The Interview រកចំណូលបាន១លានដុល្លារ ក្នុងថ្ងៃចេញផ្សាយដំបូង
ខ្សែភាពយន្តហូលីវូដបែបកំប្លែងដែលនិយាយពីការធ្វើឃាតមេដឹកនាំកូរ៉េខាងជើង គីមជុងអ៊ុន The Interview រកចំណូលបាន១លានដុល្លារ ក្នុងថ្ងៃដាក់បញ្ចាំងលើកដំបូង ដោយមានចំនួនកំណត់ បន្ទាប់ពីខ្សែភាពយន្តនេះត្រូវបានរោងកុនធំៗជាច្រើនមិនទទួលយក។ នេះបើតាមក្រុមហ៊ុនសូនីនិយាយនៅថ្ងៃសុក្រម្សិលមិញនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
ចំនួននៃការដាក់បញ្ចាំងមានកំណត់ ដែលមានក្រោម១០% នៃចំនួនរោងកុនដែលបានគ្រោងទុកនេះ គឺជាការលក់មួយដ៏អស្ចារ្យបំផុត ដោយនៅថ្ងៃទី១ ខ្សែភាពយន្ត The Interview រកចំណូលបានរហូតដល់ទៅជាង ១លានដុល្លារអាមេរិក។ នេះបើតាមការបញ្ជាក់របស់លោក រ៉ូរ៉ី ប្រ៊ូអឺ (Rory Bruer) នាយកចែកចាយទូទាំងពិភពលោករបស់ក្រុមហ៊ុនសូនី។
បន្ទាប់ពីគំរោងដាក់បញ្ចាំងលើកដំបូងត្រូវបានបញ្ឈប់ ដែលធើ្វឲ្យអន្តរជាតិមានការភ្ញាក់ផ្អើល ខ្សែភាពយន្ត The Interview បានដាក់បញ្ចាំងនៅក្នុងរោងកុនចំនួន ៣០០ នៅថ្ងៃទី ២៥ធ្នូ ហើយដែលភាគច្រើនគឺជារោងកុនឯករាជ្យតូចៗ។ ខ្សែភាពយន្តនេះក៏ត្រូវបានដាក់បញ្ចាំងតាមអ៊ីនធឺណែត សម្រាប់ជួល និងលក់ផងដែរ។
រោងកុនធំៗជាច្រើនរបស់អាមេរិកបានប្រកាសកាលពីសប្តាហ៍មុនថា ពួកគេនឹងមិនដាក់បញ្ចាំងរឿង The Interview ទេ បន្ទាប់ពីមានការគំរាមពីក្រុម hacker ដែលបានអះអាងថាខ្លួនបានចូលលួចយកទិន្នន័យរបស់ក្រុមហ៊ុនសូនី។
ខ្សែភាពយន្តបែបកំប្លែងដែលសម្តែងដោយតួអង្គ Seth Rogen និង James Franco គឺជាខ្សែភាពយន្តដែលប្រឌិតឡើង និយាយពីការលួចធ្វើឃាតមេដឹកនាំកូរ៉េខាងជើង គីម ជុងអ៊ុន។ ហើយភាពយន្តនេះទៀតសោត បានធ្វើឲ្យកូរ៉េខាងជើងខឹងសប្បាយ៉ាងខ្លាំង រហូតធ្វើឲ្យអាមេរិកចាត់ទុកថាកូរ៉េខាងជើងជាអ្នកនៅពីក្រោយការវាយប្រហារទៅក្រុមហ៊ុនសូនី។
លោក ប្រ៊ូអឺបាននិយាយនៅក្នុងសេចក្តីថ្លែងការណ៍ថា ឆ្លងកាត់ឧបសគ្គជាច្រើនក្នុងការដាក់បញ្ចាំង ក្រុមហ៊ុនសូនីពិតជាថ្លែងអំណរគុណយ៉ាងជ្រាលជ្រៅដល់ប្រជាជាជនទាំងអស់ដែលបានមកទស្សនារឿង The Interview ក្នុងថ្ងៃដាក់បញ្ចាំងដំបូង។
គេហទំព័រចែកចាយឯកសារមួយបានឲ្យដឹងថា ខ្សែភាពយន្តមួយនេះ ត្រូវបានគេទាញយកចំនួន ៧៥ម៉ឺនដងដោយខុសច្បាប់។ ប៉ុន្តែការបើកមើលតាមប្រព័ន្ធអ៊ីនធឺណែតនៅមិនទាន់បានបង្ហាញនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ