អាចម៍ផ្កាយធ្លាក់ក្បែរភពផែនដី តែគ្មានអ្វីគួរឱ្យភ័យស្លន់ស្លោ
អាចម៍ផ្កាយទំហំប៉ុនពាក់កណ្តាលតារាងបាល់ទាត់ នឹងធ្លាក់បញ្ឆិតលើផែនដីយ៉ាងកៀកបំផុតមិនធ្លាប់មាន នៅថ្ងៃទី ១៥កុម្ភៈឆ្នាំ២០១៣ ខាងមុខនេះ ដោយគ្មានបង្កគ្រោះថ្នាក់ ឬបុកទង្គិចភពផែនដីទេ។ នេះជាការធានាអះអាងរបស់ភ្នាក់ងារអវកាសអាមេរិក Nasa។ ប៉ុន្មានឆ្នាំចុងក្រោយនេះ វិទ្យាសាស្ត្រកាន់តែជឿនលឿនខ្លាំង អាចចាប់ និងដឹងបានថាមានវត្ថុផ្សេងៗដាច់រប៉ាត់រប៉ាយក្នុងអវកាស តែអាចផ្តល់គ្រោះមហន្តរាយដល់ភពផែនដី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
មានអង្កត់ផ្ចិត ប្រវែង៤៥ម៉ែត្រ ទម្ងន់ ១៣៥០០០តោន និងមានរហ័សនាម ២០១២DA១៤ អាចម៍ផ្កាយមួយដុំនេះ ជាវត្ថុធំជាងបំផុត ដែលនឹងធ្លាក់វិះចំលើភពផែនដី និងដែលអ្នកវិទ្យាសាស្ត្រមិនធ្លាប់គិតឃើញពីមុនមកសោះ។ អាចម៍ផ្កាយ ២០១២DA១៤នេះ នឹងរំកិលខ្លួនមកនៅត្រឹមចម្ងាយប្រមាណតែ ២៧៧០០គីឡូម៉ែត្រពីផែនដី (មួយភាគ១០នៃចម្ងាយពីផែនដីទៅព្រះចន្ទ) នៅថ្ងៃទី១៥កុម្ភៈ ឆ្នាំ២០១៣ វេលាម៉ោង ១៩ និង ២៤នាទី ម៉ោងសកល ត្រង់ចំណុចភាគខាងកើតមហាសមុទ្ទឥណ្ឌា កាត់ទទឹងនឹងឆ្នេរសមុទ្ទស៊ូមាត្រា ប្រទេសឥណ្ឌូនេស៊ី ក្នុងល្បឿន៧,៨គ.ម. ក្នុងមួយវិនាទី។
ជាទូទៅ អាចម៍ផ្កាយទំហំប្រហាក់ប្រហែលនឹង ២០១២DA១៤ តែងដាច់ធ្លាក់មកជិតភពផែនដី ជាមធ្យម រាល់៤០ឆ្នាំម្តង និងអាចបង្កជាគ្រោះទៅបុកទង្គិចផែនដី រាល់ ១២០០ឆ្នាំម្តង។ នេះបើតាមការគូសបញ្ជាក់បន្ថែមរបស់អ្នកឯកទេសNasa ដោយពន្យល់បំភ្លឺថា អាចម៍ផ្កាយមួយនេះ ហោះជិតផែនដីខ្លាំងជាពិសេសតែម្តង (ជិតជាង១០ដងបើប្រៀបទៅនឹងចម្ងាយពីភពផែនដីទៅព្រះចន្ទ) ប៉ុន្តែអ្នកស្រាវជ្រាវយល់យ៉ាងច្បាស់អំពីដំណើរហោះហើររបស់វា និងសន្និដ្ឋានបានថា គ្មានគ្រោះបុកផែនដីនៅថ្ងៃទី១៥កុម្ភៈខាងមុខនេះឡើយ។ ផ្ទុយទៅវិញ បើទោះជាបីមានអង្កត់ផ្ចិតតែ៤៥ម៉ែត្រក៏ពិតមែន តែបើធ្លាក់លើដីវិញ នោះនឹងអាចបង្កមហន្តរាយយ៉ាងខ្លាំងដូចកាលនៅឆ្នាំ១៩០៨ នៅស៊ីបេរី ពោលគឺដូចមានការទម្លាក់គ្រាប់បែកទម្ងន់២,៤មេហ្កាតោន ឬច្រើនជាងសិបរយដងនៃគ្រោះមហន្តរាយគ្រាប់បែកបរមាណូនៅអ៊ីរ៉ូស្ហ៊ីម៉ា ...
ចំពោះអ្នកមានជំនក់ចិត្តផ្នែកមើលផ្កាយ មើលតារា នៅថ្ងៃទី១៥កុម្ភៈ គេនឹងអាចមើលឃើញអាចម៍ផ្កាយ ២០១២DA១៤ តាមរយៈតេឡេស្កុប ពីតំបន់អឺរ៉ុបខាងកើត ពីប្រទេសអូស្ត្រាលី និងពីទ្វីបអាស៊ី ជាពន្លឺមួយរសាត់លើមេឃ ក្នុងពេលរាត្រី។
គេត្រូវរង់ចាំយូរទៀត រហូតដល់ឆ្នាំ២០៤៦ ទើបអាចឃើញមានអាចម៍ផ្កាយដែលនឹងហោះមកកៀកផែនដីម្តងទៀត។ កៀកប្រមាណជា ១ពាន់លានគីឡូម៉ែត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ