ទាហានអ៊ុយក្រែនជាង១០០នាក់ស្ថិតក្នុងការឡោមព័ទ្ធរបស់ពួកឧទ្ទាមស្និទ្ធរុស្ស៊ី
បទឈប់បាញ់នៅតែផុយស្រួយនៅប្រទេសអ៊ុយក្រែន ភាគខាងកើត។ ចំណុចក្តៅថ្មីមួយនៃជម្លោះ ក្នុងតំបន់លូហ្គង់ស្គ៍ (Lougansk) គឺថា ទាហានអ៊ុយក្រែនប្រហែល១០០នាក់ បានជាប់ក្នុងការឡោមព័ទ្ធរបស់ពួកឧទ្ទាមបំបែកទឹកដី។ អាជ្ញាធរអ៊ុយក្រែនកំពុងតែមានការបារម្ភយ៉ាងខ្លាំង អំពីជោគវាសនារបស់ពួកគេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៦
ស្ថានភាពមិនទាន់ច្បាស់លាស់នៅឡើយទេ ត្បិតការប្លោងគ្រាប់កាំភ្លើងធំ រារាំងអ្នកសង្កេតការណ៍ មិនឱ្យខិតទៅជិតតំបន់នោះ ដើម្បីវាយតម្លៃទំហំខូចខាត។ បើតាមអាជ្ញាធរអ៊ុយក្រែន យុទ្ធជនឧទ្ទាម បានវាយលុកទៅលើទីតាំងសម្រាប់ត្រួតពិនិត្យរបស់កម្លាំងរដ្ឋាភិបាល ដែលស្ថិតតាមបណ្ដោយផ្លូវពីលូហ្គង់ស្គ៍ (Lougansk) ឆ្ពោះទៅភាគខាងលិច ពោលគឺឆ្ពោះទៅព្រំដែនរវាងតំបន់ពួកបះបោរ និងតំបន់កងទ័ពរដ្ឋាភិបាល។ ពួកឧទ្ទាមទំនងជាមានរថក្រោះប្រហែល២០គ្រឿង និងរថពាសដែកច្រើនគ្រឿងទៀត។
អភិបាលតំបន់លូហ្គង់ស្គឹះ ដែលរដ្ឋាភិបាលទីក្រុងកៀវ (Kiev) ចាត់ឱ្យទៅត្រួតទីតាំងទាំងនោះ វាយតម្លៃស្ថានការណ៍ថាធ្ងន់ធ្ងរ។ លោក ហ្គង់ណាឌី ម៉ូស្កាល់ (Guennadi Moskal) ថ្លែងថា ទាហានបានក្លាយជាអ្នកជាប់ឃុំ។ កាលពីថ្ងៃអង្គារ យ៉ាងហោចណាស់យោធាម្នាក់បានស្លាប់ ក្នុងការឡោមព័ទ្ធនោះ។
ដោយឡែក បញ្ជាការដ្ឋានយោធាអ៊ុយក្រែនប៉ាន់ថា ទាហានទាំងនោះមិនទាន់ត្រូវបានឡោមព័ទ្ធទាំងស្រុងនៅឡើយទេ ហើយគេនៅអាចទៅជួយបានថែមទៀតផង។ គេពិពណ៌នាស្ថានភាពថាពិបាក ប៉ុន្តែអាចគ្រប់គ្រងបាន។
គ្រប់គ្នាមិនទាន់ភ្លេចសមរភូមិនៅអ៊ីឡូវ៉ាអ៊ីស្គ៍ (Ilovaïsk)ទេ។ កាលពីខែសីហាកន្លងទៅ នៅទីតាំងដែលស្ថិតនៅក្បែរតំបន់លូហ្គងស្គឹះនេះ កងកម្លាំងអ៊ុយក្រែនបានជាប់អន្ទាក់ និងត្រូវឡោមព័ទ្ធដោយពួកគាំទ្ររុស្ស៊ី៖ កាលណោះ ទាហានច្រើនជាង១០០នាក់បានពលីជីវិត។ ដើម្បីបញ្ចៀសដំណើរដូចគ្នានេះកុំឱ្យកើតទៀត មន្ត្រីអង្គការដើម្បីសន្តិសុខ និងសហប្រតិបត្តិការនៅទ្វីបអឺរ៉ុប ហៅកាត់ថា OSCE បានបោះដៃទៅរកអាជ្ញាធរក្នុងតំបន់ ដែលប្រកាសខ្លួនឯងថា ជាសាធារណរដ្ឋលូហ្គង់ស្គឹះ ប៉ុន្តែឥតបានការទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ