ជំនួយអឺរ៉ុបទៅលើធនាគារអេស្ប៉ាញរឹតតែធ្វើឲ្យអ្នកវិនិយោគព្រួយបារម្ភ
ទីផ្សារហិរញ្ញវត្ថុនៅអាស៊ី បានធ្លាក់ចុះ នៅថ្ងៃអង្គារនេះ ជាមួយក្តីព្រួយបារម្ភពីវិបត្តិប្រាក់បំណុលដែលរីករាលដាល នៅក្នុងតំបន់អឺរ៉ូ។ កាលពីថ្ងៃចន្ទម្សិលមិញ អត្រាការប្រាក់កម្ចីរបស់អេស្ប៉ាញ បានកើនខ្ពស់ជាងអ៊ីតាលីទៅទៀត គឺប្រមាណ ៦,៥ ភាគរយ សម្រាប់រយៈពេល១០ឆ្នាំ។ អត្រាការប្រាក់ខ្ពស់របស់អេស្ប៉ាញធ្វើឲ្យក្រុមអ្នកវិនិយោគខ្លាចថា អេស្ប៉ាញ ប្រទេសសេដ្ឋកិច្ចទីបួន នៅអឺរ៉ុប នឹងអាចធ្លាក់ចូលទៅក្នុងវិបត្តិប្រាក់បំណុលដូចប្រទេសផ្សេងទៀត នៅតំបន់អឺរ៉ូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
អេស្ប៉ាញបច្ចុប្បន្ននេះ គ្រាន់តែមានវិបត្តិធនាគារ ដែលរងគ្រោះបន្តដោយវិបត្តិអចលនទ្រព្យ។ កាលពីថ្ងៃសៅរ៍ ក្រុមប្រទេសចាយប្រាក់អឺរ៉ូបានសម្រេចឲ្យអេស្ប៉ាញខ្ចីប្រាក់ ១០០ពាន់លានអឺរ៉ូដើម្បីឲ្យអេស្ប៉ាញអាចយកទៅជួយសង្រ្គោះធនាគាររបស់ខ្លួន។ ទីផ្សារហិរញ្ញវត្ថុគួរតែស្ងប់ចិត្តដែលឃើញវិបត្តិធនាគារអេស្ប៉ាញត្រូវប្រទេសនៅតំបន់អឺរ៉ូជួយសង្រ្គោះ។
ប៉ុន្តែ ផ្ទុយទៅវិញ គឺកញ្ចប់ប្រាក់កម្ចីនេះហើយដែលធ្វើឲ្យអ្នកវិនិយោគព្រួយបារម្ភពីសុខភាពហិរញ្ញវត្ថុរបស់ប្រទេសអេស្ប៉ាញ ព្រោះថា ជាមួយនឹងកញ្ចប់លុយនោះ រដ្ឋាភិបាលអេស្ប៉ាញអាចដោះស្រាយវិបត្តិធនាគារបានមែន ប៉ុន្តែ ជាមួយគ្នានោះ គេមើលឃើញថា កញ្ចប់ប្រាក់កម្ចីរបស់តំបន់អឺរ៉ូនឹងទៅបន្ថែមចំនួនប្រាក់បំណុលរបស់អេស្ប៉ាញឲ្យកើនឡើងមួយកម្រិតទៀត។
តាមអ្នកវិភាគមួយចំនួន កញ្ចប់ជំនួយរបស់តំបន់អឺរ៉ូ មិនត្រូវបានអេស្ប៉ាញយកទៅប្រើវិនិយោគដើម្បីជំរុញកំណើនសេដ្ឋកិច្ចទេ ប៉ុន្តែ គឺដើម្បីយកទៅសងការខូចខាតរបស់ធនាគារ គឺប្រៀបបាននឹងចាក់លុយចោល ដោយគ្មានប្រយោជន៍។
ដូច្នេះ បើ សេដ្ឋកិច្ចរបស់អេស្ប៉ាញនៅទ្រឹង ឬមិនមានអ្វីផ្លាស់ប្តូរល្អប្រសើរជាងមុន ហើយប្រាក់បំណុលអេស្ប៉ាញរឹតតែកើនឡើងនោះ អ្នកវិនិយោគដែលជាម្ចាស់ប្រាក់បំណុល ច្បាស់ជាគិតថា បំណុលរបស់រដ្ឋអេស្ប៉ាញមានហានិភ័យខ្ពស់ ដែលជាហេតុធ្វើឲ្យគេអល់អែក មិនចង់ឲ្យខ្ចីលុយ ហើយបើឲ្យខ្ចី ក៏ជាមួយនឹងអត្រាការប្រាក់ខ្ពស់។
រហូតមកដល់ពេលនេះ វិបត្តិប្រាក់បំណុលបានប៉ះពាល់ស៊ីជម្រៅដល់សេដ្ឋកិច្ចរបស់ប្រទេសបី គឺក្រិក អៀឡង់ និងព័រទុយហ្គាល់ ប៉ុន្តែ នៅពេលវិបត្តិចាប់ផ្តើមរីករាលចូលទៅក្នុងប្រទេសសេដ្ឋកិច្ចធំ ដូចជាអេស្ប៉ាញ និងអ៊ីតាលី គេបារម្ភថា កំណើនសេដ្ឋកិច្ចរបស់អឺរ៉ុបរឹតតែចុះ ខ្សោយ។ នេះជាហេតុផលមួយដែលធ្វើឲ្យទីផ្សារភាគហ៊ុននៅអាមេរិក និងអឺរ៉ុបធ្លាក់ចុះដែរ កាលពីថ្ងៃចន្ទម្សិលមិញ។
ដូចទម្លាប់ អឺរ៉ុបតែងតែយឺតយ៉ាវខ្លាំងណាស់ ក្នុងការធ្វើអន្តរាគមន៍ ដែលជាហេតុធ្វើឲ្យវិបត្តិតូច បានរីកទៅជាវិបត្តិធំ និងឆ្លងពីប្រទេសមួយទៅប្រទេសមួយទៀត នៅក្នុងតំបន់អឺរ៉ូ។ អ្នកសេដ្ឋកិច្ចបានទាមទារឲ្យអ្នកនយោបាយអឺរ៉ុបប្រញាប់ចាត់វិធានការបន្ទាន់ គឺដើម្បីចាត់វិធានរយៈពេលវែង ប៉ុន្តែ មិនមែនដំណោះស្រាយដើម្បីរួចខ្លួនមួយគ្រាៗ ដូចដែលអ្នកវិនិយោគកំពុងមើលឃើញ នៅក្នុងនយោបាយរបស់ថ្នាក់ដឹកនាំអឺរ៉ុប នៅពេលនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ