អន្តរជាតិយល់ព្រមបង្កើតមូលនិធិជួយក្រុមបះបោរលីប៊ី
ក្រុមប្រទេសដែលចូលរួមដោះស្រាយវិបត្តិនៅលីប៊ី សរុបចំនួន២២ប្រទេស និងស្ថាប័នអន្តរជាតិចំនួន៦ មានជាអាទិ៍អង្គការអូតង់ និង សហភាពអឺរ៉ុប បានជួបប្រជុំគ្នាជាលើកទីពីរ នៅថ្ងៃព្រហស្បតិ៍ ទី ៥ ឧសភា ២០១១ ម្សិលមិញ នៅទីក្រុងរ៉ូមប្រទេសអ៊ីតាលី។ ពួកគេបានសម្រេចបង្កើតមូលនិធិពិសេសមួយ ជាបណ្តោះអាសន្ន សម្រាប់ជួយក្រុមប្រឹក្សាជាតិអន្តរកាលលីប៊ី តំណាងអ្នកប្រឆាំងបះបោរនឹងរបបលោកកាដាហ្វី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
គោលការណ៍នៃការបង្កើតយន្តការហិរញ្ញវត្ថុពិសេសនេះ គឺដើម្បីអាចបង្វែរថវិកា ប្រកបដោយតម្លាភាព ទៅឲ្យក្រុមប្រឹក្សាជាតិអន្តរកាល ដែល ជាច្រើនថ្ងៃមកហើយ បានថ្ងួចថ្ងូរសុំជំនួយហិរញ្ញវត្ថុ ប្រមាណបីពាន់លានដុល្លារ ដើម្បីយកទៅបើកប្រាក់ខែជូនបុគ្គលិក - ឧបត្ថម្ភផ្នែកសុខាភិបាល ព្រមទាំងដើម្បីទិញស្បៀងអាហារ។
មូលនិធិពិសេសសម្រាប់ជួយពួកអ្នកបះបោរលីប៊ី ដែលស្ថិតក្រោមការត្រួតពិនិត្យរបស់សហគមន៍អន្តរជាតិ នឹងត្រូវដំណើរការបាននៅក្នុងពេលពីរបីសប្តាហ៍ទៀត។ ទឹកប្រាក់ដំបូង ដែលសុទ្ធសឹងជាជំនួយ ឬការឲ្យខ្ចី មានតម្លៃប្រមាណ ២៥០លានដុល្លារ។ ប្រទេសកូវែត បានសន្យាផ្តល់ ១៨០លានដុល្លារ ប្រទេសកាតារ ប្រមាណពី៤ទៅ៥រយលាន។
ប្រទេសផ្សេងៗទៀតដែលមានវត្តមានក្នុងជំនួបប្រជុំម្សិលមិញ និងជាពិសេសសហរដ្ឋអាមេរិកបានប្រកាសពីចេតនាចង់គាស់យកធនធានក្នុងធនាគាររបស់លោក កាដាហ្វី និងក្រុមគ្រួសារ នៅបរទេសយកទៅបំពេញហិបមូលនិធិនេះ។ ធនធានដែលសហរដ្ឋអាមេរិក និងសហភាពអឺរ៉ុប បានផ្អាប់ទុក តាំងពីពេលផ្ទុះចលនាបះបោរមក មានតម្លៃសរុបប្រមាណជាង៦០ពាន់លានដុល្លារ។
ប៉ុន្តែ រហូតមកទល់ពេលនេះ មានប្រទេសតែបីប៉ុណ្ណោះដែលបានទទួលស្គាល់ក្រុមប្រឹក្សាជាតិអន្តរកាលលីប៊ីជាផ្លូវការ។ ដូច្នេះការបង្វែរប្រាក់លោកកាដាហ្វីនៅបរទេសទៅឲ្យក្រុមអ្នកបះបោរ ពិតជារឿងមួយដែលមិនធ្លាប់មានឡើយក្នុងប្រវត្តិច្បាប់អន្តរជាតិ។
ដោយគ្មានការភ្ញាក់ផ្អើល រដ្ឋាភិបាលក្រុងទ្រីប៉ូលី របស់លោក កាដាហ្វី បានបញ្ចេញប្រតិកម្មភ្លាម ប្រឆាំងនឹងសេចក្តីសម្រេចក្នុងជំនួបនៅទីក្រុងរ៉ូមម្សិលមិញ ដោយបានបរិហារថា អន្តរជាតិកំពុងបញ្ចេញសកម្មភាពដូចជាពួកចោរសមុទ្ទ បំពានលើប្រទេសលីប៊ី ដែលជារដ្ឋមួយឯករាជ្យ មានអធិបតេយ្យពេញលក្ខណៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ