អ្នកផ្ទុកមេរោគអេដស៍ព្រួយបារម្ភខ្លាចថ្នាំពន្យារជីវិតឡើងថ្លៃ
អ្នកផ្ទុកមេរោគអេដស៍នៅក្នុងប្រទេសកម្ពុជាព្រួយបារម្ភខ្លាចថ្នាំ ពន្យារជីវិតឡើងថ្លៃ។ ការព្រួយបារម្ភនេះបានធ្វើឡើងស្របពេលដែលប្រទេសឥណ្ឌា និងសហភាពអឺរ៉ុបគ្រោងនឹងចុះកិច្ចព្រមព្រៀងពាណិជ្ជកម្មសេរីជាមួយ គ្នានៅចុងឆ្នាំ២០១០នេះ។
ចុះផ្សាយនៅថ្ងៃ៖
សេចក្តីរាយការណ៍របស់ គី សុខលីម ពីទីក្រុងភ្នំពេញ
អ្នកផ្ទុកមេរោគអេដស៍នៅក្នុងប្រទេសកម្ពុជាអំពាវនាវរួមគ្នានៅក្នុងសន្និសីទកាសែតនៅថ្ងៃសុក្រនេះសូមអោយប្រទេសឥណ្ឌាកុំចុះហត្ថលេខាលើកិច្ចព្រមព្រៀងពាណិជ្ជកម្មសេរីជាមួយសហភាពអឺរ៉ុបនៅក្នុងពេលខាងមុខនេះ។
ការចុះហត្ថលេខាលើកិច្ចព្រមព្រៀងនេះនឹងធ្វើអោយថ្នាំពន្យារជីវិតសម្រាប់អ្នករស់នៅជាមួយជំងឺអេដស៍នឹងឡើងថ្លៃបន្ថែមទៀត។ បច្ចុប្បន្ននេះប្រទេសឥណ្ឌាជាប្រទេសផលិតនិងចែកចាយឱសថពន្យារជីវិតច្រើនជាងគេនៅក្នុងពិភពលោកជាមួយនឹងតម្លៃថោកប៉ុន្តែប្រសិនបើប្រទេសមួយនេះសម្រេចចុះហត្ថលេខាជាមួយសហភាពអឺរ៉ុបដោយគោរពតាមច្បាប់កម្មសិទ្ធិបញ្ញានោះឱសថពន្យារជីវិតអ្នកជំងឺអេដស៍នឹងឡើងថ្លៃ១០ដងបន្ថែមទៀត។
បណ្ដាញអ្នកផ្ទុកមេរោគអេដស៍នៅក្នុងប្រទេសកម្ពុជាបានបញ្ជាក់ថា ថ្នាំពន្យារជីវិតនៅក្នុងប្រទេសកម្ពុជានាពេលបច្ចុប្បន្ននេះមានតម្លៃ៨០ដុល្លារនិង៨០០ដុល្លារក្នុងមួយឆ្នាំអាស្រ័យទៅលើស្ថានភាពនៃអ្នកជំងឺ។
លោក ហែន ភិន មន្ត្រីជាន់ខ្ពស់នៃបណ្ដាញអ្នកផ្ទុកមេរោគអេដស៍នៅក្នុងប្រទេសកម្ពុជាបានបញ្ជាក់ថា កិច្ចព្រមព្រៀងពាណិជ្ជកម្មសេរីរវាងឥណ្ឌានិងសហភាពអឺរ៉ុបនឹងធ្វើអោយអ្នកផ្ទុកជំងឺអេដស៍នៅក្នុងពិភពលោកមានការលំបាកក្នុងនោះមានប្រទេសកម្ពុជាផងដែរ។
រហូតមកដល់ពេលនេះ ប្រទេសកម្ពុជាមានអ្នកកើតជំងឺអេដស៍ជាង៧ម៉ឺននាក់ក្នុងនោះអ្នកជំងឺជាង៣ម៉ឺននាក់ទទួលបានថ្នាំពន្យារជីវិត។ រដ្ឋាភិបាលនៃប្រទេសកម្ពុជាចំណាយថវិកាប្រចាំថ្នាំអស់ជាង១០លានដុល្លារសម្រាប់ទិញថ្នាំពន្យារជីវិតជូនដល់អ្នកជំងឺអេដស៍។ ដូច្នេះប្រសិនបើថ្នាំពន្យារជីវិតត្រូវឡើងថ្លៃតាមរយៈការគោរពកម្មសិទ្ធិបញ្ញានោះរដ្ឋាភិបាលនៃប្រទេសកម្ពុជានឹងត្រូវចំណាយកាន់តែច្រើន។ ហើយប្រសិនបើរដ្ឋាភិបាលខ្វះថវិកាដើម្បីទិញថ្នាំទាំងនោះពេលនោះអ្នកផ្ទុកជំងឺអេដស៍ជាអ្នកទទួលថ្មបាក់។
អ្នកផ្ទុកមេរោគអេដស៍នៅក្នុងប្រទេសកម្ពុជាមួយចំនួនបាននិយាយថា ពួកគេមានអារម្មណ៍ខ្វល់ខ្វាយមែនទែននៅពេលដែលពួកគេទទួលដំណឹងអំពីការចុះកិច្ចព្រមព្រៀងពាណិជ្ជកម្មសេរីរវាងប្រទេសឥណ្ឌានិងសហភាពអឺរ៉ុប។ ពួកគេបានសំណូមពរថា សូមបញ្ឈប់កិច្ចព្រមព្រៀងនេះហើយសូមបញ្ឈប់ការធ្វើអាជីវកម្មជីវិតរបស់ពួកគេជាបន្ទាន់។
លោក តែង គន្ធី អគ្គលេខាធិការនៃអាជ្ញាធរជាតិប្រយុទ្ធនឹងជំងឺអេដស៍បានបញ្ជាក់នៅថ្ងៃសុក្រនេះថា ស្ថាប័នរបស់លោកមិនទាន់អាចប្រតិកម្មទៅនឹងគម្រោងចុះហត្ថលេខានេះបាននៅឡើយទេពីព្រោះស្ថាប័នរបស់លោកនៅមិនទាន់ទទួលបានខ្លឹមសារច្បាស់លាស់ជុំវិញកិច្ចព្រមព្រៀងនេះ។ លោក គន្ធី បានបញ្ជាក់ថា ក្នុងពេលខាងមុខនេះស្ថាប័នរបស់លោកនឹងអញ្ជើញអ្នកពាក់ព័ន្ធទាំងអស់អោយជួបប្រជុំគ្នាដើម្បីពិនិត្យមើលកិច្ចព្រមព្រៀងពាណិជ្ជកម្មសេរីនេះជាមុនសិន មុននឹងសម្ដែងក្តីព្រួយបារម្ភណាមួយនោះ។
លោក បានបន្តទៀតថា ជាគោលការណ៍ ស្ថាប័នរបស់លោកចង់អោយថ្នាំពន្យារជីវិតអ្នកផ្ទុកមេរោគអេដស៍មានតម្លៃថោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ