ប្រមុខបក្សកាន់អំណាច យកថ្ងៃ៧មករា ផ្ញើសារនយោបាយដល់បក្សប្រឆាំងឲ្យចៀសវាងការប្រើវោហារសាស្ត្រវាយប្រហារ និងប្រឌិតបញ្ហា
ក្នុងពិធីមិទ្ទិញ រំឭកខួបទី៣៦ នៃទិវាជ័យជម្នះ ថ្ងៃ៧មករា នាព្រឹកថ្ងៃពុធនេះ លោកហេង សំរិន ប្រធានកិត្តិយសគណបក្សប្រជាជនកម្ពុជា បានប្រកាសថា គណបក្សប្រជាជនកម្ពុជា បញ្ជាក់ជាថ្មីនូវគោលជំហរ អនុវត្តកិច្ចព្រមព្រៀងនយោបាយជាមួយគណបក្សសង្គ្រោះជាតិ។ ក្នុងនោះប្រមុខគណបក្សកាន់អំណាច ក៏សង្ឃឹមថា ឥស្សរជននយោបាយទាំងឡាយ នឹងមានភាពប្រយ័ត្នប្រយែងក្នុងការធ្វើសេចក្តីថ្លែងការណ៍ជាសាធារណៈផ្សេងៗ ឲ្យមានប្រយោជន៍ដល់ការអនុវត្តកិច្ចព្រមព្រៀងនេះ ដោយចៀសវាងការប្រើវោហារសាស្ត្រវាយប្រហារ និងប្រឌិតបញ្ហា។ លោក ប៉ុល ហំម ប្រធានស្តីទី គណបក្សសង្គ្រោះជាតិ បានសម្តែងការស្វាគមន៍ ហើយបន្តអនុវត្តកិច្ចព្រមព្រៀង និងលើកកម្ពស់វប្បធម៌សន្ទនារវាងគណបក្សទាំងពីរ។
ចុះផ្សាយនៅថ្ងៃ៖
ស្តាប់ - ០២:០០
គឺនៅព្រឹកថ្ងៃ៧មករា ខួបលើកទី៣៦ នៃទិវាជ័យជម្នះ ថ្ងៃ៧មករា លោកហេង សំរិន ប្រធានកិត្តិយសគណបក្សប្រជាជនកម្ពុជា បានលើកឡើងថា ការលើកកម្ពស់វប្បធម៌សន្ទនារវាងគ្រប់ភាគី គឺជាវិធីដ៏ល្អបំផុតក្នុងការដោះស្រាយនូវបញ្ហាប្រឈមផ្សេងៗ នៅក្នុងដំណើរការប្រជាធិបតេយ្យនីយកម្មរបស់កម្ពុជា។ ក្នុងស្មារតីនេះ គណបក្សប្រជាជនកម្ពុជា សូមបញ្ជាក់ជាថ្មីទៀតនូវគោលជំហរប្រកបដោយសុឆន្ទៈ និងភាពស្មោះត្រង់ ក្នុងការអនុវត្តរាល់ប្រការ ដែលបានលើកឡើងនៅក្នុងសេចក្តីប្រកាសស្តីពី លទ្ធផលនៃជំនួបកំពូលរវាងគណបក្សប្រជាជនកម្ពុជា និងគណបក្សសង្គ្រោះជាតិ នាថ្ងៃទី២៨ ខែវិច្ឆិកា ឆ្នាំ២០១៤ ដើម្បីធានាអនុវត្តឲ្យបានសម្រេចពេញលេញនូវស្មារតីនៃកិច្ចព្រមព្រៀង រវាងគណបក្សទាំងពីរ កាលពីថ្ងៃទី២២ ខែកក្កដា ឆ្នាំ២០១៤។
ទន្ទឹមនឹងនេះ លោកហេង សំរិន ក៏សង្ឃឹមថា ឥស្សរជននយោបាយទាំងឡាយ នឹងមានភាពប្រយ័ត្នប្រយែង ក្នុងការធ្វើសេចក្តីថ្លែងការណ៍ជាសាធារណៈផ្សេងៗឲ្យមានប្រយោជន៍ដល់ការអនុវត្តកិច្ចព្រមព្រៀងនេះ ដោយចៀសវាងការប្រើវោហារសាស្ត្រវាយប្រហារ និងប្រឌិតបញ្ហា ដែលគ្មានចំណេញអ្វីដល់សភាពការណ៍ទូទៅនោះ។
ជាសារនយោបាយ ដែលត្រូវបានលោកប៉ុល ហំម ប្រធានទីស្តីគណបក្សសង្គ្រោះជាតិ បានប្រកាសស្វាគមន៍ភ្លាម។ តាមលោកប៉ុល ហំម គណបក្សសង្គ្រោះជាតិ មានបំណង ហើយប្តេជ្ញាចិត្តយ៉ាងម៉ឹងម៉ាត់ថា នឹងធ្វើឲ្យកិច្ចព្រមព្រៀងនយោបាយនោះ អាចសម្រេចទៅបាន ហើយនិងអនុវត្តកិច្ចព្រមព្រៀងនេះ ឲ្យបានល្អប្រសើរ ដើម្បីជាប្រយោជន៍ក្នុងការអនុវត្តលទ្ធិប្រជាធិបតេយ្យនៅកម្ពុជា មិនមែនដើម្បីតែជាផលប្រយោជន៍របស់គណបក្សប្រជាជនកម្ពុជា និងគណបក្សសង្គ្រោះជាតិនោះទេ។
យ៉ាងណាក៏ដោយ គណបក្សសង្គ្រោះជាតិ នៅតែជំរុញទៅកាន់គណបក្សប្រជាជនកម្ពុជា ត្រូវអនុវត្តឲ្យបានពេញលេញនូវកិច្ចព្រមព្រៀងនយោបាយ ដោយត្រូវដោះលែងសកម្មជនដីធ្លី សកម្មជន និងថ្នាក់ដឹកនាំគណបក្សសង្គ្រោះជាតិ ដែលត្រូវបានចាប់ខ្លួនថ្មីៗនេះ បើទោះបីជាគណបក្សប្រជាជនកម្ពុជា ចាត់ទុកការចាប់ឃុំខ្លួន និងកាត់ទោសអ្នកទាំងនោះ ថាជារឿងរបស់តុលាការក្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ