តុលាការថៃផ្តន្ទាទោសមនុស្សម្នាក់ពីបទធ្វើបាតុកម្មប្រឆាំងនិងរដ្ឋប្រហារ
តុលាការថៃបានកាត់ទោស ជា លើកទីមួយនៅថ្ងៃព្រហស្បតិ៍ ទី៣ កក្កដា នេះ ទៅលើ សកម្មជននយោបាយម្នាក់ដែលបានចូលរួមធ្វើបាតុកម្មប្រឆាំងនឹងការធ្វើរដ្ឋប្រហាររបស់ក្រុមយោធា។ ការកាត់ទោសនេះ ហាក់ដូចជាការដាក់បំរាម មិនឲ្យនរណាម្នាក់ហ៊ានងើបឡើងប្រឆាំង នឹងការកាន់កាប់អំណាចរបស់របបយោធាតទៅទៀត។
ចុះផ្សាយនៅថ្ងៃ៖
ស្តាប់ - ០១:៣១
លោកវីរ៉ាយុទ្ធ កុងកាណាថាន អាយុ៤៩ឆ្នាំ ត្រូវបានក្រុមយោធាចាប់ខ្លួនមួយថ្ងៃក្រោយការធ្វើរដ្ឋប្រហារ។ លោកត្រូវបានអាជ្ញាធរចោទថាបានរំលោភលើច្បាប់ ដែលហាមឃាត់មិនឲ្យជួបប្រជុំគ្នាចាប់ពី៥នាក់ឡើងទៅ។ នៅថ្ងៃព្រហស្បតិ៍ ទី៣ កក្កដា ម្សិលមិញនេះ តុលាការព្រហ្មទណ្ឌថៃបានសម្រេចសាលក្រម ផ្តន្ទាទោសលោក២ខែដែលជាទោសព្យួរ ហើយបន្ថយឲ្យនៅសល់មួយខែដោយសារគាត់បានទទួលស្គាល់ទង្វើរបស់គាត់។
ទោះបីជាយ៉ាងណា លោកវីរ៉ាយុទ្ធ កុងកាណាថាន បានថ្លែងឲ្យដឹងថា លោកនឹងមិនបញ្ឈប់សកម្មភាពនយោបាយរបស់លោកឡើយ។ លោកអះអាងថាលោកគឺជាអ្នកស្រលាញ់ប្រជាធិបតេយ្យ ដូច្នេះលោកនឹងតស៊ូជានិច្ច។ ប៉ុន្តែអំណេះតទៅ លោកត្រូវតែមានការប្រយ័ត្នប្រយែង ចៀសវាងការចាប់ខ្លួនសាជាថ្មី។
អង្គការAmnesty International បានឲ្យដឹងថា ការកាត់ទោសនេះ វានឹងជំរុញ បរិយាកាសអ័ព្ទអួ និងភ័យខ្លាចនៅក្នុងប្រទេសថៃ ឲ្យមានកាន់តែខ្លាំងឡើង។ សាលក្រមរបស់តុលាការនាពេលនេះ ប្រៀបបាននឹងការជូនដំណឹង គំរាមដល់បណ្តាសកម្មជនដែលប្រឆាំងនឹងរបបយោធាទាំងអស់ ថាត្រូវឈប់ធ្វើសកម្មភាពរបស់ពួកគេ។
គួរបញ្ជាក់ផងដែរថា ក្រុមយោធាថៃ បានធ្វើរដ្ឋប្រហារកាលពី ថ្ងៃទី២២ឧសភា ហើយបានព្យួររដ្ឋធម្មនុញ្ញ ដោយយកលេសថា ដើម្បីរៀបចំប្រទេសឡើងវិញបន្ទាប់ពីមានបាតុកម្មរ៉ាំរ៉ៃអស់រយៈពេលជាង៧ខែកន្លងមក។ បន្ទាប់ពីបានកាន់កាប់អំណាច របបយោធាបានធ្វើការរឹតបន្តឹងសិទ្ធិសេរីភាពរបស់ប្រជាពលរដ្ឋ ដូចជាសិទ្ធិក្នុងការជួបជុំគ្នាជាដើម។ តែទោះជាយ៉ាងនេះក្តី គេឃើញមានការរៀបចំសកម្មភាពប្រឆាំងរបស់សកម្មជនក៏ដូចជាប្រជាជនទូទៅ ក្រោមរូបភាពផ្សេងៗជាបន្តបន្ទាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ