សង្គ្រាមអ៊ុយក្រែន៖ ន័រវែសប្រកាសដំឡើងថវិកាយោធាស្ទើរទ្វេដងសម្រាប់១២ឆ្នាំខាងមុខ
ប្រឈមនឹងសង្គ្រាមរុស្ស៊ីនៅអ៊ុយក្រែនដែលរុញច្រានស្ថានភាពសន្តិសុខកាន់តែអាក្រក់ទៅៗ ជាលំដាប់ នាយករដ្ឋមន្ត្រីន័រវែស បានប្រកាសគម្រោងដំឡើងកញ្ចប់ថវិកាយោធា ស្ទើរមួយពីរ ពីពេលនេះដល់ឆ្នាំ២០៣៦។ បណ្តាសមាជិកអូតង់មួយចំនួនផ្សេងទៀត គ្រោងនឹងដំឡើងថវិកាយោធារបស់ខ្លួនដែរឱ្យបានដល់៣%នៃផលិតផលសរុបក្នុងស្រុកផង។
ចុះផ្សាយនៅថ្ងៃ៖
ស្តាប់ - ០២:២៧
ពីលើនាវាចម្បាំង លោកនាយករដ្ឋមន្ត្រីន័រវែស Jonas Gahr Støre បានបង្ហាញសៀវភៅស ស្តីពីផែនការការពារជាតិ ដោយអះអាងថា “ពង្រឹងវិស័យការពារជាតិន័រវែសឱ្យឡើងខ្លាំង នឹងធ្វើឱ្យអ្នកចង់គំរាមកំហែងសន្តិសុខយើងនិងសម្ព័ន្ធមិត្ត ខ្លាច”។ ន័រវែសសន្មត់និងសំលឹងឃើញថា ប្រទេសត្រូវប្រឈមនឹងអ្នកជិតខាងម្នាក់ដ៏គ្រោះថ្នាក់និងពិបាកស្មានបំផុត សម្រាប់រយៈពេលជាយូរឆ្នាំទៀត។ នេះបើតាមប្រសាសន៍បន្ថែមរបស់លោកប្រមុខរដ្ឋាភិបាល ដោយចុចចំឈ្មោះរុស្ស៊ីតែម្តង។
ដោយហេតុតែស្ថានភាពសន្តិសុខអាចធ្លាក់ចុះដុនដាបជានិរន្តរ៍ដូច្នេះ រដ្ឋាភិបាលន័រវែសបានប្រកាសស្នើ ដំឡើងចំណាយថវិកាការពារជាតិចំនួន ៥២ពាន់លានអឺរ៉ូបន្ថែមទៀត សម្រាប់ធ្វើទំនើបកម្មកងទ័ពន័រវែសពីឆ្នាំ២០២៤ ដល់ឆ្នាំ២០៣៦។
ដើម្បីសម្រេចកម្មវត្ថុនេះ ន័រវែសដែលជាសមាជិកអូតង់ និងដែលមានព្រំដែនជើងគោកជាប់រុស្ស៊ីប្រមាណ១៩៨គីឡូម៉ែត្រនិងព្រំដែនទឹកក្នុងសមុទ្ទខាងជើងBarents ដ៏ល្ហហ្ហេវនោះ នឹងបញ្ជាទិញនាវាចម្បាំង៥គ្រឿងថ្មីបន្ថែមទៀត នាវាមុជទឹកមួយគ្រឿងទៀតជាគម្រប់ទី៥ នាវាយោធាតូចធំគ្រប់ធុន២៨គ្រឿង ឧទ្ធម្ភាគចក្រ ដ្រូនសង្កេតការណ៍លើផ្ទៃសមុទ្ទ និងពិសេសមីស៊ីលការពារអាកាសក្នុងបរិមាណដ៏សន្ធឹកសន្ធាប់ ព្រមទាំងមធ្យោបាយប្រយុទ្ធជាច្រើនផ្សេងទៀត។ នេះបើតាមខ្លឹមសារលម្អិតចែងក្នុងសៀវភៅស។
តាមរយៈទំនើបកម្មនេះ កំណើនកញ្ចប់ថវិកាយោធាន័រវេស ត្រូវប៉ោងឡើងធំដល់ទៅ៨៣%។ ជាកិច្ចខិតខំប្រឹងប្រែងផ្នែកថវិកាជាប្រវត្តិសាស្ត្រដែលនឹងបំពេញមហិច្ឆតាពីរធំទៀតគឺ បង្កើនចំនួនកងពលយោធាថ្មើរជើង ពីមួយកងពល ទៅបីកងពល និង ពង្រឹងមូលដ្ឋានទ័ពអាកាសនៅតំបន់វាលខាងជើងដ៏ធំធេង Andoya ត្រង់កន្លែងដែលន័រវែសនិងរុស្ស៊ីមានព្រំដីជាប់គ្នា។
នាអនាគតទៅ កញ្ចប់ថវិកាការពារជាតិន័រវែស ត្រូវមានទំហំស្មើនឹង៣%នៃផលិតផលសរុបក្នុងស្រុក មិនមែនត្រឹម២%ដូចកម្មវត្ថុកំណត់ដោយអង្គការសម្ព័ន្ធអាត្លង់ទិក អូតង់ទេ។ ឬអាចនិយាយបានថា ៣%នឹងក្លាយជាកំរិតបទដ្ឋានចំណាយថវិកាយោធាថ្មីដែលសមាជិកអូតង់មួយចំនួនចង់បាន។ ប៉ូឡូញ ប្រទេសជាប់របងអ៊ុយក្រែនផ្ទាល់ ធ្លាប់បានទទូចចង់ឱ្យអូតង់ដំឡើងកញ្ចប់ចំណាយយោធាដូច្នេះ តាំងពីជាច្រើសប្តាហ៍មកហើយ ដោយរំលឹកថា រុស្ស៊ី បានធ្វើសង្គ្រាមបំប៉នសេដ្ឋកិច្ច និងបន្តឈ្លានពានលើទឹកដីអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ