គណបក្សទាំងពីរអះអាងថាជំនួបកំពូល ហ៊ុន សែន-សម រង្ស៊ី ជាជោគជ័យ
ទោះបីជាជំនួបកំពូលរវាងគណបក្សប្រជាជនកម្ពុជា និងគណបក្សសង្គ្រោះជាតិ ក្រោមព្រះរាជាធិបតីភាពរបស់ព្រះមហាក្សត្រកាលពីព្រឹកមិញនេះ បានប្រព្រឹត្តទៅក្នុងរយៈពេលខ្លីក៏ពិតមែន ក៏ប៉ុន្តែ បើតាមការបញ្ជាក់អះអាងរបស់ភាគីទាំងពីរ នេះមិនមែនជាបរាជ័យទេ។ ផ្ទុយទៅវិញ នេះជាជំហានវិជ្ជមានមួយ។ ជំនួបកំពូលរវាងគណបក្សទាំងពីរគ្រោងបើកធ្វើម្តងទៀត នៅថ្ងៃចន្ទដើមសប្តាហ៍ នៅឯមន្ទីររដ្ឋសភាជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:៥៦
ជំនួបកំពូលរវាងគណបក្សប្រជាជនកម្ពុជា និងគណបក្សសង្គ្រោះជាតិដែលបានធ្វើឡើងក្រោមព្រះរាជាធិបតីភាពរបស់ព្រះមហាក្សត្រ នៅក្នុងព្រះបរមរាជវាំង នៅព្រឹកមិញនេះ បានបញ្ចប់ទៅវិញភ្លាមៗបន្ទាប់ពីដំណើរការកិច្ចប្រជុំយ៉ាងខ្លីមិនដល់កន្លះម៉ោងផង។ តើជំនួបនេះជាបរាជ័យ ឬក៏មានលទ្ធផលផ្លែផ្កាខ្លះដែរ?
ជាបឋម គួររម្លឹកបន្តិចថា ជំនួបកំពូលរវាងគណបក្សប្រជាជនកម្ពុជា និងគណបក្សសង្គ្រោះជាតិ បានបើកធ្វើនៅព្រឹកមិញនេះនៅក្នុងព្រះបរមរាជវាំង ក្រោមព្រះរាជាធិបតីភាពរបស់ព្រះមហាក្សត្រ។ ជំនួបនេះបានកើតឡើងបន្ទាប់ពីព្រះមហាក្សត្រ សម្តេចព្រះបរមនាថ នរោត្តម សីហមុនី ព្រះអង្គបានកោះអញ្ជើញគណបក្សទាំងពីរឲ្យចូលប្រជុំ ដើម្បីដោះស្រាយបញ្ហានយោបាយក្រោយការបោះឆ្នោត ដែលកំពុងជាប់គាំង។ ជំនួបកំពូលនេះ មានសមាសភាព ៣នាក់ម្ខាង។ ខាងគណបក្សប្រជាជនកម្ពុជាមានលោកនាយករដ្ឋមន្ត្រី ហ៊ុន សែន លោក ឧបនាយករដ្ឋមន្ត្រី ស ខេង និង លោក សាយ ឈុំ មន្ត្រីជាន់ខ្ពស់គណបក្សប្រជាជន។
ចំណែកខាងភាគីគណបក្សសង្គ្រោះជាតិវិញ មានលោក សម រង្ស៊ី លោក កឹម សុខា ដែលជាប្រធាន និងអនុប្រធានគណបក្សសង្គ្រោះជាតិ និងលោកគួយ ប៊ុនរឿន មន្ត្រីជាន់ខ្ពស់គណបក្សសង្គ្រោះជាតិ។
តាមពិតទៅជំនួបនេះបានប្រព្រឹត្តទៅយ៉ាងខ្លី ដោយគ្រាន់តែប្រតិភូភាគីទាំងពីរចូលក្នុងព្រះបរមរាជវាំងតែមួយភ្លែត ក៏ស្រាប់តែនាំគ្នាចេញមកវិញរៀងៗខ្លួន។ មើលមួយភ្លែតទៅហាក់ដូចជាបរាជ័យមួយហើយ ពីព្រោះជាធម្មតា ជំនួបចរចាគ្នាគួរតែធ្វើឡើងយូរពីព្រោះភាគីទាំងពីរត្រូវការពិភាក្សាគ្នា។ ប៉ុន្តែ បើស្តាប់តាមអ្វីដែលភាគីទាំងពីរបានអះអាងគឺ ជំនួបនេះមិនមែនជាបរាជ័យទេ។ បន្ទាប់ពីចេញពីជំនួបនេះ លោក គួយ ប៊ុនរឿន បានប្រាប់អ្នកកាសែតក្នុងសន្និសីទកាសែតថា នេះជាជំហានវិជ្ជមានមួយ។ ចំណែកលោក សម រង្ស៊ី ប្រធានគណបក្សសង្គ្រោះជាតិ ក៏បានចាត់ទុកថា ជាជំហានមួយដែរសម្រាប់ការឈានទៅដោះស្រាយបញ្ហានយោបាយ។ លោក សម រង្ស៊ី អះអាងថា លោកបានទូលថ្វាយព្រះមហាក្សត្រអំពីភាពមិនប្រក្រតីនៃការបោះឆ្នោតដូចដែលគណបក្សនេះកំពុងតវ៉ា។
ចំណែកភាគីគណបក្សប្រជាជនកម្ពុជាវិញ លោក ឧបនាយករដ្ឋមន្ត្រី ស ខេង បានប្រាប់វិទ្យុបារាំងអន្តរជាតិថា នេះជាជោគជ័យមួយធំសម្រាប់ជំនួបកំពូលនេះ។ ជោគជ័យដោយហេតុថា ភាគីទាំងពីរបានជួបគ្នានៅចំពោះព្រះភ័ក្ត្រព្រះមហាក្សត្រ ហើយបានសម្តែងពីគោលបំណងរៀងៗខ្លួន។ បើយោងតាមលោកឧបនាយករដ្ឋមន្ត្រី ស ខេង ព្រះមហាក្សត្របានសុំឲ្យគណបក្សទាំងពីរធ្វើការជាមួយគ្នា ហើយជជែកគ្នាបន្តទៀតដើម្បីដោះស្រាយបញ្ហា។
គណបក្សទាំងពីរបានព្រមព្រៀងថា នឹងជួបគ្នាថ្នាក់កំពូលដដែលនៅមន្ទីររដ្ឋសភានៅថ្ងៃចន្ទដើមសប្តាហ៍ក្រោយនេះ ដើម្បីបន្តពិភាក្សាបញ្ហាលម្អិត។ អ្វីដែលគួរឲ្យកត់សម្គាល់ក្នុងជំនួបនេះដែរគឺ ព្រះមហាក្សត្រព្រះអង្គបានចែកលិខិតកោះប្រជុំសភាដំបូង ដល់គណបក្សទាំងពីរ។ លិខិតកោះអញ្ជើញអ្នកតំណាងរាស្ត្រទាំង ១២៣ រូប ត្រូវបានព្រះមហាក្សត្រចែកជូនដល់ដៃគណបក្សទាំងពីរជាស្រេច ទៅតាមលទ្ធផលនៃការបោះឆ្នោត គឺគណបក្សប្រជាជនកម្ពុជាចំនួន ៦៨ កៅអី និងគណបក្សសង្គ្រោះជាតិ ៥៥ កៅអី។
បើតាមលោកឧបនាយករដ្ឋមន្ត្រី ស ខេង ជំនួបនេះបានធ្វើឡើងដោយខ្លីដោយសារតែព្រះមហាក្សត្រព្រះអង្គមិនមែនជាអ្នកកាត់ក្តីទេ ដូច្នេះព្រះអង្គមិនចង់ស្តាប់កិច្ចពិភាក្សារវាងគណបក្សទាំងពីរនូវបញ្ហាលម្អិតនោះទេ។ ព្រះអង្គគ្រាន់តែបើកផ្លូវឲ្យគណបក្សទាំងពីរជួបគ្នាបានជួបគ្នាតែប៉ុណ្ណោះ។
ស្តាប់ទៅដូចជាបញ្ហាបានធូរស្រាលហើយ ចុះបញ្ហាបាតុកម្មរបស់គណបក្សសង្គ្រោះជាតិវិញនៅតែបន្តធ្វើ ឬក៏ត្រូវផ្អាកសិនដើម្បីរង់ចាំកិច្ចចរចា?
បញ្ហាហាក់នៅមិនទាន់ធូរស្រាលទេ។ ជារូបភាពវាមានការធូរស្រាលខ្លះដែរ បន្ទាប់ពីមានជំនួបកំពូលនេះ យ៉ាងហោចណាស់ក៏ភាគីទាំងពីរបានចាប់ដៃគ្នា និងនិយាយរកគ្នាដែរ។ ប៉ុន្តែ គណបក្សសង្គ្រោះជាតិមិនបានផ្អាកគម្រោងបាតុកម្មរបស់ខ្លួនទេ។ នៅក្នុងសន្និសីទកាសែតកាលពីព្រឹកមិញ គណបក្សសង្គ្រោះជាតិនៅតែប្រកាសថា បន្តធ្វើមហាបាតុកម្ម៣យប់ ៣ថ្ងៃ ចាប់ពីថ្ងៃអាទិត្យស្អែកនេះតទៅ។ បាតុកម្មនេះទៀតសោតនឹងធ្វើទាំងយប់ទាំងថ្ងៃ នៅទីលានប្រជាធិបតេយ្យហើយនឹងមានការដើរហែក្បួនទៀតផង។ ដូច្នេះ យើងឃើញថា ស្ថានភាពនៅមិនទាន់ធូរស្រាលនៅឡើយទេ។
សូមកុំភ្លេចថា ក្រសួងមហាផ្ទៃអនុញ្ញាតឲ្យគណបក្សសង្គ្រោះជាតិធ្វើបាតុកម្មតែពេលថ្ងៃប៉ុណ្ណោះ តែបក្សប្រឆាំងនៅតែជំនះធ្វើ។ នេះជាចំណុចប្រឈមទី១។ ទី២ គេពិតជាពិបាករំពឹងណាស់ថា គណបក្សទាំងពីរអាចស្រុះស្រួលគ្នាអំពីដំណោះស្រាយនយោបាយ ពីព្រោះគណបក្សសង្គ្រោះជាតិ នៅតែទាមទារឲ្យមានគណៈកម្មការឯករាជ្យស៊ើបអង្កេតភាពមិនប្រក្រតីនៃការបោះឆ្នោត ចំណែកគណបក្សប្រជាជនកម្ពុជាវិញ ប្រកាន់ជំហរដោយឈរលើលទ្ធផលបោះឆ្នោត។ នេះជាចំណុចប្រឈមដ៏ធំមួយតែដដែល។
យ៉ាងណាក៏ដោយ យើងរង់ចាំមើលទាំងអស់គ្នាថា តើវានឹងវិវឌ្ឍន៍ទៅបែបណាទៀត?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ