លក្ខខណ្ឌ១២ចំណុចរបស់ពួកស៊ុយនីតដើម្បីប្រឆាំងអង្គការរដ្ឋអ៊ីស្លាមនៅអ៊ីរ៉ាក់
បណ្តាមេដឹកនាំសហគមន៍ស៊ុយនីត រម្លឹកលក្ខខណ្ឌនានារបស់ខ្លួន ដើម្បីឪ្យពួកគេប្រឆាំងនឹងពួកយុទ្ធជនអាល់កៃដា។ ឥស្សរជនទាំងនោះ បានលើកឡើងជាថ្មីនូវសំណើរបស់ខ្លួន ចំពោះនាយករដ្ឋមន្ត្រីអ៊ីរ៉ាក់និកាយឈីអ៊ីត ដែលបានជួបពួកគេនៅរាជធានីអាម៉ាន់ (Amman) នៃប្រទេសហ្ស៊កដានី។
ចុះផ្សាយនៅថ្ងៃ៖
ស្តាប់ - ០១:៣៣
មានតែបញ្ឈប់ការផាត់និកាយភាគតិចស៊ុយនីតចោលទេ ដែលអាចឈ្នះការគំរាមរបស់ពួកជីហាត នៅប្រទេសអ៊ីរ៉ាក់បាន។ នេះជាការអះអាងរបស់ឥស្សរជនស៊ុយនីតអ៊ីរ៉ាក់ ដែលមានដើមកំណើតនៅខេត្តអាល់អាន់បា (al-Anbar) ហើយដែលភាគច្រើនបានភៀសខ្លួនមកប្រទេសហ្ស៊កដានី នៅពេលបច្ចុប្បន្ន។ ពួកគេបន្ថែមថា ការវាយប្រហារដោយសម្ភត្តមិត្តអន្តរជាតិតែមួយមុខនោះ មិនគ្រប់គ្រាន់ទេ។
លោក ឈីអ៊ីក អាប់ឌែល ម៉ាឡិក អាល់ សាអាឌី (Cheikh Abdel Malek al-Saadi) ដែលជាបុគ្គលម្នាក់ដ៏មានឥទ្ធិពលក្នុងចំណោមពួកស៊ុយនីត បានពោលថា ដើម្បី«បំបាត់ភេរវនិយមនៃអង្គការរដ្ឋអ៊ីស្លាម គេត្រូវបំផ្លាញឫសគល់របស់វា ពោលគឺអយុត្តិធម៌ និងការផាត់[និកាយស៊ុយនីត]ចោល ហើយត្រូវផ្តល់សិទ្ធិសេរីភាពឱ្យប្រជាជនវិញ។
កំហឹងរបស់ពួកស៊ុយនីត
ចាប់តាំងពីការផ្តួលរំលំប្រធានាធិបតី សាដាម ហ៊ូសេន (Saddam Hussein) មកពីនិកាយស៊ុយនីតអ៊ីរ៉ាក់ ក្នុងឆ្នាំ២០០៣ ក្រោមការឈ្លានពានរបស់អាមេរិក ពួកស៊ុយនីត បានបរិហារការផាត់ពួកគេចោលជាប្រព័ន្ធ ដោយអាជ្ញាធរឈីអ៊ីតដែលកាន់អំណាច។ បើនិយាយទៅ អង្គការរដ្ឋអ៊ីស្លាមបានឆ្លៀតយកកំហឹងរបស់ពួកស៊ុយនីត មកធ្វើជាឈ្នាន់ដើម្បីដណ្តើមយកដែនដីមួយភាគធំនៃខេត្ត អាល់ អាន់បា (al-Anbar) កាលពីខែមករាមុន។
ដើម្បីប្រយុទ្ធនឹងពួកជីហាតនៃអង្គការរដ្ឋអ៊ីស្លាម ជនជាតិភាគតិចស៊ុយនីតបានបង្ហាញសំណើ១២ចំណុច ក្នុងបញ្ជីមួយ ក្នុងចំណោមនោះមានការបញ្ឈប់ការវាយប្រហារដែលប៉ះពាល់ប្រជាជន ការធ្វើមាតុភូមិនិវត្តន៍ជនភៀសខ្លួន និងការសងជំងឺចិត្តឱ្យជនរងគ្រោះដោយសារការវាយប្រហាររបស់សម្ភត្តមិត្តអន្តរជាតិជាដើម។ ប៉ុន្តែក៏មានដែរ ហើយជាពិសេសទៀតផងនោះគឺ ការចែកអំណាចពិតប្រាកដជាមួយពួកឈីអ៊ីតអ៊ីរ៉ាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ