ទីក្រុងម៉ាឌ្រីដបង្ហាញនយោបាយថវិកាត្បិតត្បៀតដើម្បីកាត់បន្ថយឧនភាព
មួយថ្ងៃក្រោយពីមានបាតុកម្មនិងកូដកម្មដ៏ធំធេងដែលបានធ្វើឲ្យប្រទេសអេស្ប៉ាញសឹងតែទាំងមូលស្គាល់ការគាំងស្ទះ ទន្ទឺមគ្នានេះរដ្ឋាភិបាលរបស់លោក Mariano Rajoy បានចេញបង្ហាញនៅសុក្រទី៣០មីនាឆ្នាំ២០១២ម្សិលមិញ ឲ្យឃើញនូវគម្រោងថវិកាត្បិតត្បៀតមួយសម្រាប់ឆ្នាំ២០១២ដើម្បីកាត់បន្ថយឧនភាពនិងដើម្បីប្រយុទ្ធទប់ទល់នឹងវិបត្តិប្រាក់បំណុលរបស់ប្រទេសអេស្ប៉ាញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
គោលបំណងនៃនយោបាយថវិកាត្បិតត្បៀតសម្រាប់ឆ្នាំ២០១២នៃរដ្ឋាភិបាលអេស្ប៉ាញរបស់ លោក Mariano Rajoy គឺធ្វើការកាត់បន្ថយឧនភាពសាធារណៈ ដែលបច្ចុប្បន្ននេះមានដល់ទៅ៨,៥%នៃផលិតផលដុលសរុប ឲ្យធ្លាក់មកនៅ៥,៣%នៅដំណាច់ឆ្នាំនេះ ហើយនិងឲ្យធ្លាក់មកនៅ៣%នៃផលិតផលដុលសរុបនៅឆ្នាំ២០១៣។
ដូច្នេះ ឃើញថាឧនភាពសាធារណៈរបស់ប្រទេសអេស្ប៉ាញឋិតនៅឆ្ងាយណាស់ពីការទាមទាររបស់សហភាពអឺរ៉ុបដែលឲ្យមានឧនភាពត្រឹមតែ៣%នៃផលិតផលដុលក្នុងប្រទេស។ គួរបញ្ជាក់ថា ប្រទេសអេស្ប៉ាញជាមហាអំណាចសេដ្ឋកិច្ចទី៤ក្នុងតំបន់អឺរ៉ូ។ ប៉ុន្តែប្រទេសអេស្ប៉ាញមានអត្រានៃអ្នកឥតការងារធ្វើកើនឡើងសល់កម្រិតកំពូលពោលគឺប្រមាណជាង៥លាននាក់ឬត្រូវជា២៣%នៃប្រជាជនសកម្ម ដែលជាអត្រាខ្ពស់ជាងគេនៅក្នុងសហភាពអឺរ៉ុប។
នយោបាយថវិកាត្បិតត្បៀតសម្រាប់ឆ្នាំ២០១២នេះ នឹងអាចធ្វើឲ្យគេមានទំនុកចិត្តទៅលើរដ្ឋាភិបាលអេស្ប៉ាញរបស់លោក Mariano Rajoy។ ក៏ប៉ុន្តែ គឺប្រជាជនអេស្ប៉ាញឯណោះទេដែលជាអ្នកទទួលរងគ្រោះ ដោយហេតុតែមាននយោបាយថវិកាត្បិតត្បៀតរបស់រដ្ឋាភិបាលអស់រយៈពេលពីរឆ្នាំរួចមកហើយ។ ប្រាក់បៀវត្សរ៍របស់មន្ត្រីរាជការនឹងត្រូវនៅនឹងថ្កល់នៅឆ្នាំ២០១២នេះ ក្រោយពីបានស្គាល់សភាពដូចគ្នានេះនៅឆ្នាំ២០១១ ហើយនិងបានត្រូវគេកាត់បន្ថយប្រមាណ៥%នៅឆ្នាំ២០១០។
គួរកត់សម្គាល់ថា ថវិកាសឹងតែគ្រប់ក្រសួងបានត្រូវរដ្ឋាភិបាលកាត់បន្ថយប្រមាណ១៦,៩% ហើយក្រសួងដែលប៉ះពាល់ខ្លាំងជាងគេគឺក្រសួងបរិក្ខារដែលបានត្រូវរដ្ឋាភិបាលរបស់លោក Mariano Rajoy កាត់បន្ថយអស់ប្រមាណ៣៤,៦%។ ដូច្នេះ ជាសរុប រដ្ឋាភិបាលអេស្ប៉ាញរបស់លោក Mariano Rajoy សន្សំសំចៃបានប្រមាណ២៧ពាន់លានអឺរ៉ូ។
ដើម្បីធ្វើការបង្កើនប្រាក់ចំណូលឲ្យហិបប្រាក់រដ្ឋបន្ថែមទៀត រដ្ឋាភិបាលរបស់លោក Mariano Rajoy បានសម្រេចដំឡើងពន្ធលើប្រាក់ចំណូល៤,៣% ពន្ធលើក្រុមហ៊ុន១៧,៨%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ