តារាវិទូអឺរ៉ុបរកឃើញប្រព័ន្ធផ្កាយថ្មី ស្រដៀងនឹងប្រព័ន្ធព្រះអាទិត្យ
ក្រុមអ្នកស្រាវជ្រាវនៃអង្គការតារាវិទូអឺរ៉ុបESO (អាល្លឺម៉ង់ -បារាំង - បែលហ្សិក - អង់គ្លេស- ហូឡង់ និងស៊ុយអែត) ដែលមានទីស្នាក់ការនៅប្រទេសស្វីស បានចេញប្រកាសរកឃើញប្រព័ន្ធផ្កាយថ្មី អាចប្រៀបប្រដូចនឹងប្រព័ន្ធព្រះអាទិត្យបាន។ មានយ៉ាងហោចណាស់ភពចំនួន៥ ដែលមានលក្ខណៈស្រដៀងនឹងភព Neptune វិលជុំវិញ ជារណប នៅក្នុងប្រព័ន្ធផ្កាយថ្មីនេះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អៀង សុខម៉ិញ
មានឈ្មោះ HD 10180 ប្រព័ន្ធផ្កាយថ្មី អាចប្រៀបប្រដូចទៅនឹងប្រព័ន្ធព្រះអាទិត្យសព្វថ្ងៃនេះបាន ព្រោះមានភពចំនួន យ៉ាងហោចណាស់ ៥ជារណប ដែលរកឃើញច្បាស់ និងមានសំណៅបញ្ជាក់ថា អាចមានភពពីរផ្សេងទៀត នៅក្នុងប្រព័ន្ធផ្កាយថ្មីនេះ។ ដូច្នេះប្រសិនបើអ្វីដែលអ្នកស្រាវជ្រាវរកឃើញជាការពិត ប្រព័ន្ធភពថ្មីនេះ មានភពរណប តិចជាងប្រព័ន្ធព្រះអាទិត្យយើងតែមួយប៉ុណ្ណោះ។
ដោយប្រើឧបករណ៍ដ៏ទំនើប ថតចាប់រូបតាមរយៈពន្លឺ HARPS នៅប្រទេសឈីលី តារាវិទូបានរកឃើញបន្ថែមទៀតថា ប្រព័ន្ធវិលជុំវិញព្រះអាទិត្យថ្មី HD10180នេះ ស្ថិតនៅចម្ងាយ ១២៧ឆ្នាំពន្លឺ ពីភពផែនដីយើង។ នេះជាលើកទីមួយហើយ ដែលអ្នកស្រាវជ្រាវបានរកឃើញ មានភពច្រើន ដែលទំនងជាវិលរណបជុំវិញផ្កាយមួយ និងជាពិសេសភពទាំង៥នោះ មានមាសមាឌប៉ិនភពNeptune មួយទៀតធំប្រហាក់ប្រហែលនឹងភពសៅរ៍។ ចំណែកភពដែលតូចជាងគេក្នុងប្រព័ន្ធថ្មីនេះ និងដែលស្ថិតនៅជិតផ្កាយ HD10180 ដូចចម្ងាយពីភពផែនដីទៅព្រះអាទិត្យដែរនោះ (ឆ្ងាយជាង២%) មានទំហំមាសមាឌធំជាងភពផែនដី តែ១,៤ដងប៉ុណ្ណោះ។
ម្យ៉ាងវិញទៀត អ្នកស្រាវជ្រាវមានភស្តុតាងជាច្រើនបញ្ជាក់ថា គម្លាតពីផ្កាយ HD10180 ទៅភពនីមួយៗ មានលក្ខណៈថេរ ដូចអ្វីដែលមាននៅក្នុងប្រព័ន្ធព្រះអាទិត្យយើងដូច្នោះ។
ការរកឃើញថ្មីនេះ ត្រូវបានគេលើកយកមកបង្ហាញនៅក្នុងសន្និសីទអន្តរជាតិ នៅប្រទេសបារាំង កាលពីថ្ងៃអង្គារ។ ចំណែកក្រុមភ្នាក់ងារតារាសាស្ត្រ និងអវកាសអាមេរិក NASA នឹងធ្វើសន្និសីទកាសែតមួយនៅរសៀលថ្ងៃនេះ ដើម្បីជូនដំណឹងពីការរកឃើញប្រព័ន្ធភពថ្មីនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ