ព្រឹទ្ធសភារុស្ស៊ីពិភាក្សាទៅលើគម្រោងច្បាប់ដ៏ចម្រូងចម្រាស
សាច់រឿងគឺជុំវិញគម្រោងច្បាប់ស្តីអំពីអង្គការក្រៅរដ្ឋាភិបាលក្នុងឋានៈជា “ភ្នាក់ងារបរទេស” ,ស្តីអំពី “បទមួលបង្កាច់” ,ស្តីអំពី “បញ្ជីខ្មៅ” សម្រាប់វែបសៃត៏ខ្លះ។ គម្រោងច្បាប់ទាំងនេះ តាមធាតុពិត គឺឆ្ពោះទៅរឹតត្បិតសកម្មភាពពួកប្រឆាំងលុះទាល់តែកាសែតលោកខាងលិចសន្និដ្ឋានថា តែក្នុងរយៈពេលជាង២ខែសោះ ក្រោយពីលោក ពូទីន ត្រឡប់ទៅវិមានក្រេមឡាំងវិញ រាល់អ្វីៗជាសេរីនិយម អនុញ្ញាតដោយលោក មេដវេដេវ ហាក់បីរលាយបាត់ទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
ក្នុងសម័យប្រជុំពេញអង្គថ្ងៃនេះ ដែលជាលើកចុងក្រោយ មុននឹងបែកគ្នាទៅវ៉ាកង បណ្តាសមាជិកព្រឹទ្ធសភារុស្ស៊ី ពិនិត្យមើលបញ្ហាចំនួនដល់ទៅ ៤០ ប៉ុន្តែ ចម្រូងចម្រាសជាងគេ គឺគម្រោងច្បាប់បី ដែលត្រូវបានអនុម័តទៅហើយ ដោយសភាឌូម៉ាជាសភាជាន់ក្រោម ៖
ទី១- គឺគម្រោងច្បាប់ ស្តីអំពីអង្គការក្រៅរដ្ឋាភិបាល ក្នុងឋានៈជា “ភ្នាក់ងារបរទេស” ដែលចែងថា អង្គការក្រៅរដ្ឋាភិបាលណាដែលទទួលប្រាក់ឧបត្ថម្ភពីក្រៅ ហើយធ្វើសកម្មភាពនយោបាយ នៅរុស្ស៊ី ត្រូវចាត់ទុកជា”ភ្នាក់ងារបរទេស”។ ពាក្យថា “ភ្នាក់ងារបរទេស”នេះ តាមមតិពួកប្រឆាំង គឺបង្វែរស្មារតីគេ ឲ្យនឹកឃើញទាំងស្រៀវឆ្អឹងខ្នង អំពីទសវត្សរ៍ទី៣០ ជំនាន់ក្រោមអំណាចផ្តាច់ការ Staline ក្នុងន័យជាអ្នកលួចយកការណ៍ឲ្យបរទេស។ ប៉ុន្តែអាជ្ញាធររុស្ស៊ីអះអាងថា បើអង្គការក្រៅរដ្ឋាភិបាលធ្វើសកម្មភាពបែបយ៉ាង ផ្នែកមនុស្សធម៌ សាសនាឬវិទ្យាសាស្ត្រ គឺ គ្មានបញ្ហាទេ។
ទី២- គឺគម្រោងច្បាប់ស្តីអំពី” បទមួលបង្កាច់” ដែលតាមមតិពួកប្រឆាំងគឺសំដៅបិទកញ្ចប់មាត់ ទាំងអ្នកណាដែលមិនឯកភាពនឹងនយោបាយថ្នាក់ដឹកនាំ ទាំងកាសែត ទូរទស្សន៍ កុំឲ្យហ៊ានទិតៀនផ្តេសផ្តាស ពុំនោះសោតទេ គឺអាចត្រូវជាប់ចោទក្នុងការប្រឌិតរឿងមួលបង្កាច់។ ច្បាប់នេះ ចែងថា អ្នកដែលប្រព្រឹត្តអំពើមួលបង្កាច់គឺអាចត្រូវពិន័យឲ្យបង់ប្រាក់រហូតដល់៥លានរូប្ល ស្មើនឹង ជាង១៥ម៉ឺនដុល្លារអាមេរិកឬ ក៏ត្រូវផ្តន្ទាទោសឲ្យបំពេញការងារចំនួន ៤៨០ម៉ោង សម្រាប់ជាគុណប្រយោជន៍សង្គម។
ទី៣- គឺ ច្បាប់ស្តីអំពី ការតាក់តែង “បញ្ជីខ្មៅ” សម្រាប់វែបសៃត៏ណា ដែលផ្សព្វផ្សាយ ព៍ត៌មានត្រូវបាន ហាមមិនឲ្យផ្សាយនៅរុស្ស៊ី។ ច្បាប់នេះសំដៅការពារកុមារឲ្យផុតពីព័ត៌មានណា ដែល នាំឲ្យខូចដល់សុខភាពនិងការលូតលាស់របស់គេ បែបយ៉ាងព័ត៌មានដែលឃោសនា ការប្រើគ្រឿងញៀន ការសេពសន្ទវៈជាមួយកុមារ ការលើកទឹកចិត្ត ឲ្យហ៊ានប្រព្រឹត្តអត្តឃាតកម្ម សម្លាប់ខ្លួនឯងជាដើម។ ច្បាប់នេះ ត្រូវពួកអ្នកវិភាគបកស្រាយថាជាលេសសម្រាប់បិទវែបសៃត៏ណា ដែលអាជ្ញាធរមិនពេញចិត្ត។ ទាក់ទងនឹងសាច់រឿងដែលមានកាសែតអាល្លឺម៉ង់ Suddeutsche Zeitung ទើបបញ្ចេញ យោបល់ថា គ្រាន់តែក្នុងរយៈពេលជាង២ខែសោះ ក្រោយពីលោកពូទីនវិលត្រឡប់ទៅកាន់អំណាចកំពូលនៅ វិមានក្រេមឡាំងវិញរាល់អ្វីៗជាសេរីនិយមដែលចេះសម្រេចបានដោយលោកមេដវេដេវ ក្នុងឋានៈជាអ្នក”ខំខ្នះខ្នែងយ៉ាងស្ងៀមស្ងាត់” ស្រាប់តែរលាយបាត់ទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ