ប្រធានាធិបតីអ៊ុយក្រែននឹងជួបប្រធានាធិបតីរុស្ស៊ីនៅប្រទេសអ៊ីតាលី
ប្រធានាធិបតីអ៊ុយក្រែន លោកពេត្រូ ប៉ូរ៉ូឆិនកូ បានប្រកាសនៅថ្ងៃសៅរ៍ទី ១១ តុលាថា លោកនឹងជួប ប្រមុខដឹកនាំរុស្ស៊ី លោកវ្លាឌីមៀរ ពូទីន នៅថ្ងៃសុក្រសប្តាហ៍ក្រោយ នៅក្នុងឱកាសជំនួបកំពូលអាស៊ី អ៊ឺរ៉ុបដែលត្រូវរៀបចំនៅទីក្រុងមីឡង់ ប្រទេសអ៊ីតាលី។ តាមលោកប្រធានាធិបតី អ៊ុយក្រែន ជំនួបរបស់លោក ជាមួយលោកពូទីន នៅក្រៅកិច្ចប្រជុំកំពូលអឺរ៉ុប អាស៊ីនឹងផ្តោតសំខាន់ទៅលើដំណើរស្វែងរកសន្តិភាពនៅតំបន់ភាគខាងកើតអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
នៅក្នុងដំណើរទស្សនកិច្ចទៅទីក្រុងខាគៀវ នៃភាគខាងកើតប្រទេស ដែលស្ថិតនៅមិនឆ្ងាយប៉ុន្មានពីតំបន់គ្រប់គ្រងដោយក្រុមឧទ្ទាម និយមរុស្ស៊ី លោកប្រធានាធិបតីអ៊ុយក្រែនបានលើកឡើងពីសុទិដ្ឋិនិយមរបស់លោក នៅក្នុងជំនួបជាមួយលោកពូទីន ប្រធានាធិបតីរុស្ស៊ី នៅថ្ងៃសុក្រសប្តាហ៍ក្រោយ។ ប៉ុន្តែ លោកទទួលស្គាល់ថា ការចរចាទាំងឡាយជាមួយលោកពូទីននឹងមិនប្រព្រឹត្តទៅដោយស្រួលៗឡើយ។
តាមលោកប្រធានាធិបតីអ៊ុយក្រែន នាយករដ្ឋមន្រ្តី អង់គ្លេស អ៊ីតាលី និងអាល្លឺម៉ង់នឹងចូលរួមក្នុងជំនួបរវាងលោក និងលោកពូទីន ក្នុងទីក្រុងមីឡង់។
ជំនួបជាថ្មីរវាងប្រមុខដឹកនាំអ៊ុយក្រែន និងរុស្ស៊ីអាចចេញជារូបរាង បន្ទាប់ពីប្រមុខដឹកនាំប្រទេសទាំងពីរត្រូវបានលើកទឹកចិត្តឲ្យជួបគ្នា នៅក្នុងពិធីបុណ្យជាតិបារាំង កាលពីខែមិថុនា។ បន្ទាប់មក លោកប៉ូរ៉ូឆិនកូបានជួប ជាមួយប្រធានាធិបតីរុស្ស៊ីជាលើកទីមួយ ជាផ្លូវការ នៅក្នុងកិច្ចប្រជុំក្នុងប្រទេសបេឡូរុស្ស៊ី នៅថ្ងៃទី ៥កញ្ញា ដែលនៅទីនោះ លោកពូទីន និងលោកប៉ូរ៉ូឆិនកូបានចុះហត្ថលេខាលើកិច្ចព្រមព្រៀង ជំរុញឲ្យមានបទឈប់បាញ់នៅតំបន់ភាគខាងកើតអ៊ុយក្រែន។
តាមអង្គការសហប្រជាជាតិ បទឈប់បាញ់នៅទីក្រុងMinksបានកាត់បន្ថយជម្លោះប្រដាប់អាវុធនៅអ៊ុយក្រែន ដែលបានសម្លាប់មនុស្សជាង ៣ពាន់ ៦រយនាក់ នៅក្នុងរយៈពេល៦ខែចុងក្រោយនេះ។ ប្រទេសលោកខាងលិច ជាពិសេស អាមេរិក និងទីក្រុងគៀវ បានចោទរុស្ស៊ីថា ជាអ្នកគាំទ្រ ផ្គង់ផ្គង់អាវុធដល់ក្រុមឧទ្ទាម បំបែកទឹកដីនៅភាគខាងកើតអ៊ុយក្រែន។ ប៉ុន្តែ ទាំងទីក្រុងម៉ូស្គូ និងក្រុមបំបែកទឹកដីអ៊ុយក្រែន បានចោទរដ្ឋាភិបាលអ៊ុយក្រែនថា បានវាយប្រហារទៅលើភូមិ និងសម្លាប់ប្រជាជនស៊ីវិល នៅភាគខាងកើតអ៊ុយក្រែន។
តាមអ្នកវិភាគ ជំនួបពិភាក្សារវាងមេដឹកនាំរុស្ស៊ី និងអ៊ុយក្រែនអាចតានតឹង ឬធូរស្រាល គឺអាស្រ័យទៅលើលទ្ធផលនៃជំនួបរវាងប្រមុខការបរទេសរុស្ស៊ី និងអាមេរិក ដែលត្រូវធ្វើនៅទីក្រុងប៉ារីស នៅថ្ងៃអង្គារ គឺបីថ្ងៃ មុនជំនួបរវាងលោកប៉ូរ៉ូឆិនកូ និងលោកពូទីន។
ក្រៅតែពីជជែកជាមួយប្រមុខដឹកនាំរុស្ស៊ី ដើម្បីស្វែងរកកិច្ចព្រមព្រៀងសន្តិភាពនៅតំបន់ខាងកើតអ៊ុយក្រែន លោកប្រធានាធិបតីប៉ូរ៉ូឆិនកូបានបញ្ជាក់ថា លោក និងលោកពូទីននឹងនិយាយផងដែរពីវិធានការកាត់ផ្តាច់ មិនផ្តល់ឧស្ម័នរុស្ស៊ីទៅឲ្យអ៊ុយក្រែន។ រុស្ស៊ីផ្អាកមិនបញ្ជូនឧស្ម័នទៅអ៊ុយក្រែន នឹងជាប្រធានបទសំខាន់មួយដែរ ដែលគេនឹងលើកយកទៅជជែកនៅប្រទេសអាល្លឺម៉ង់ នៅថ្ងៃទី ២១ខែតុលានេះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ