សារធាតុគីមីក្នុងចំណីអាហារជាគ្រោះថ្នាក់គួរឲ្យព្រឺខ្លាច
ក្រុមអ្នកគីមីវិទ្យាបានបង្ហាញលទ្ធផលនៃការស្រាវជ្រាវរបស់ខ្លួន ស្តីពីសារធាតុគីមីដ៏គ្រោះថ្នាក់ដែលកំពុងបង្កប់ខ្លួនក្នុងចំណី អាហារដែលគេដាក់លក់នៅលើទីផ្សារនានាក្នុងប្រទេសកម្ពុជា។ ការបង្ហាញនេះបានធ្វើឡើងក្នុងសិក្ខាសាលាមួយដែលមានរយៈពេលពីរ ថ្ងៃហើយដែលទើបតែចប់នៅថ្ងៃទី២០សីហាម្សិលមិញ។ ប្រឈមមុខនឹងគ្រោះថ្នាក់នេះ ក្រុមអ្នកមានជំនាញខាងគីមីវិទ្យាបានរួមគ្នាបង្កើតសមាគមមួយ ដើម្បីប្រយុទ្ធប្រឆាំងនឹងសារធាតុគីមីក្នុងចំណីអាហារ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ ប៉ែន បូណា
សុវត្ថិភាពចំណីអាហារ គឺជាទុក្ខកង្វល់ដ៏ធំមួយរបស់ក្រុមអ្នកគីមីវិទ្យា បន្ទាប់ពីពួកគេបានរកឃើញសារធាតុគីមីច្រើនប្រភេទដែលមានគ្រោះថ្នាក់បំផុតដល់សុខភាពកំពុងមានវត្តមាននៅក្នុងចំណីអាហារដែលគេដាក់លក់នៅក្នុងទីផ្សារនៃប្រទេសកម្ពុជា។
បន្លែ ត្រីសាច់ ត្រីងៀត សាច់ក្រក ប្រហិត សាច់ប៉ាតេ គុយទាវ មី និងគ្រឿងឧបភោគបរិភោគជាច្រើនទៀតសុទ្ធតែមានបង្កប់ដោយសារធាតុគីមីដ៏គ្រោះថ្នាក់ដល់សុខភាព។ វត្តមានដ៏គួរឲ្យព្រឺខ្លាចនៃសារធាតុគីមីដែលមានដូចជាសារធាតុបូរ៉ាក់ ហ្វ័រម៉ាលីន អាស៊ីតសាលីស៊ីលីក និងសំណល់ថ្នាំគីមីកសិកម្មជាច្រើនទៀតនៅក្នុងបន្លែ ផ្លែឈើ បានបង្ហាញពីគ្រោះថ្នាក់ដ៏ធ្ងន់ធ្ងរនៃសុខភាពរបស់ពលរដ្ឋខ្មែរដោយសារការស្រូបយកសារធាតុគីមីពុលចូលក្នុងខ្លួនជារៀងរាល់ថ្ងៃដោយមិនដឹងខ្លួន។
ក្រុមអាជីវករដែលជាអ្នកផលិត និងអ្នកលក់ចំណីអាហារទាំងនោះបានប្រើប្រាស់សារធាតុគីមីដើម្បីបង្កើនសោភណភាពក្នុងបំណងទាក់ទាញអ្នកទិញ និងដើម្បីរក្សាផលិតផលរបស់ខ្លួនឲ្យបានយូរមិនងាយរលួយស្អុយ ប៉ុន្តែ ពួកគេមិនបានគិតដល់គ្រោះថ្នាក់ដ៏ធ្ងន់ធ្ងរដែលអ្នកបរិភោគត្រូវទទួលរងនោះឡើយ។ លោកស្រីបណ្ឌិត សៀង ហ៊ុយ នាយិកាសមាគមគីមីកម្ពុជាដែលទើបបង្កើតថ្មីបានអះអាងថាការប្រមូលផ្តុំគ្នានៃអ្នកគីមីវិទ្យា និងអ្នកជំនាញវិទ្យាសាស្រ្តនៅក្នុងសិក្ខាសាលានេះ គឺដើម្បីបង្ហាញពីគ្រោះថ្នាក់នៃសារធាតុគីមីក្នុងចំណីអាហារក៏ដូចជាដើម្បីកំណត់ផែនការការងាររបស់សមាគមក្នុងការប្រយុទ្ធប្រឆាំងនឹងសារធាតុពុលទាំងនោះ។
វត្តមានសារធាតុគីមីក្នុងចំណីអាហារ គឺជាក្តីបារម្ភជាទូទៅ និងជាយូរមកហើយ ប៉ុន្តែ កង្វះប្រព័ន្ធត្រួតពិនិត្យដែលមានប្រសិទ្ធភាពបានបង្ខំឲ្យពលរដ្ឋខ្មែរបរិភោគអាហារដែលមានសារធាតុគីមីជារៀងរាល់ថ្ងៃ។ ជារឿយៗ គេតែងឃើញភ្នាក់ងារកាំកុងត្រូលចុះពិនិត្យចំណីអាហារនៅតាមទីផ្សារនានា ប៉ុន្តែ វត្តមានម្តងម្កាលរបស់ពួកគេមិនអាចទប់ស្កាត់សារធាតុគ្រោះថ្នាក់នេះបានឡើយ។
ក្រុមអ្នកជំនាញបានប៉ាន់ប្រមាណថាប្រជាពលរដ្ឋខ្មែរនឹងប្រឈមមុខនឹងជំងឺធ្ងន់ធ្ងរជាច្រើននៅពេលអនាគតជាពិសេសជំងឺមហារីកតែម្តងនៅពេលដែលសារធាតុគីមីទាំងនោះពូនផ្តុំគ្នាជារៀងរាល់ថ្ងៃ។ វត្តមានរបស់សមាគមគីមីកម្ពុជាជាក្តីសង្ឃឹមមួយក្នុងការប្រយុទ្ធប្រឆាំងនឹងសារធាតុគីមីដ៏គ្រោះថ្នាក់នេះ។ ប៉ុន្តែ ការភ្ញាក់រលឹករបស់អ្នកផលិត និងអ្នកលក់ទើបជាការចាំបាច់ដើម្បីលុបបំបាត់សារធាតុគីមីនៅក្នុងចំណីអាហារឲ្យមានប្រសិទ្ធភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ