ទីភ្នាក់ងារ S&P បញ្ចុះចំណាត់ថ្នាក់អេស្ប៉ាញពីរកម្រិត
នៅថ្ងៃព្រហស្បតិ៍ទី២៦មេសាម្សិលមិញ ទីភ្នាក់ងារវាយតម្លៃហានិភ័យហិរញ្ញវត្ថុអាមេរិកាំង S&P បញ្ចុះចំណាត់ថ្នាក់អេស្ប៉ាញពីរកម្រិត ក្រោយពីបានទម្លាក់ម្តងរួចហើយកាលពីខែមករាកន្លងទៅ។ ចំណាត់ថ្នាក់នៃប្រទេសអេស្ប៉ាញបានធ្លាក់ពី “A”មកនៅ “BBB+” ដោយគេបារម្ភខ្លាចក្រែងដំណើរសេដ្ឋកិច្ចដើរថយក្រោយធ្វើឲ្យប៉ះពាល់ដល់គោលបំណងនៃការកាត់បន្ថយឧនភាពថវិកាជាតិអេស្ប៉ាញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
“នៅក្នុងបរិបទនៃសេដ្ឋកិច្ចដ៏អាប់អួរ ទីភ្នាក់ងារវាយតម្លៃហានិភ័យហិរញ្ញវត្ថុអាមេរិកាំងStandard and Poor’s (S&P) យល់ឃើញថា ស្ថានភាពហិរញ្ញវត្ថុសាធារណៈនៃប្រទេសអេស្ប៉ាញនឹងស្គាល់ការធ្លាក់ស្រុតចុះ” នេះជាការកត់សម្គាល់របស់ទីភ្នាក់ងារវាយតម្លៃហានិភ័យហិរញ្ញវត្ថុនៅក្នុងសេចក្តីថ្លែងការណ៍របស់ខ្លួន។
ប្រទេសអេស្ប៉ាញជាមហាអំណាចសេដ្ឋកិច្ចទី៤នៅក្នុងតំបន់អឺរ៉ូ។ សេដ្ឋកិច្ចអេស្ប៉ាញបានស្គាល់ដំណើរសេដ្ឋកិច្ចដើរថយក្រោយនៅត្រីមាសទី១ឆ្នាំ២០១២។ បើយោងតាមធនាគារកណ្តាលអេស្ប៉ាញ ផលិតផលដុលសរុបអេស្ប៉ាញបានធ្លាក់ស្រុតចុះអស់០,៤%។ ទាំងនេះប្រាកដជាបង្កឲ្យកើតមានបញ្ហាដល់កម្មវិធីកាត់បន្ថយឧនភាពថវិកាដែលប្រទេសអេស្ប៉ាបានសន្យាថានឹងធ្វើឲ្យឧនភាពសាធារណៈធ្លាក់មកនៅ៨,៥១%នៃផលិតផលដុលសរុបនៅឆ្នាំ២០១១ ៥,៣%នៅឆ្នាំ២០១២ ហើយនិង៣%នៅឆ្នាំ២០១៣។ ក៏ប៉ុន្តែ ទីភ្នាក់ងារវាយតម្លៃហានិភ័យហិរញ្ញវត្ថុអាមេរិកាំងStandard and Poor’s (S&P) យល់ថា ឧនភាពសាធារណៈនៃប្រទេសអេស្ប៉ាញនឹងមាន៦,២%នៅឆ្នាំ២០១២ ហើយនិង៤,៨%នៅឆ្នាំ២០១៣ខាងមុខ។
រីឯវិស័យធនាគារអេស្ប៉ាញវិញក៏ជាប្រភពមួយដ៏ធំធ្វើឲ្យទីផ្សារហិរញ្ញវត្ថុកើតមានក្តីបារម្ភ ដោយហេតុថាវិស័យធនាគារអេស្ប៉ាញបានធ្លាក់ទៅក្នុងលក្ខណៈផុយស្រួយក៏ពីព្រោះតែវិបត្តិដ៏សែនធ្ងន់ធ្ងរបានកើតមាននៅក្នុងវិស័យអចលនទ្រព្យនៅក្នុងប្រទេសអេស្ប៉ាញតាំងពីឆ្នាំ២០០៨។
មូលហេតុអស់ទាំងនេះហើយដែលធ្វើឲ្យទីភ្នាក់ងារវាយតម្លៃហានិភ័យហិរញ្ញវត្ថុអាមេរិកាំងStandard and Poor’s (S&P) យល់ឃើញថា “បរិមាណនៃប្រាក់បំណុលរបស់រដ្ឋាភិបាលអេស្ប៉ាញនឹងស្គាល់ការកើនឡើងបន្ថែមទៀត”។ ដូច្នេះការទម្លាក់ចំណាត់ថ្នាក់របស់ប្រទេសអេស្ប៉ាញជាការចៀសពុំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ