លោកថាច់ សេដ្ឋា៖ការទាមទារទឹកដីកម្ពុជាក្រោមមកវិញ ជាភារកិច្ចរបស់កូនខ្មែរគ្រប់រូប
ដូចការគ្រោងទុក នៅព្រឹកថ្ងៃចន្ទនេះ សហគមន៍ខ្មែរកម្ពុជាក្រោមបានរៀបចំពិធីរំឮកខួបទី៦៩ឆ្នាំនៃការបាត់បង់ទឹកដីកម្ពុជាក្រោម នៅទីស្នាក់ការរបស់ខ្លួនក្នុងខណ្ឌសែនសុខ ។ ពិធីនេះក៏មានការចូលរួមពីព្រះរាជតំណាងព្រះមហាក្សត្រកម្ពុជាដូចជារៀងរាល់ឆ្នាំផងដែរ។ លោកថាច់ សេដ្ឋា ប្រធានសហគមន៍ខ្មែរកម្ពុជាក្រោម បានអះអាងនៅក្នុងពិធីនេះថា ការទាមទារយកទឹកដីកម្ពុជាក្រោមមកវិញ គឺជាភារកិច្ចរបស់កូនខ្មែរគ្រប់រូប មិនមែនតែជារឿងរបស់ពលរដ្ឋនៅកម្ពុជាក្រោមឡើយ។
ចុះផ្សាយនៅថ្ងៃ៖
ស្តាប់ - ០២:១៩
ដូចជារៀងរាល់ឆ្នាំដែរ ពិធីរំឮកខួបទី៦៩ឆ្នាំនៃការបាត់បង់ទឹកដីកម្ពុជាក្រោមនៅឆ្នាំ២០១៨នេះ មានការចូលរួមពីព្រះរាជតំណាងព្រះមហាក្សត្រកម្ពុជា អតីតអ្នកនយោបាយបក្សប្រឆាំង ព្រះសង្ឃ និងប្រជាពលរដ្ឋខ្មែរមួយចំនួនទៀត។ លោកថាច់ សេដ្ឋា ប្រធានសហគមន៍ខ្មែរកម្ពុជាក្រោមបានរំឮកឡើងនូវរឿងរ៉ាវដើមទងនៃការបាត់បង់ទឹកដីកម្ពុជាក្រោមទៅឲ្យប្រទេសវៀតណាមកាលពីថ្ងៃទី០៤ មិថុនា ឆ្នាំ១៩៤៩ ដែលកាលណោះបារាំងបានសម្រេចកាត់ទឹកដីកម្ពុជាក្រោមឲ្យទៅប្រទេសវៀតណាមដោយមិនបានសួរនាំម្ចាស់ទឹកដីឡើយ។ បន្ថែមលើនេះ ប្រធានសហគមន៍ខ្មែរកម្ពុជាក្រោមរូបនេះ ក៏បានលើកឡើងពីការលំបាកលំបិនរបស់ប្រជាពលរដ្ឋកម្ពុជាក្រោមដែលស្ថិតក្រោមការត្រួតត្រារបស់អាជ្ញាធរវៀតណាមផងដែរ។
និយាយដល់កិច្ចការទាមទារយកទឹកកម្ពុជាក្រោមមកវិញ លោកថាច់ សេដ្ឋា បានសង្កត់ធ្ងន់ថា វាគឺភារកិច្ចរបស់កូនខ្មែរគ្រប់រូប ជាពិសេសពលរដ្ឋខ្មែរនៅក្នុងប្រទេសកម្ពុជាដែលលោកហៅថា ជាខ្មែរកណ្តាលនេះតែម្តង។ បើតាមលោកថាច់ សេដ្ឋា ប្រជាពលរដ្ឋនៅកម្ពុជាក្រោមមិនអាចធ្វើបានទេ ព្រោះស្ថិតក្រោមការធ្វើទុក្ខបុកម្នេញពីសំណាក់អាជ្ញាធរវៀតណាម។ ដូច្នេះសម្រាប់លោកថាច់ សេដ្ឋា គឺពលរដ្ឋខ្មែរកម្ពុជាក្រោមបានត្រឹមទាមទាររកសេរីភាពប៉ុណ្ណោះ។ រីឯការទាមទារយកទឹកដីមកវិញនោះ គឺពឹងផ្អែកលើប្រជាពលរដ្ឋនៅក្នុងប្រទេសកម្ពុជានេះឯង។
គិតមកដល់ពេលនេះ គឺរយៈពេល៦៩ឆ្នាំហើយដែលទឹកដីកម្ពុជាក្រោមបានធ្លាក់ទៅជាកម្មសិទ្ធិរបស់វៀតណាមក្រោមស្នាដៃរបស់បារាំងក្នុងឆ្នាំ១៩៤៩ ដែលកាលណោះបារាំងបានធ្វើអាណានិគមកិច្ចលើប្រទេសកម្ពុជា។ សម្រាប់ការរៀបចំពិធីរំឮកខួបនៃការបាត់បង់ទឹកដីកម្ពុជាក្រោមទាំងនៅក្នុងឆ្នាំនេះ និងទាំងក្នុងឆ្នាំកន្លងមក លោកថាច់ សេដ្ឋាចាត់ទុកថា គឺជាជោគជ័យមួយនៃដំណើរការទាមទារទឹកដីកម្ពុជាក្រោមហើយថា នៅឆ្នាំនេះ មានពលរដ្ឋខ្មែរនៅក្រៅប្រទេសជាច្រើនបានរៀបចំពិធីរំឮកខួបដូចគ្នានេះផងដែរ។
សូមបញ្ជាក់ថា ទឹកដីកម្ពុជាក្រោមមានផ្ទៃដី ៦៨,៩៦៥គីឡូម៉ែត្រក្រឡា ហើយបច្ចុប្បន្នមានប្រជាជនរស់នៅជាង១៦លាននាក់ មានវត្តអារាមពុទ្ធសាសនា ៥៦៩វត្ត និងមានព្រះសង្ឃខ្មែរគង់នៅជាង ២ម៉ឺនអង្គ។ នេះបើតាមឯកសាររបស់សហគមន៍ខ្មែរកម្ពុជាក្រោម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ