UN ចាត់ទុកការឃុំខ្លួនលោកកឹម សុខា ថាធ្វើឡើងដោយបំពានច្បាប់និងទាមទារឲ្យដោះលែងជាបន្ទាន់
ក្រុមការងារអង្គការសហប្រជាជាតិស្តីពីការឃុំខ្លួនដោយបំពាន (WGAD) បានចាត់ទុកការឃុំខ្លួនលោកកឹម សុខា ប្រធានអតីតបក្សសង្គ្រោះជាតិ ថាធ្វើឡើងដោយបំពានច្បាប់។ នេះបើតាមសេចក្តីប្រកាសព័ត៌មានមួយ ចេញផ្សាយនៅថ្ងៃពុធនេះ។ ការប្រកាសនេះ ធ្វើឡើងបន្ទាប់ពីតុលាការកំពូលកម្ពុជាទើបបានសម្រេចបន្តឃុំលោកកឹម សុខា រយៈពេល៦ខែទៀតក្នុងពន្ធនាគារ។ ក្រុមការងារអង្គការសហប្រជាជាតិស្តីពីការឃុំខ្លួនដោយបំពាន បានទាមទារឲ្យអាជ្ញាធរខ្មែរដោះលែងលោកកឹម សុខា ជាបន្ទាន់និងដោយគ្មានលក្ខខណ្ឌ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
ការប្រកាសរបស់ក្រុមការងារអង្គការសហប្រជាជាតិស្តីពីការឃុំខ្លួនដោយបំពាន (WGAD) នេះ គឺជាការឆ្លើយតបទៅនឹងបណ្តឹងរបស់សម្ព័ន្ធអន្តរជាតិដើម្បីសិទ្ធិមនុស្ស (FIDH) ជុំវិញការឃុំខ្លួនលោកកឹម សុខា ពីសំណាក់តុលាការកម្ពុជា។ នៅក្នុងសេចក្តីប្រកាសព័ត៌មានដោយសម្ព័ន្ធអន្តរជាតិដើម្បីសិទ្ធិមនុស្សចុះថ្ងៃទី៩ ឧសភា ក្រុមការងារអង្គការសហប្រជាជាតិស្តីពីការឃុំខ្លួនដោយបំពាន (WGAD) បានហៅការចាប់ខ្លួន និងឃុំខ្លួនលោកកឹម សុខា ថាជារឿងនយោបាយ នៅក្នុងបរិបទនៃការលេចឡើងនៃនិន្នាការបង្ក្រាបលើអ្នករិះគន់កាន់តែខ្លាំងឡើងនៅក្នុងប្រទេសកម្ពុជា នៅមុនការបោះឆ្នោតមកដល់។
លោកកឹម សុខា ត្រូវបានចាប់ខ្លួន និងឃុំខ្លួនកាលពីដើមខែកញ្ញា ឆ្នាំ២០១៧ ក្រោមបទចោទក្បត់ជាតិ។ តុលាការកម្ពុជាគ្រប់ជាន់ថ្នាក់ច្រានចោលការស្នើសុំនៅក្រៅឃុំជាបន្តបន្ទាប់របស់លោក កឹម សុខា ហើយចុងក្រោយនេះ តុលាការកំពូលទើបបានសម្រេចបន្តការឃុំលោករយៈពេល៦ខែទៀតនៅក្នុងពន្ធនាគារ។ ក្រុមការងារអង្គការសហប្រជាជាតិស្តីពីការឃុំខ្លួនដោយបំពាន បានចាត់ទុកការចាប់ខ្លួន និងឃុំខ្លួនលោកកឹម សុខា ធ្វើដោយបំពានច្បាប់ ហើយបទចោទទៀតសោត ក៏មិនច្បាស់លាស់ថែមទៀត។
លោកសុខ ឥសាន អ្នកនាំពាក្យគណបក្សកាន់អំណាច បានច្រានចោលការចោទប្រកាន់នេះ ដោយអះអាងថា ការចាប់ខ្លូន ការឃុំខ្លួន និងការចោទប្រកាន់លោកកឹម សុខា គឺធ្វើឡើងត្រឹមត្រូវបានច្បាប់ និងរដ្ឋធម្មនុញ្ញកម្ពុជា។ តាមលោកសុខ ឥសាន ការចោទប្រកាន់របស់ក្រុមការងារអង្គការសហប្រជាជាតិស្តីពីការឃុំខ្លួនដោយបំពាននេះ គឺធ្វើឡើងដោយយល់ច្រឡំ និងមិនយល់ពីការពិតជាក់ស្តែងនៅកម្ពុជា។ ក៏ប៉ុន្តែ ក្រុមការងារអង្គការសហប្រជាជាតិស្តីពីការឃុំខ្លួនដោយបំពានបានវាយតម្លៃថា ការឃុំខ្លួនលោកកឹម សុខា គឺកើតចេញពីការអនុវត្តសិទ្ធិរបស់គាត់ ដើម្បីសេរីភាពនៃការបញ្ចេញមតិនៅកម្ពុជា។ រីឯសម្ព័ន្ធអន្តរជាតិដើម្បីសិទ្ធិមនុស្ស (FIDH) វិញ អះអាងថា លោកកឹម សុខា ត្រូវបានឃុំខ្លួនដោយសារតែការតស៊ូរបស់លោក ដើម្បីលទ្ធិប្រជាធិបតេយ្យនៅកម្ពុជា។
លោកស្រី Debbie Stothard អគ្គលេខាធិការសម្ព័ន្ធអន្តរជាតិដើម្បីសិទ្ធិមនុស្ស (FIDH) បានអះអាងថា ការឃុំខ្លួនមុនសវនាការលើលោកកឹម សុខាអស់រយៈពេល៨ខែមកនេះ មិនត្រឹមតែធ្វើឡើងដោយបំពានទេ តែក៏ជារឿងដ៏អាម៉ាស និងអមនុស្សធម៌ផងដែរ។ សម្រាប់លោកស្រី Debbie Stothard អាជ្ញាធរត្រូវតែដោះលែងលោកកឹម សុខា ជាបន្ទាន់ជាមួយសមាជិក និងអ្នកគាំទ្រអតីតបក្សប្រឆាំងផ្សេងទៀត។ ចំណែកក្រុមការងារអង្គការសហប្រជាជាតិស្តីពីការឃុំខ្លួនដោយបំពានវិញ បានអំពាវនាវដល់រដ្ឋាភិបាលកម្ពុជាឲ្យផ្តល់ប្រាក់សំណងជំងឺចិត្ត និងការប៉ះប៉ូវផ្សេងទៀតដល់លោកកឹម សុខា ចំពោះការឃុំខ្លួនដោយបំពាននេះ ដោយអនុលោមទៅតាមច្បាប់អន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ