទាន់ ក្នុងរយៈពេលតែ២៤ម៉ោង។ ជាចម្លើយតបតភ្លាម ដែលអាចជាបញ្ជូនសម្ភារៈបរិក្ខារយោធាភ្លាម និងជាស្វ័យប្រវត្តិទៅឱ្យអ៊ុយក្រែន ដោយមិនចាំបាច់សុំ។
នៅចំពោះមុខសភាអ៊ុយក្រែន ដោយមានលើកទង់ជាតិអង់គ្លេស លោកនាយករដ្ឋមន្ត្រីអង់គ្លេសស៊ូណាក់បាន អះអាងថា កិច្ចសហប្រតិបត្តិការនេះនឹងនាំមកនូវសន្តិសុខ អាវុធប្រឆាំងរថក្រោះ មីស៊ីល និងគ្រាប់កាំភ្លើងធំ ព្រមទាំងការបំពាក់បំប៉ននាយទាហានអ៊ុយក្រែនរាប់ពាន់នាក់ទៀត។ ប៉ុន្តែសម្រាប់រុស្ស៊ី ប្រសិនបើអង់គ្លេសហ៊ានដាក់ទ័ពនៅអ៊ុយក្រែន នោះមានន័យស្មើនឹងប្រកាសសង្គ្រាមរវាងឡុងដ៍និងម៉ូស្គូហើយ។
ក្រៅអំពីជំនួយដ៏គួរឱ្យសម្គាល់របស់អង់គ្លេស រដ្ឋមន្ត្រីការបរទេសបារាំង ដែលទើបចូលកាន់តំណែងនៅល្ងាចថ្ងៃព្រហស្បតិ៍ ក៏បានជ្រើសរើសធ្វើដំណើរទៅក្រុងកៀវភ្លាមដែរនៅថ្ងៃសៅរ៍ទី ១៣មករានេះ។ នេះសបញ្ជាក់ឱ្យឃើញថាអ៊ុយក្រែនជានិងបន្តជាអាទិភាពរបស់បារាំងជានិច្ចបើទោះបីកំពុងប្រឈមនឹងវិបត្តិដ៏ច្រើនក៏ដោយ។ នៅក្នុងសន្និសីទកាសែតជាមួយសមភាគីអ៊ុយក្រែន លោកប្រមុខការទូតបារាំង បានអះអាងបារាំងនិងអឺរ៉ុបបន្តគាំទ្រដោយឥតងាករេ និងគ្មានប្រែប្រួល មិនដូចការគិតរបស់រុស្ស៊ីទេ។ បារាំងបានសន្យាទៀតថានឹងប្រើគ្រប់ឥទ្ធិពលដែលមានក្នុងការជួយជ្រោមជ្រែងឱ្យអ៊ុយក្រែនបានទទួលកញ្ចប់ជំនួយ៥០ពាន់លាន ដែលជាប់គាំងដោយសារវេតូរបស់ហុងគ្រី។
រដ្ឋមន្ត្រីការបរទេសអ៊ុយក្រែនបានបញ្ជាក់ថាកំពុងចរចាឈានឆ្ពោះទៅរកកិច្ចសហប្រតិបត្តិការទ្វេភាគីបារាំងអ៊ុយក្រែន បន្ទាប់មកអ៊ុយក្រែនអឺរ៉ុប ដើម្បីបង្កើនសមត្ថភាពយោធាលើដីអ៊ុយក្រែន។
សូមបញ្ជាក់ថា តាំងពីផ្ទុះសង្គ្រាមរុស្ស៊ីចូលឈ្លានពានអ៊ុយក្រែនមក បារាំងបានផ្តល់ការគាំទ្រដល់ក្រុងកៀវទាំងផ្នែកនយោបាយនិងយោធា តែមិនគ្រប់គ្រាន់ បើតាមការរិះគន់ខ្លះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ