សាកសពអ្នកទោសរកស៊ីគ្រឿងញៀនអូស្ត្រាលីបានបញ្ជូនដល់អូស្ត្រាលី
បុរសអូស្ត្រាលីពីរនាក់ ដែលត្រូវបានសម្លាប់នៅក្នុងប្រទេសឥណ្ឌូនេស៊ី ត្រូវបានបញ្ជូនទៅកាន់ប្រទេសកំណើតរបស់ខ្លួនវិញហើយ ក្នុងថ្ងៃសៅរ៍នេះ តាមរយៈជើងយន្តហោះមួយ ហើយដែលគេជឿថាសាកសពទាំងពីរត្រូវបញ្ជូនទៅជាមួយគ្នា។ ការស្លាប់ជនជាតិអូស្ត្រាលីទាំងពីរនាក់នេះ ត្រូវបាននាយករដ្ឋមន្ត្រីអូស្ត្រាលី លោក Tony Abbott ស្តីបន្ទោសថាជារឿង ដែលឃោរឃៅបំផុត និងជារឿងដែលមិនចាំបាច់ត្រូវធ្វើ។
ចុះផ្សាយនៅថ្ងៃ៖
ស្តាប់ - ០១:៤៨
លោក Andrew Chan អាយុ ៣១ឆ្នាំ និងលោក Myuran Sukumaran អាយុ៣៤ ឆ្នាំ ត្រូវបានសម្លាប់ដោយបាញ់នឹងកាំភ្លើង កាលពីថ្ងៃពុធ។ ការសម្លាប់នេះ បានធ្វើឡើងក្រោមបទចោទថា ពួកគេទាំងពីរនាក់នេះ បាននាំគ្រឿងញៀនប្រភេទហេរ៉ូអ៊ីនទៅកាន់ប្រទេសអូស្ត្រាលី ពីកោះបាលី ដែនដីប្រទេសឥណ្ឌូនេស៊ី។ ការកាត់ទោសនេះ នៅតែធ្វើឡើង បើទោះបីជាមានការសូមអង្វរឲ្យលើកលែងទោសប្រហារជីវិតពីអន្តរជាតិក៏ដោយ។
ប្រព័ន្ធផ្សព្វផ្សាយ ABC របស់អូស្ត្រាលី បានរាយការណ៍ថា យន្តហោះ ដែលដឹកសាកសពរបស់អ្នកទោសទាំងពីរនាក់នោះ បានមកដល់ទីក្រុងស៊ីននី ក្នុងព្រឹកថ្ងៃសៅរ៍នេះ ហើយក្នុងយន្តហោះនោះក៏មានសាច់ញាតិនៃសពលោក Sukumaran រួមដំណើរក្នុងយន្តហោះដែរ។ យ៉ាងណាមិញ បើតាមនាយកដ្ឋានកិច្ចការបរទេស និងពាណិជ្ជកម្ម របស់អូស្ត្រាលី មិនអាចបញ្ជាក់បានទេថា ក្នុងយន្តហោះនោះពិតជាមានសពលោក Chan និងលោក Sukumaran ឬយ៉ាងណា។
ម្តាយរបស់លោក Chan មិនបានរួមដំណើរទេ ក្នុងការដឹកសពលោក Chan មកកាន់អូស្ត្រាលីវិញនោះ ដោយសារតែជើងយន្តហោះ ដែលធ្វើមាតុភូមិនិវត្តសពលោក Chan ត្រូវបានពន្យារពេលរហូតមកដល់ថ្ងៃសៅរ៍នេះ ហើយពួកគាត់បានវិលត្រឡប់មកកាន់អូស្ត្រាលីវិញ កាលពីថ្ងៃសុក្រម្សិលមិញ។
លោក Chan និង លោក Sukumaran គឺជាមនុស្សពីរនាក់ ក្នុងចំណោមអ្នកទោសបរទេស ៧នាក់ផ្សេងទៀត ដែលត្រូវបានប្រហារជីវិតកាលពីព្រឹកថ្ងៃពុធ ទី២៩ មេសា កន្លងទៅនេះ។ ពួកគេទាំងពីរនាក់បានចំណាយពេលប្រមាណ១០ឆ្នាំ នៅក្នុងពន្ធនាគារ ដោយសារតែពួកគេត្រូវបានចោទប្រកាន់ថាជាមេក្រុមជួញដូរថ្នាំញៀន ដែលគេស្គាល់ឈ្មោះថា Bali Nine។
ចំណែកឯ នាយករដ្ឋមន្ត្រីអូស្ត្រាលីលោក Abbott បានរិះគន់ថាការប្រហារជីវិតបរុសទាំងពីរនាក់នេះ គឺជាស្រមោលបាំងបិទ ទំនាក់ទំនងរវាងអូស្ត្រាលី និងឥណ្ឌូនេស៊ី ហើយលោក Abbott បានចាត់ទុកថានេះ គឺជារឿង ដែលឃោឃៅបំផុតនិងជារឿងដែលមិនចាំបាច់ត្រូវធ្វើ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ