តំណាងរាស្រ្តបារាំងចង់ឲ្យអូតង់បញ្ជូនកុម្ម៉ង់ដូទៅលីប៊ី
នៅនេះ គេសង្កេតឃើញថា ប្រតិបត្តិការទ័ពអាកាសនៅលីប៊ី ហាក់ដូចជាគ្មានប្រសិទ្ធភាពគ្រប់គ្រាន់ ដើម្បីបង្រ្កាបកងទ័ពរបស់លោកកាដាហ្វ៊ីបានទេ។ កាលពីថ្ងៃចន្ទ ម្សិលមិញនេះ ប្រធានគណៈកម្មការសភាមួយរូបរបស់បារាំង បានជំរុញឲ្យអូតង់បញ្ជូនកងកុម្ម៉ង់ដូចូលទៅក្នុងប្រទេសលីប៊ី ដើម្បីជាជំនួយដល់ទ័ពអាកាស។ ការលើកឡើងអំពីបេសកកម្មកុម្ម៉ង់ដូ គឺជាជំហានមួយថ្មីទៀត របស់លោកខាងលិច ក្នុងគោលដៅទម្លាក់លោកកាដាហ្វ៊ីពីអំណាច។
ចុះផ្សាយនៅថ្ងៃ៖
សេចក្តីរាយការណ៍របស់ សេង ឌីណា
កងទ័ពសម្ព័ន្ធមិត្តបានបើកការវាយប្រហារតាមផ្លូវអាកាស ទៅលើកងកម្លាំងរបស់លោកកាដាហ្វ៊ី នៅលីប៊ី កាលពីថ្ងៃទី១៩ ខែមីនា ២០១១។ មួយខែក្រោយមក គេមើលឃើញកាន់តែច្បាស់ថា ពឹងលើតែកងទ័ពអាកាស គឺមិនអាចបំបាក់កងកម្លាំងរបស់លោកកាដាហ្វ៊ីបាននោះទេ។
កាលពីសប្តាហ៍មុន ប្រមុខដឹកនាំអាមេរិក បារាំង និងអង់គ្លេស បានបញ្ជាក់យ៉ាងច្បាស់ៗថា ពួកគេនឹងមិនបញ្ឈប់ប្រតិបត្តិការយោធានៅលីប៊ីទេ ដរាបណាកាដាហ្វ៊ី នៅតែបន្តកាន់អំណាច។ កងកម្លាំងសម្ព័ន្ធមិត្ត កំពុងតែពិចារណាទៅលើជម្រើសផ្សេងទៀត ក្រៅពីការវាយប្រហារតាមផ្លូវអាកាស៖ ការផ្តល់លុយ អាវុធ គ្រឿងបរិក្ខាយោធា និងការហ្វឹកហ្វឺនដល់ក្រុមប្រឆាំង។ នៅពេលនេះ ជម្រើសថ្មីមួយទៀតត្រូវបានគេលើកឡើង គឺការបញ្ជូនកងកុម្ម៉ង់ដូ ទៅលីប៊ី។
កាលពីថ្ងៃចន្ទ ម្សិលមិញនេះ លោកអាក់ស៊ែល ប៉ូនីញ៉ាតូវស្គី (Axel Poniatowski) ប្រធានគណៈកម្មការកិច្ចការបរទេស នៃរដ្ឋសភាបារាំង បានលើកឡើងថា អូតង់គួរតែបញ្ជូនកងកុម្ម៉ង់ដូ ទៅកាន់ប្រទេសលីប៊ី ដើម្បីជាជំនួយដល់កងទ័ពអាកាស។ លោកប៉ូនីញ៉ាតូវស្គី បានបញ្ជាក់ថា កងកុម្ម៉ង់ដូ ២០០ ទៅ ៣០០នាក់ មិនមែនជាកងថ្មើរជើង ដែលចូលឈ្លានពានកាន់កាប់ប្រទេសលីប៊ីនោះទេ។ ពួកគេមានបេសកកម្មត្រឹមតែជួយឲ្យកងទ័ពអាកាសទម្លាក់គ្រាប់បែកចំទីដៅតែប៉ុណ្ណោះ។ ដូច្នេះ វាមិនមែនជាការរំលោភទៅលើសេចក្តីសម្រេចរបស់ក្រុមប្រឹក្សាសន្តិសុខអ.ស.ប.នោះទេ។
ទោះជាយ៉ាងណា នេះគ្រាន់តែជាសំណើរបស់ប្រធានគណៈកម្មការសភាមួយរូបប៉ុណ្ណោះ។ គេនៅមិនទាន់ដឹងនៅឡើយទេថា តើរដ្ឋាភិបាលបារាំងមានជំហរយ៉ាងណា អំពីបេសកកម្មកុម្ម៉ង់ដូនេះ។ ក៏ប៉ុន្តែ ជាទូទៅ គេសង្កេតឃើញថា បេសកកម្មកុម្ម៉ង់ដូ គឺជាបេសកកម្មសម្ងាត់។ ដូច្នេះ បើទោះជាបារាំង ឬអូតង់ព្រមបញ្ជូនកងកុម្ម៉ង់ដូ ទៅលីប៊ីមែន ក៏គេទំនងជាមិនប្រកាសជាសាធារណៈនោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ