BBCបើកផ្សព្វផ្សាយពត៌មានជាភាសាថៃនៅលើទំព័របណ្តាញសង្គម
ទូរទស្សន៍BBC បានឲ្យដឹងកាលពីថ្ងៃពុធម្សិលមិញថា នឹងចាប់ផ្តើមផ្សព្វផ្សាយពត៌មានជាភាសាថៃនៅលើទំព័របណ្តាញសង្គមរបស់ខ្លួនដូចជា Facebookជាដើម។ អ្នកនាំពាក្យរបស់ទូរទស្សន៍ BBC ថាការធ្វើបែបនេះ គឺដើម្បីអាចផ្តល់ដល់ប្រជាជនថៃ នូវពត៌មានមួយដែលអាចទុកចិត្តបាន ហើយមិនលម្អៀង ស្របពេលដែលរដ្ឋាភិបាលយោធាថៃបាន និងកំពុងព្យាយាមរឹតបន្តឹងសិទ្ធសេរីភាពសារពត៌មាន និងការបញ្ចេញមតិនៅក្នុងប្រទេសថៃ។
ចុះផ្សាយនៅថ្ងៃ៖
ស្តាប់ - ០២:២០
ចាប់តាំងពីថ្ងៃព្រហស្បតិ៍នេះទៅ ទូរទស្សន៍ BBC នឹងបង្កើតទំព័រ Facebook មួយដើម្បីផ្សព្វផ្សាយសាកល្បងរយៈពេល៣ខែ នូវពត៌មានជាភាសាថៃ និងអង់គ្លេស។ លោកស្រី លីល្យ៉ាន លែនដឺរ៍ អ្នកទទួលបន្ទុកផ្នែកភាសារបស់ស្ថានីយ៍ទូរទស្សន៍ BBC បានបញ្ជាក់ថា គោលការណ៍គ្រឹះនៃសេវាពត៌មានពិភពលោករបស់ BBC គឺផ្គត់ផ្គង់ពត៌មានដែលពិតប្រាកដ និង មិនលម្អៀង ទៅតាមបណ្តាប្រទេសផ្សេងៗ ដែលសេវាពត៌មានសុក្រិត្យបែបនេះ នៅមានការខ្វះខាត។ លោកស្រីបន្តថា ពេលនេះជាឱកាសដ៏ល្អណាស់ក្នុងការសាកល្បងការផ្សាយជាភាសាថៃ និងអង់គ្លេសដើម្បីឲ្យប្រជាជនថៃបានទទួលនូវពត៌មានសុក្រិត្យច្បាស់លាស់។ គួររំលឹកដែរថា ទូរទស្សន៍ BBCធ្លាប់មានកម្មវិធីផ្សាយជាភាសាថៃមួយដែរ ដែលបានដំណើរការអស់រយៈពេល៤០ឆ្នាំ ហើយត្រូវបានបិទទៅវិញនៅឆ្នាំ២០០៦។
ចាប់តាំងពីការឡើងកាន់អំណាចក្រោយការធ្វើរដ្ឋប្រហារយោធា នៅថ្ងៃទី២២ ឧសភា រដ្ឋាភិបាលយោធាថៃ បានដាក់ព្យួររដ្ឋធម្មនុញ្ញ ហើយបានរឹតបន្តឹងសេរីភាពសាធារណៈជាច្រើន ដូចជាការហាមឃាត់មិនឲ្យមានការជួបជុំគ្នា ហាមមិនឲ្យធ្វើបាតុកម្មឬរិះគន់ការធ្វើរដ្ឋប្រហារជាដើម។ ក្រុមយោធាថែមទាំងបានបង្កើតគណៈកម្មការ៥ដើម្បីត្រួតពិនិត្យយ៉ាងតឹងរឹង ទៅលើបណ្តាញពត៌មានក្នុងស្រុក បណ្តាញពត៌មានបរទេស និងបណ្តាញពត៌មានសង្គមដូចជា Facebookជាដើម។ ភ្លាមៗបន្ទាប់ពីបានធ្វើរដ្ឋប្រហារ រដ្ឋាភិបាលយោធាបានផ្អាកការផ្សាយជាច្រើនថ្ងៃ របស់ស្ថានីយ៍ទូរទស្សន៍បរទេសជាច្រើនប៉ុស្ត៍នៅប្រទេសថៃ។ ក្នុងនោះក៏មាន ទូរទស្សន៍ BBCផងដែរ។
យ៉ាងណាមិញ តាមសម្តីអ្នកនាំពាក្យរដ្ឋាភិបាលយោធាថៃ លោកថារដ្ឋាភិបាលគ្មានអ្វីទៅប្រឆាំងនឹងការផ្សព្វផ្សាយពត៌មានរបស់ទូរទស្សន៍BBCទេមិនថាជាភាសាថៃ ឬ អង់គ្លេសក៏ដោយ ដ៏រាបណាពត៌មានដែលផ្សព្វផ្សាយទៅនោះ វាមិនមែនជាពត៌មានអុជអាល បញ្ឆេះកំហឹង និងបង្កអស្ថិរភាពសង្គម។ លោកបញ្ជាក់ទៀតថា រដ្ឋាភិបាលថៃពេញចិត្តជានិច្ច ក្នុងការជំរុញឲ្យគ្រប់គ្នាទាំងអស់ យល់ដឹងឲ្យបានច្បាស់អំពីស្ថានភាពជាក់ស្តែងក្នុងប្រទេសថៃ។
គួរបញ្ជាក់ផងដែរថា ក្រុមយោធាថៃបានធ្វើរដ្ឋប្រហារទំលាក់លោកស្រី យីងឡាក់ ស៊ីណាវ៉ាត្រា ចេញពីតំណែង ហើយបានព្យួររដ្ឋធម្មនុញ្ញ ដោយអះអាងថាដើម្បីធ្វើការរៀបចំស្រុកទេសឡើងវិញ។ តាមការវិភាគ វិបត្តិនយោបាយនេះ មានការទាក់ទងយ៉ាងប្រកដជាមួយនិងចេតនាចង់កម្ចាត់ក្រុមគ្រូសាររបស់លោក ថាក់ស៊ីន ស៊ីណាវ៉ាត្រា ចេញពីឆាកនយោបាយថៃ។ វិបត្តិរ៉ាំរ៉ៃនេះ បានធ្វើឲ្យប្រជាជនថៃបែកចេញជាពីរ គឺម្ខាងក្រុមអ្នកគាំទ្រពួកយោធា ឯម្ខាងទៀតក្រុមអ្នកគាំទ្រលោកថាក់ស៊ីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ