សហរដ្ឋអាមេរិក-កូរ៉េខាងជើង

SONY សំរេចបញ្ចាំងភាពយន្តរឿងThe Interview

ខ្សែភាពយន្តហូលីវូដបែបកំប្លែង របស់ក្រុមហ៊ុនSONY រឿងThe Interview នឹងត្រូវចាក់បញ្ចាំង ចាប់ពីថ្ងៃពុធទី២៤ ធ្នូនេះទៅ។ ក្រុមហ៊ុនSONY ធា្លប់បានប្រាប់ កាលពីសប្តាហ៍មុនថា ខ្លួននឹងផ្អាកមិនទាន់បញ្ចាំងរឿងនេះទេ បន្ទាប់ពីមានការគំរាមកំហែង ពីពួកចោរព័ត៌មានវិទ្យា ថាបើរឿងនេះដាក់បញ្ចាំង ពួកគេ នឹងធ្វើភេរវកម្ម នៅតាមរោងភាពយន្ត។ គេសង្ស័យយ៉ាងខ្លាំងថា កូរ៉េខាងជើងជាអ្នកបញ្ជារក្រុមចោរឲ្យធ្វើ ព្រោះខ្លួនយល់ថា ខ្សែភាពយន្តនេះ មានខ្លឹមសារសើចចំអក មើលងាយកូរ៉េខាងជើង។

ចុះផ្សាយនៅថ្ងៃ៖ 24/12/2014 - 13:45

ដោយ៖ ម៉ម ពិសី

ផ្សាយពាណិជ្ជកម្ម

បន្ទាប់ពីបានរងពាក្យរិះគន់ជាច្រើន ក្រុមហ៊ុនផលិតកុនដ៏ធំរបស់ហូលីវូដ SONY PICTURES INTERTAINMENT បានប្តូរចិត្តវិញ ថានឹងចាប់បញ្ចាំងខ្សែភាពយន្តរឿង The Interview ចាប់ពីថ្ងៃពុធទី២៤នេះទៅ។ សូមរំលឹកថា ក្រុមហ៊ុន SONY ត្រូវបានពួកចោរព័ត៌មានវិទ្យា វាយប្រហារតាមប្រព័ន្ធអ៊ិនធឺនែត លួចយកឯកសារសំខាន់ៗ របស់ក្រុមហ៊ុនស្ទើរតែទាំងស្រុង ហើយព្រមទាំងបានគំរាមកំហែងទៀតថា ពួកគេនឹងធ្វើភេរវកម្ម តាមរោងកុនណា ដែលហ៊ានចាក់បញ្ចាំងរឿង The Interview។

កាលពីសប្តាហ៍មុន ក្រុមហ៊ុន SONY ធ្លាប់បានប្រាប់ថា ខ្លួននឹងផ្អាក មិនទាន់បញ្ចាំងរឿងនេះទេ ដោយសារតែខ្លាចមានអំពើភេរវកម្មកើតឡើង។ ដោយឡែក ក្រុមតារាភាពយន្ត ក៏ដូចជាម្ចាស់រោងកុននៅអាមេរិក និងជាពិសេសលោកបារ៉ាក់ អូបាម៉ា ផ្ទាល់តែម្តង បានរិះគន់ ការសម្រេចចិត្តរបស់ ក្រុមហ៊ុន SONY។ ពាក្យរិះគន់ថា ក្រុមហ៊ុន SONYធ្វើនេះ ជាការចុះញម នឹងពួកទុច្ចរិត ឲ្យធ្វើឲ្យពួកនេះបានចិត្ត គំរាមចង់បានអី បាននឹង។ អាមេរិក ជាប្រទេសមានសេរីភាពពេញលេញ គេមិនអាចបញ្ឈប់ការបញ្ចាំងកុន ដោយសារតែមានគេ គំរាមកំហែងនោះទេ។

សូមរំលឹកថា រឿង The Interview ជាខ្សែភាពយន្តបែបកំប្លែង ដែលសាច់រឿងនិយាយអំពី អ្នកកាសែតអាមេរិកពីរនាក់ ធ្វើការជាគេញសម្ងាត់ឲ្យ CIA រៀបចំគម្រោងសម្លាប់ប្រធានាធិបតីកូរ៉េខាងជើង លោកគីម ជុងអ៊ុន។ បន្ទាប់ពីបានដឹងព័ត៌មានថាមានខ្សែភាពយន្តនេះ កូរ៉េខាងជើង បាននិយាយថា នឹងធ្វើការវាយប្រហារ បើសិនជាកុននេះបញ្ចាំង ព្រោះកូរ៉េខាងជើងយល់ថា នេះហាក់ដូចជាសង្គ្រាម ដែលអាមេរិកវាយមកលើកូរ៉េខាងជើងអញ្ចឹង។

ក្រុមFBI អាមេរិក មានភស្តុតាងមួយចំនួនធំ ដែលអាចអះអាងបានថា កូរ៉េខាងជើងជាអ្នកវាយប្រហារក្រុមហ៊ុន SONY ហើយជាអ្នកគំរាមកំហែងថានឹងធ្វើភេរវកម្ម។ ការសម្រេចចិត្ត ថានឹងចាក់បញ្ចាំងកុនរឿងនេះឡើងវិញ ត្រូវបានគេអបអរ និងសរសើរ ពីសេចក្តីក្លាហានរបស់ក្រុមហ៊ុន SONY ព្រោះអីនេះ ជាសេរីភាពក្នុងការសំដែងមតិយោបល់របស់សិល្បៈករ ហើយវា គ្រាន់តែជាស្នាដៃសិល្បៈភាពយន្ត តែប៉ុណ្ណោះ មិនមែនជាការពិតឯណា។

ដោយឡែក នៅកូរ៉េខាងជើងឯនោះវិញ មានការរអាក់រអួល ប្រព័ន្ធអ៊ិនធឺនែត ឈប់ដំណើរការជិត១០ម៉ោង។ មតិមួយចំនួនចោទសួរថា ប្រហែលជាអាមេរិក បានវាយបកទៅលើប្រព័ន្ធអ៊ិនធឺនែតកូរ៉េខាងជើងវិញក៏មិនដឹង។ យ៉ាងណាក៏ដោយ អ្នកនាំពាក្យរដ្ឋាភិបាលអាមេរិក បានឆ្លើយថា អាមេរិកមិនយកពេលទៅធ្វើរឿងកំប៉ិកកំប៉ុកឥតប្រយោជន៍បែបនេះទេ៕