ហ្វីលីពីន-ចិនព្រមព្រៀងនៅកម្ពុជា មិនបង្កើនភាពតានតឹងនៅតំបន់ Scarborough
ប្រមុខយោធាហ្វីលីពីនបានប្រាប់អ្នកសារព័ត៌មានអោយដឹងកាលពីថ្ងៃអង្គារម្សិលមិញថា លោកនិងសមភាគីចិនបានឈានដល់ការព្រមព្រៀងគ្នាមិនដំឡើងភាពតានតឹងទៀតឡើយនៅក្នុងតំបន់ជម្លោះ Scarborough ក្នុងសមុទ្រចិនខាងត្បូង។ ដំណោះស្រាយនេះត្រូវបានរកឃើញនៅក្នុងការពិភាក្សារយៈពេលខ្លីមួយកាលពីថ្ងៃចន្ទនៅក្នុងរាជធានីភ្នំពេញ។
ចុះផ្សាយនៅថ្ងៃ៖
ស្តាប់ - ០១:៥៩
ប្រមុខយោធាចិន និងហ្វីលីពីនបានសន្យារក្សាភាពស្ងប់ស្ងាត់នៅក្នុងតំបន់ជម្លោះ Scarboroughក្នុងសមុទ្រចិនខាងត្បូង និងមិនអោយមានស្ថានភាពតានតឹងទៀតឡើយ។ ការព្រមព្រៀងកំហិតភាពតានតឹងនេះត្រូវបានអះអាងដោយអនុរដ្ឋមន្ត្រីការពារជាតិហ្វីលីពីនលោក វុលទែរ ហ្កាសមីន (Voltaire Gazmin) បន្ទាប់ពីលោកបានជួបពិភាក្សាជាមួយសមភាគីចិននៅក្នុងរាជធានីភ្នំពេញកាលពីថ្ងៃចន្ទ។ លោកហ្កាសមីនរៀបរាប់ថា ភាគីទាំងពីរបានព្រមព្រៀងគ្នាលើ៣ចំនុច៖ ទីមួយកំហិតសកម្មភាពយោធា ទី២កំហិតការអត្ថាធិប្បាយដើម្បីកុំអោយមានភាពតានតឹងកាន់តែកើនឡើង និងទី៣គឺការបន្តចរចារហូតដល់រកបានដំណោះស្រាយសន្តិភាពមួយ។
ភាពតានតឹងរវាងចិននិងហ្វីលីពីនបានកើតឡើងតាំងពីដើមខែមេសាមកម្ល៉េះនៅក្នុងជម្លោះទាមទារកាន់កាប់តំបន់ឈ្មោះស្កាបូរាហ្វ Scarborough ក្នុងសមុទ្រចិនខាងត្បូង ជម្លោះចុងក្រោយដែលកើតចេញពីចាប់កប៉ាល់នេសាទរបស់ចិនពីសំណាក់យោធាហ្វីលីពីន។ ប្រទេសទាំងពីរបានដំឡើងសាច់ដុំយោធាដាក់គ្នាកាលពីពេលថ្មីៗនេះ រហូតដល់ហ្វីលីពីនបានទៅស្វែងរកជំនួយពីសហរដ្ឋអាមេរិកដែលប្រកាសការពារហ្វីលីពីនទៀតផង។ ជម្លោះសមុទ្រចិនខាងត្បូងជាជម្លោះថ្នាក់តំបន់មួយរវាងចិន និងប្រទេស៤ជាសមាជិករបស់អាស៊ានរួមមានវៀតណាម ហ្វីលីពីន ម៉ាឡេស៊ី និងប្រ៊ុយណេ។ គឺវៀតណាម និងហ្វីលីពីននេះហើយដែលមានជម្លោះស្រួចស្រាល់ និងតានតឹងជាងគេទល់ជាមួយចិន។
នៅពេលមានកិច្ចប្រជុំរដ្ឋមន្ត្រីការពារជាតិអាស៊ាននៅរាជធានីភ្នំពេញក្នុងសប្តាហ៍នេះ ប្រមុខយោធាចិនលោក លៀង គ័ងលីក៏បំពេញទស្សនកិច្ចនៅកម្ពុជា ហើយបានជួបសមភាគីអាស៊ានកាលពីល្ងាចថ្ងៃអង្គារម្សិលមិញនេះ។ ប៉ុន្តែគ្មានសេចក្តីថ្លែងការណ៍ផ្លូវការណាមួយត្រូវបានផ្សព្វផ្សាយស្តីពីលទ្ធផលជំនួបនោះឡើយ។ គួររម្លឹកថា ក្រុមឧត្តមមន្ត្រីអាស៊ានបានបញ្ចប់សេចក្តីព្រាងក្រមប្រតិបត្តិស្តីពីបញ្ហាសមុទ្រចិនខាងត្បូងហើយ ហើយនឹងដាក់ជូនរដ្ឋមន្ត្រីការបរទេសអាស៊ានពិនិត្យនៅក្នុងកិច្ចប្រជុំខែកក្កដាខាងមុខ។ ក្រមប្រតិបត្តិនេះហើយដែលនឹងបង្ហាញអំពីជំហររួមមួយរបស់អាស៊ានដើម្បីជជែកជាមួយចិន អំពីដំណោះស្រាយដោយសន្តិវិធី និងមិនប្រើប្រាស់អាវុធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ