កែវយឹតតារាសាស្ត្រមិនធ្លាប់មាន សម្រាប់សិក្សាអំពីចក្រវាឡ។
កែវយឹតនេះ ដែលនឹងដើរតួ ជា “ ឱលោកនដ្ឋានតារាសាស្ត្រអន្តរជាតិ “ ប្រចាំ នៅអវកាស មានឈ្មោះថា RadioAstron។ វាបានត្រូវបង្ហោះ ចេញពីផែនដីទៅព្រឹកថ្ងៃចន្ទនេះ វេលាម៉ោង ៦និង៣១នាទីដោយកាំជ្រួចពាំផ្ទុក ឈ្មោះ Zenit-2SB ផលិតរួមគ្នា ដោយ រុស្ស៊ីនិង អ៊ុយក្រែន។ ពួកអ្នកប្រាជ្ញពិភពលោកទាំងមូល នាំគ្នារង់ចាំទៅហើយលទ្ធផលនៃការស្រាវជ្រាវធ្វើដោយកែវយឹត RadioAstron ដែលជាផ្លែផ្កានៃ ពួកអ្នកឯកទេស២០ប្រទេសឯណោះ។
ចុះផ្សាយនៅថ្ងៃ៖
ស្តាប់ - ០២:២៣
រំលង៨នាទីនិង៥វិនាទីមក កាំជ្រួចពាំផ្ទុកនោះ បានច្រាន ផ្កាយរណបសិប្បនិមិ្មត ដែល បំពាក់ទៅដោយ កែវយឹតផ្ទាល់ឲ្យវាឆ្លងចូលមែនពិត ទៅក្នុងតារាវិថីដែលវាត្រូវបន្តហោះទៅ។
លុះទៅដល់កំពស់ ៣៣៥.០០០គ.ម. ពីផែនដីផ្កាយរណបនោះនឹងព្រលែងចេញមក គឺ កែវយឹត ដែលមានរាងជាផ្កាផ្សំឡើងពី២៧ត្របករបស់វា ហើយកញ្ចក់វា មានវិជ្ឈមាត្រដល់ទៅ ១០ម៉ែត្រឯណោះ។
សម្រាប់ជាការប្រៀបធៀបកែវយឹតអាមេរិកាំង Hubble ដែលបានត្រូវបង្ហោះទៅក្នុងឆ្នាំ១៩៩០ រួចដែលនឹងដំណើរការរហូតដល់ឆ្នាំ២០២០ មានវិជ្ឈមាត្រតែ ២ម៉ែត្រ៤តឹក ហោះនៅកំពស់តែ ៥៣៩គ.ម. ហើយចំណាយពេលតែ១ម៉ោង៣៦នាទីដើម្បីហោះព័ទ្ធបានមួយជុំ ជុំវិញផែនដី។
ចំណែកកែវយឹតថ្មីឈ្មោះ RadioAstron ដែលនឹងស្ថិតនៅប្រចាំការ ក្នុងអវកាសដល់ទៅកំពស់ ៣៣៥.០០០គ.ម. គឺត្រូវ ស៊ីពេលដល់ទៅ ជិត១០ថ្ងៃ១០យប់ ទំរាំហោះបាន១ជុំ ជុំវិញផែនដី។ កំពស់ខ្ពស់នេះ ដែលនៅចម្ងាយតែ ៥០.០០០ឝ.ម.ពីព្រះចន្ទ ជាផ្កាយរណបធម្មជាតិស្រាប់របស់ ភពផែនដីយើងគឺអនុញ្ញាតឲ្យប្រើការបត់បែននៃតារាវិថី របស់លោកខែ សម្រាប់កែវយឹត ទទួលបានរូបភាពកាន់តែច្បាស់ អំពីទីដៅនៃការស្រាវជ្រាវ ក្នុងចក្រវាឡ។
មិនតែប៉ុណ្ណោះ ក្នុងឋានៈជា “ ឱលោកនដ្ឋានតារាសាស្ត្រអន្តរជាតិ “ ប្រចាំការនៅកំពស់ខ្ពស់ នៃអវកាស កែវយឹតមានវិជ្ឈមាត្រដល់១០ម៉ែត្រនោះ បំពាក់ទៅដោយសមត្ថភាពមើលធ្លុះ ឃើញភពឆ្ងាយៗ ក្នុងចក្រវាឡ ជាពិសេសគឺឃើញរបស់ដែលហៅថា “ មហាប្រហោងខ្មៅ “ ដែលកម្លាំងស្រូបរបស់វាខ្លាំងទាល់តែគ្មានអ្វីមួយ អាចដកខ្លួនចេញរួចឡើយសូម្បីតែពន្លឺក៏ទេដែរ។ មហាប្រហោងខ្មៅបែបនេះ កកើតឡើង គឺនៅក្នុងវង្វង់កណ្តាលនៃកញ្ចុំផ្កាយដែលសកម្ម ដូចយ៉ាង “ កញ្ចុំផ្កាយគន្លងដំរីស “ ដែលមានមាឌ ដល់ទៅ ១០០លានដង ធំជាង ព្រះអាទិត្យ។
ទិន្នន័យទទួលបានដោយ កែវយឹតអន្តរជាតិ RadioAstron ពីការស្រាវជ្រាវ អំពីភពប្លែកៗ ក្នុងចក្រវាឡនឹងត្រូវបញ្ជូនមកផែនដី ដោយល្បឿន ១២៨ Megabit ក្នុង១វិនាទី ហើយសញ្ញាវានឹងត្រូវចាប់យកដោយស្ថានីយ៣ កន្លែងគឺស្ថានីយឈ្មោះ Pouchkino នៅជាយក្រុងម៉ូស្គូ , ស្ថានីយ ឈ្មោះ Green Bank នៅស.រ.អា. និងស្ថានីយឈ្មោះ Tidbinbilla នៅអូស្ត្រាលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ