ការផ្ទៀងផ្ទាត់នៅមណ្ឌលបាត់ដំបង៖ខុសតួលេខតែ១សន្លឹកឆ្នោតប៉ុណ្ណោះសម្រាប់គណបក្សធំៗទាំង២
ការពិនិត្យផ្ទៀងផ្ទាត់កញ្ចប់សុវត្ថិភាព"ក" នៅ ៨ ការិយាល័យ នៅខេត្តបាត់ដំបង បានចំណាយពេលប្រហែល ២ ម៉ោងប៉ុណ្ណោះ។ ការពិនិត្យផ្ទៀងផ្ទាត់កញ្ចប់សុវត្ថិភាព"ក" នៅព្រឹកថ្ងៃពុធនេះ ដូចនីតិវិធីពិនិត្យផ្ទៀងផ្ទាត់កញ្ចប់សុវត្ថិភាពបោះឆ្នោតលើកមុន គឺការពិនិត្យផ្ទៀងផ្ទាត់សំឡេងឆ្នោតនោះ ត្រូវបានបើកធ្វើជាសាធារណៈ។ តំណាងក្រុមប្រឹក្សាធម្មនុញ្ញ ៣ រូប បានអញ្ជើញចូលរួម ព្រមទាំងតំណាងគ.ជ.ប តំណាងគណបក្សនយោបាយ និងអ្នកកាសែត បានពិនិត្យផ្ទៀងផ្ទាត់ការកត់ត្រាសំឡេងឆ្នោត តាមទម្រង់ ១១០២ ១១០៨ និងផ្ទាំងក្រដាសធំ។ ជាលទ្ធផល ទូទាំង ៨ ការិយាល័យនោះ មានការស្រង់ លើសសំឡេងឆ្នោតរបស់គណបក្សប្រជាជនកម្ពុជា ចំនួន ១ សំឡេង។ រីឯគណបក្សសង្គ្រោះជាតិ ក៏ត្រូវគេស្រង់សំឡេងលើស ១ សំឡេងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៨
បន្ទាប់ពីរុករកកញ្ចប់សុវត្ថិភាព"ក" អស់ពេលជាង ១ ម៉ោង ចាប់ពីម៉ោង ៨ ព្រឹកមិញ ក្រុមការងាររបស់គ.ជ.ប បានបើកកញ្ចប់សុវត្ថិភាព"ក" នៅ ៨ ការិយាល័យបោះឆ្នោត ក្នុងក្រុងបាត់ដំបង ខេត្តបាត់ដំបង ដើម្បីពិនិត្យផ្ទៀងផ្ទាត់ ការកត់ត្រាតួលេខសំឡេងឆ្នោតរបស់គណបក្សនយោបាយទាំង៨ ឡើងវិញ។
លទ្ធផលពិនិត្យផ្ទៀងផ្ទាត់នោះបានត្រូវប្រកាស នៅចំពោះមុខតំណាងគណបក្សនយោបាយ សមាជិកក្រុមប្រឹក្សាធម្មនុញ្ញ ៣ រូប តំណាងអ្នកសង្កេតការណ៍ និងក្រុមអ្នកកាសែត។ ក្នុងការិយាល័យបោះឆ្នោតទាំង ៨ នោះ មាន ២ ការិយាល័យ ដែលទម្រង់ ១១០៨ ជាតារាងកត់ត្រាសំឡេងឆ្នោត តាមការិយាល័យបោះឆ្នោត និងរាប់សន្លឹកឆ្នោត មិនមានសរសេរទិន្នន័យ។
ក្នុងនោះ ក៏មានតែ ២ ការិយាល័យបោះឆ្នោតដែរ ដែលការចំលងតួលេខសំឡេងឆ្នោតខុសគ្នា។ ទី១ នៅការិយាល័យបោះឆ្នោតលេខ ០១៨៨ គឺសំឡេងគណបក្សប្រជាជនកម្ពុជា ទទួលបានតែ ១៥៤ តែក្នុងទម្រង់ ១១០៨ ត្រូវបានគេដាក់ថា ១៥៥។ ចំណែកនៅការិយាល័យបោះឆ្នោត លេខ ០២០៤ គឺគណបក្សសង្គ្រោះជាតិ ទទួលបានសំឡេងត្រឹមតែ ២៧៤ តែត្រូវបានគេចំលងដាក់ក្នុងទម្រង់ ១១០២ ដល់ទៅ ២៧៥ សំឡេង។
ក្នុងពេលពិនិត្យផ្ទៀងផ្ទាត់នោះ តំណាងគណបក្សសង្គ្រោះជាតិ លោក គួយ ប៊ុនរឿន បានទទូចស្នើសុំឲ្យគ.ជ.ប បិទផ្សាយនូវចំនួនសន្លឹកឆ្នោត តាមការិយាល័យបោះឆ្នោត និងរាប់សន្លឹកឆ្នោត។ តែមិនត្រូវបានក្រុមប្រឹក្សាធម្មនុញ្ញ និងគ.ជ.ប យល់ព្រមភ្លាមៗទេ។
យ៉ាងណាក៏ដោយ ក្រោយពីពិនិត្យផ្ទៀងផ្ទាត់តាមការិយាល័យមួយៗ កំណត់ហេតុនៃការរាប់សន្លឹកឆ្នោត ទម្រង់ ១១០២ តារាងកត់ត្រាសំឡេងឆ្នោត តាមការិយាល័យបោះឆ្នោត និងរាប់សន្លឹកឆ្នោត ទម្រង់ ១១០៨ ត្រូវបានថតចំលងចែកអ្នកកាសែតភ្លាម។ រីឯក្រដាសផ្ទាំងធំ ដែលជាតារាងរាប់សំឡេងឆ្នោត ក៏ត្រូវបានគេបិទលើក្តារខៀនផងដែរ។
លោក គួយ ប៊ុនរឿន បានកត់សម្គាល់ដូចអ្នកកាសែត និងអ្នកសង្កេតការណ៍ដែរថា បច្ចេកទេសវេចខ្ចប់នូវកញ្ចប់សុវត្ថិភាព "ក" ទាំង ៨ ការិយាល័យបោះឆ្នោត នៅខេត្តបាត់ដំបង ដែលយកមកពិនិត្យផ្ទៀងផ្ទាត់លើកនេះ បានល្អប្រសើរជាងលើកមុន ពោលគឺមិនមានការបើកចំហរទេ។ រីឯភាពមិនប្រក្រតីក៏កើតមានតិចតួចជាងការពិនិត្យនៅខេត្តក្រចេះ។
តំណាងគណបក្សសង្គ្រោះជាតិ លោក គួយ ប៊ុនរឿន បានបញ្ជាក់ថា នៅខេត្តបាត់ដំបង គណបក្សសង្គ្រោះជាតិ បានប្តឹងតវ៉ា ចំពោះ ២២៣ ការិយាល័យបោះឆ្នោត។ តែក្រុមប្រឹក្សាធម្មនុញ្ញ សម្រេចឲ្យពិនិត្យផ្ទៀងផ្ទាត់តែ ៨ ការិយាល័យប៉ុណ្ណោះ។
ចំណែកតំណាងក្រុមប្រឹក្សាធម្មនុញ្ញ លោក អ៊ុត ឈន សមាជិក និងជាអ្នកនាំពាក្យ បានប្រាប់អ្នកកាសែតថា កំណត់ហេតុនៃការពិនិត្យកញ្ចប់សុវត្ថិភាព នៃការបោះឆ្នោត នៅ ៨ ការិយាល័យបោះឆ្នោត នឹងត្រូវក្រុមប្រឹក្សាធម្មនុញ្ញ យកទៅប្រជុំពិនិត្យ មុននឹងសម្រេចបើកសវនាការ ដែលមិនទាន់កំណត់ថ្ងៃ។
លោក អ៊ុត ឈន អះអាងថា ក្រុមប្រឹក្សាធម្មនុញ្ញ នឹងដោះស្រាយបណ្តឹងបដិសេធលទ្ធផលបោះឆ្នោត ដែលប្តឹងដោយគណបក្សសង្គ្រោះជាតិ ទាំង ១៥៥ បណ្តឹង ធ្វើឲ្យបានមុនថ្ងៃដែលគ.ជ.ប ត្រូវប្រកាសលទ្ធផលបោះឆ្នោតផ្លូវការ។ គ.ជ.ប យ៉ាងយូរត្រឹមថ្ងៃទី៨ ខែកញ្ញា ត្រូវប្រកាសលទ្ធផលបោះឆ្នោតផ្លូវការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ