តំណាងរាស្ត្របក្សប្រឆាំងត្រូវរារាំងមិនឲ្យជួបសកម្មជនជាប់ឃុំនៅថ្ងៃខួប ៧មករា
អនុរក្សពន្ធនាគារព្រៃសនៅមណ្ឌល(ម១) នៅព្រឹកថ្ងៃពុធនេះ មិនអនុញ្ញាតឲ្យតំណាងរាស្ត្រ និងមន្ត្រីគណបក្សសង្គ្រោះជាតិ បានចូលជួបសួរសុខទុក្ខសកម្មជនរបស់ខ្លួន និង ព្រះសង្ឃដែលកំពុងជាប់ឃុំនៅទីនោះឡើយ បើទោះបីមានលិខិតអនុញ្ញាតពីព្រះរាជអាជ្ញារងតុលាការក្រុងភ្នំពេញក៏ដោយ។ ក្រោមហេតុផលថា ជាថ្ងៃបុណ្យជាតិ ៧ មករា អនុរក្សពន្ធនាគារបានឲ្យតំណាងរាស្ត្រ និង មន្ត្រីបក្សប្រឆាំងត្រឡប់ទៅវិញ និងឲ្យមកសួរសុខទុក្ខសារជាថ្មីនៅព្រឹកថ្ងៃព្រហ្បតិ៍ស្អែក។
ចុះផ្សាយនៅថ្ងៃ៖
ស្តាប់ - ០២:៤៨
គឺបន្ទាប់ពីបានចូលជួបជាមួយសកម្មជនដីធ្លីជាស្ត្រីបឹងកក់នៅមណ្ឌល(ម២) តំណាងរាស្ត្រ និងមន្ត្រីបក្សប្រឆាំងទាំងនោះ មិនត្រូវបានអនុរក្សពន្ធនាគារនៅមណ្ឌល(ម១) ជាទីដែលសកម្មជនគណបក្សសង្គ្រោះជាតិ កំពុងជាប់ឃុំនោះ ឲ្យចូលជួបសួរសុខទុក្ខនោះទេ។ ដោយទាញរបងបន្លាលួសបិទ ច្រកទ្វារចូលទៅខាងពន្ធនាគារ អនុរក្សម្នាក់បានថ្លែងប្រាប់ក្រុមអ្នកតំណាងរាស្ត្រ និងមន្ត្រីបក្សប្រឆាំងថា មិនអនុញ្ញាតឲ្យចូលទេ ដោយសារតែថ្ងៃនេះ ជាថ្ងៃខួប ៧មករា ដែលជាថ្ងៃឈប់សម្រាក។
លោកហូរ វ៉ាន់ ប្រធានគណៈកម្មការទី១០ នៃរដ្ឋសភា និងជាតំណារាស្ត្រគណបក្សសង្គ្រោះជាតិ ដែលបានដឹកនាំតំណាងរាស្ត្រ និងមន្ត្រីបក្សប្រឆាំងផ្សេងទៀតចុះទៅសួរសុខទុក្ខនោះ បានហៅទង្វើរារាំងនោះថា ជាចេតនាមិនចង់ឲ្យក្រុមលោកបានជួបជាមួយសកម្មជនគណបក្សសង្គ្រោះជាតិ។
គួរកត់សម្គាល់ថា មិនមែនតែមណ្ឌល(ម១)នេះទេដែលអនុរក្សមិនឲ្យមន្ត្រីជាន់ខ្ពស់គណបក្សសង្គ្រោះជាតិចូលជួបសកម្មជនរបស់ខ្លួននោះ ប៉ុន្តែសូម្បីនៅមណ្ឌល(ម២)ជាទីដែលស្ត្រីអ្នកភូមិបឹងកក់កំពុងជាប់ឃុំ ក៏អនុរក្សនៅទីនោះរារាំងមិនចូលផងដែរក្រោមហេតុផលដូចគ្នា។ ប៉ុន្តែក្រោយមក បានអនុញ្ញាតឲ្យចូលវិញបន្ទាប់សម្របសម្រួលជាមួយអ្នកគ្រប់គ្រងមណ្ឌលនោះ។
ប្រឈមនឹងបញ្ហានេះ លោកហូរ វ៉ាន់ ដែលមានលិខិតអនុញ្ញាតឲ្យចូលសួរសុខទុក្ខពីព្រះរាជអាជ្ញារងតុលាការក្រុងភ្នំពេញក្នុងដៃផងនោះ បានសម្តែងនូវការងឿងឆ្ងល់ថា តើអ្នកណាដែលមានសិទ្ធិអំណាចពិតប្រាកដក្នុងការអនុញ្ញាតឲ្យចូលសួរសុខទុក្ខបាន ? ហើយលោកក៏បានសម្តែងការមិនយល់ពីប្រព័ន្ធនៃការគ្រប់គ្រងនៅក្នុងពន្ធនាគារនេះនោះដែរ ។ មិនយល់ព្រោះថា លោកមានលិខិតអនុញ្ញាតពីចៅក្រុម ពីព្រះរាជអាជ្ញាហើយ តែបែរជាអនុរក្សពន្ធនាគារមិនអនុញ្ញាតឲ្យចូលទៅវិញ ដោយអះអាងថា ជាថ្ងៃឈប់សម្រាក។ លោកហូរ វ៉ាន់ ក៏បានចោទសួរទៅអនុរក្សនោះថា តើចៅក្រម ព្រះរាជអាជ្ញាទាំងនោះមិនដឹងថា ថ្ងៃនេះ គឺជាថ្ងៃឈប់សម្រាកទេឫយ៉ាងណា? យ៉ាងណាក៏ដោយ មិនមានការពន្យល់លម្អិតពីសិទ្ធិអំណាចខុសគ្នារវាងចៅក្រម ព្រះរាជអាជ្ញា និងមន្ត្រីពន្ធនាគារ ជុំវិញការអនុញ្ញាតឲ្យចូលសួរសុខទុក្ខអ្នកកំពុងជាប់ឃុំនោះឡើយ។
សូមបញ្ជាក់ថា តំណាងរាស្ត្រ និងមន្ត្រីគណបក្សសង្គ្រោះជាតិជាច្រើននាក់នៅព្រឹកពុធថ្ងៃទី៧ មករានេះ បានចុះទៅពន្ធនាគារព្រៃស ដើម្បីចូលសួរសុខទុក្ខសកម្មជនដីធ្លីដែលជាស្ត្រីអ្នកភូមិបឹងកក់ ព្រះសង្ឈ និងសកម្មជនគណបក្សសង្គ្រោះជាតិចំនួន៥ នាក់ទៀតដែលកំពុងជាប់ឃុំ។ និយាយដោយឡែកចំពោះសកម្មជនគណបក្សសង្គ្រោះជាតិទាំង៥នាក់នោះ ក្រុមតំណាងរាស្ត្រ និងមន្ត្រីបក្សប្រឆាំងមានបំណងចុះទៅលើកទឹកចិត្តពួកគេមុននឹងឡើងតុលាការ។
តាមគម្រោងនៅព្រឹកថ្ងៃព្រហស្បតិ៍ ទី០៨មករា ឆ្នាំ២០១៥ តុលាការសាលាដំបូងរាជធានីភ្នំពេញនឹងសវនាការលើសំណុំរឿងកើតមានអំពើហង្សានៅក្បែរទីលានប្រជាធិបត្យេកាលទីថ្ងៃ១៥ កក្កដា ឆ្នាំ២០១៤កន្លងទៅ ដែលមានសកម្មជនគណបក្សសង្គ្រោះជាតិចំនួន១១ នាក់ជាជនជាប់ចោទ។ ក្នុងនោះ៥ នាក់រួមទាំងលោកមាជ សុវណ្ណារ៉ាផង ត្រូវបានតុលាការសម្រេចឃុំខ្លួនបណ្តោះអាសន្នក្នុងពន្ធនាគារព្រៃស និង ៦ នាក់ផ្សេងទៀតត្រូវបានសម្រេចឲ្យនៅក្រៅឃុំបណ្តោះអាសន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ