លោកសម រង្ស៊ីនិងលោកហ៊ុន សែន ចោទគ្នាទៅវិញទៅមកថា ជាភេរវករ
ម្សិលមិញ តាមរយៈទំព័រហ្វេសប៊ុកផ្លូវការរបស់ខ្លួន លោកសម រង្ស៊ី ពីក្រៅប្រទេសបានសរសេរចោទប្រកាន់លោកនាយករដ្ឋមន្ត្រីហ៊ុន សែនថា ជាមេក្រុមភេរវករនៅក្នុងជួរអ្នកដឹកនាំប្រទេសកម្ពុជាសព្វថ្ងៃ។ការចោទប្រកាន់នេះ គឺជាការឆ្លើយតបរបស់លោកសម រង្ស៊ីទៅកាន់លោកហ៊ុន សែន ដែលបានចាត់ទុកលោកថាជាភេរវករនៅក្រៅប្រទេស។ លោកនាយករដ្ឋមន្ត្រីបានចាត់ទុកលោកសម រង្ស៊ី ដូច្នេះ ដោយសារអតីតមេបក្សន្រឆាំងរូបនេះបានបង្កើតចលនាសង្គ្រោះជាតិ ដែលរដ្ឋាភិបាលហៅថា ជាអង្គការភេរវកម្ម។
ចុះផ្សាយនៅថ្ងៃ៖
ស្តាប់ - ០២:១៥
គេនៅចាំថា កាលពីថ្ងៃព្រហស្បតិ៍ លោកនាយករដ្ឋមន្ត្រីហ៊ុន សែន បានប្រតិកម្មជាលើកដំបូងទៅលើចលនាសង្គ្រោះជាតិរបស់លោកសម រង្ស៊ី។ គឺនៅពេលនោះហើយដែលលោកនាយករដ្ឋមន្ត្រីបានចោទប្រកាន់លោក សម រង្ស៊ី ថា ជាភេរវករ ហើយលោកប្តេជ្ញាថានឹងតាមចាប់ខ្លួនលោកសម រង្ស៊ី ឲ្យទាល់តែបាន។ លោកនាយករដ្ឋមន្ត្រីក៏បានព្រមានលោកសម រង្ស៊ីដែរថា កុំឲ្យចូលមកក្នុងតំបន់អាស៊ីឲ្យសោះ បើមិនដូច្នោះទេ លោកនឹងស្នើឲ្យមានកិច្ចសហការជាមួយប្រទេសផ្សេង ដើម្បីចាប់ខ្លួនលោកសម រង្ស៊ី។
មួយថ្ងៃក្រោយមក ពោល គឺកាលពីថ្ងៃសុក្រ លោកសម រង្ស៊ី ដែលធ្លាប់ធ្វើជាប្រធានអតីតគណបក្សសង្គ្រោះជាតិ តាមរយៈហ្វេសប៊ុក បានវាយបកទៅកាន់លោកនាយករដ្ឋមន្ត្រីហ៊ុន សែន វិញ ដោយប្រើពាក្យធ្ងន់ៗថាឲ្យលោកនាយករដ្ឋមន្ត្រី “ឈប់ឆ្កួតទៅ” ដែលមកចោទលោកថា ជាភេរវករនោះ។ អតីតប្រមុខបក្សប្រឆាំងកម្ពុជារូបនេះ បានអះអាងថា បើលោកជាភេរវករមែននោះ មិនមែនឥស្សរជនជាន់ខ្ពស់នៅសហរដ្ឋអាមេរិក និងនៅទ្វីបអឺរ៉ុបរាប់អានលោក និងផ្តល់កម្លាំងចិត្តឲ្យលោកតស៊ូទាមទារលទ្ធិប្រជាធិបតេយ្យជូនប្រជារាស្ត្រខ្មែរនោះទេ។
លើសពីនេះទៅទៀត លោកសម រង្ស៊ី ថែមទាំងចោទលោកហ៊ុន សែនចំៗវិញថា ជាឃាតករ និងជាមេក្រុមភេរវករនៅក្នុងជួរអ្នកដឹកនាំប្រទេសកម្ពុជាសព្វថ្ងៃដែលលោកសម រង្ស៊ី ចោទថា បានសម្លាប់មនុស្សជាច្រើន។ ការសម្លាប់មនុស្សជាច្រើននេះ លោកសម រង្ស៊ីចង់សំដៅទៅលើការបង្កើតឲ្យមានផែនការក៥ និងព្រឹត្តិការណ៍បោកគ្រាប់បែកក្នុងហ្វូងបាតុករនៅមុខរដ្ឋសភាចាស់កាលពីថ្ងៃ៣០ មិនា ឆ្នាំ១៩៩៧ ដែលព្រឹត្តិការណ៍នេះ សម្រាប់លោកសម រង្ស៊ី គឺជាអំពើភេរវកម្ម។ មួយទៀត លោកសម រង្ស៊ីក៏ចង់សំដៅទៅលើព្រឹត្តិការណ៍ផ្ទុះអាវុធនៅក្នុងខែកក្កដា ឆ្នាំ១៩៩៧ផងដែរ ដែលលោកចាត់ទុកថា ជារដ្ឋប្រហារ។ ដោយចោទលោកហ៊ុន សែន ដូច្នេះ លោកសម រង្ស៊ី អះអាងថា លោកប្រមុខរដ្ឋាភិបាលខ្មែរនឹងគេយកកាត់ទោសចំពោះមុខតុលាការព្រហ្មទណ្ឌអន្តរជាតិក្នុងពេលឆាប់។
សូមបញ្ជាក់ថា ដើមហេតុដែលនាំឲ្យអ្នកនយោបាយជើងចាស់ទាំងពីរដែលធ្លាប់ទាក់ទងគ្នាផ្អែមល្ហែម កាលពីឆ្នាំ២០១៤ ត្រឡប់មកចោទគ្នាទៅវិញទៅមកថាជាភេរវករនេះ គឺដោយសារតែការបង្កើតចលនាសង្គ្រោះជាតិ។ តាមលោកសម រង្ស៊ី ចលនានេះ នឹងធ្វើសកម្មភាពតស៊ូមតិ ដើម្បីទាមទារឲ្យគណបក្សសង្គ្រោះជាតិរស់ឡើងវិញ។ ប៉ុន្តែរដ្ឋាភិបាលកម្ពុជា បានចាត់ទុកចលនានេះថា អង្គការឧទ្ទាមក្រៅច្បាប់ និងជាអង្គការភេរវកម្ម ដែលត្រូវកំទេចចោលភា្លមប្រសិនហ៊ានធ្វើសកម្មភាពនៅក្នុងប្រទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ