អង់គ្លេស និងបារាំងបញ្ជូនអ្នកជំនាញការយោធាទៅជួយក្រុមបះបោរលីប៊ី
ទ័ពកាដាហ្វ៊ីបានបើកការវាយប្រហារកាន់តែខ្លាំង ទៅលើទីក្រុងមីស្រ្តាតា ដែលជាស្ថិតនៅភាគខាងលិច និងកាន់កាប់ដោយពួកប្រឆាំងលីប៊ី។ នៅថ្ងៃពុធ ទី ២០ មេសា នេះ ក្រុមបះបោរលីប៊ីបានសុំជាលើកទីមួយ ឲ្យមានអន្តរាគមន៍យោធារបស់បរទេសក្នុងទឹកដីលីប៊ី។ អង់គ្លេសបានប្រកាស នៅរសៀលថ្ងៃអង្គារម្សិលមិញ ថានឹងបញ្ជូនអ្នកជំនាញយោធារបស់ខ្លួនឲ្យទៅធ្វើជាទីប្រឹក្សាយោធា របស់ក្រុមបះបោរ នៅលីប៊ី។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ឈាង បុប្ផា
ប្រតិបត្តិការផ្លូវអាកាសរបស់កងទ័ពអូតង់ ជាងបីសប្តាហ៍ មិនសូវផ្តល់លទ្ធផលជាផ្លែផ្កាប៉ុន្មានទេ បើទោះបីជាអូតង់បាននិយាយថា ខ្លួនបានបាញ់បំផ្លាញរថក្រោះ និងទីតាំងយោធាដែលតំណាងឲ្យមួយភាគបីនៃកម្លាំងការពាររបស់កាដាហ្វ៊ី។ កាដាហ្វ៊ី នៅពេលនេះ នៅតែអាចមានសមត្ថភាពវាយប្រហារទៅលើក្រុមបះបោរ និងសម្លាប់ជនស៊ីវិល ជាពិសេសក្នុងទីក្រុងមីស្ត្រាតា។ អង្គការអូតង់ហាក់អស់លទ្ធភាពដើម្បីបាញ់បំផ្លាញទីតាំងប្រយុទ្ធរបស់ទ័ពកាដាហ្វ៊ី ព្រោះពេលនេះ កាដាហ្វ៊ីបានចល័តទ័ព និងបោះទីតាំងរថក្រោះរបស់ខ្លួន នៅក្បែរផ្ទះប្រជាជន។
ប្រតិបត្តិការទ័ពអាកាសលែងមានប្រសិទ្ធភាពទៀតហើយ ក្នុងលីប៊ី។ បច្ចុប្បន្ននេះ គេមើលឃើញមានជម្រើសបី ដើម្បីទប់ស្កាត់ការវាយប្រហាររបស់ទ័ពកាដាហ្វ៊ីមកលើជនស៊ីវិល។ ទីមួយគឺ វត្តមានរបស់ទ័ពជើងគោក អន្តរជាតិនៅក្នុងសមរភូមិរបស់លីប៊ី។ អង្គការអូតង់បានបដិសេធ ថ្ងៃម្សិលមិញ នូវជម្រើសនេះ។ អូតង់មិនចង់ប្រើបើកការប្រយុទ្ធផ្នែកជើងគោក ក្នុងលីប៊ី ដោយខ្លាចមានការរិះគន់ពីបណ្តាប្រទេសអារ៉ាប់ ដែលថា អូតង់ចង់ពង្រីកឥទ្ធិពលក្នុងតំបន់អាហ្រ្វិកខាងជើង។ ហើយ ម្យ៉ាងទៀត អូតង់ទំនងខ្លាចធ្វើខុស ផ្ទុយនឹងសេចក្តីសម្រេចចិត្តរបស់អង្គការសហប្រជាជាតិ។
ជម្រើសទីពីរគឺការបណ្តុះបណ្តាល។ ប្រទេសកាតាបាននិយាយថា ខ្លួនបានត្រៀមចេញលុយសម្រាប់ការហ្វឹកហាត់របស់ក្រុមបះបោរលីប៊ី ប៉ុន្តែ បញ្ហាចោទនៅពេលនេះ គឺមិនទាន់មានប្រទេសណាមួយចេញមុខទទួលហ្វឹកហ្វឺនក្រុមប្រឆាំងលីប៊ីទេ។
ចំណែកជម្រើសចុងក្រោយគឺការបំពាក់អាវុធ និងផ្តល់អ្នកជំនាញបរទេសដែលនឹងធ្វើជាទីប្រឹក្សារបស់ក្រុមបះបោរ។ គេសង្ឃឹមថា ជម្រើសចុងក្រោយនេះនឹងអាចជួយឲ្យការប្រយុទ្ធរបស់ក្រុមបះបោរ និងប្រតិបត្តិការទ័ពអាកាសរបស់អង្គការអូតង់មានប្រសិទ្ធិភាព។
នៅពេលដែលអូតង់នៅតែបដិសេធមិនធ្វើអន្តរាគមន៍យោធាលើដីគោក អង់គ្លេស វិញបានប្រកាស នៅថ្ងៃម្សិលមិញ បញ្ជូនអ្នកជំនាញការយោធារបស់ខ្លួនទៅធ្វើជាទីប្រឹក្សាកងទ័ពរបស់ក្រុមបះបោរលីប៊ី។ ទីក្រុងឡុងដ៍ចង់បញ្ជាក់ច្បាស់ថា កាបញ្ជូនអ្នកជំនាញការលើកនេះ មិនមែនជាការលុកលុយរបស់ទ័ពអង់គ្លេសក្នុងប្រទេសលីប៊ីទេ ប៉ុន្តែ ដើម្បីទៅជួយការពារប្រជាជនលីប៊ី។ ក្នុងរឿងបញ្ជូនអ្នកជំនាញការយោធានេះ អង់គ្លេសមានការប្រយ័ត្នប្រយែងខ្លាំង ដោយក្រសួងការបរទេសដែលជាអ្នកប្រកាសពីបេសកកម្មរបស់អ្នកជំនាញការអង់គ្លេស ប៉ុន្តែ មិនមែនក្រសួងការពារជាតិអង់គ្លេសទេ។ នេះជាមធ្យោបាយមួយ ដើម្បីកុំឲ្យគេចោទថា អង់គ្លេសបានរំលោភសេចក្តីសម្រេចចិត្តរបស់អង្គការសហប្រជាជាតិ ដែលបានហាមមិនឲ្យមានទ័ពបរទេសចូលទៅប្រយុទ្ធក្នុងប្រទេសលីប៊ី។
បើតាមក្រសួងការបរទេសអង់គ្លេស ទាហានដ៏មានបទពិសោធន៍ ជាង១០រូបនោះ មានអាវុធជាប់ខ្លួន តែស្លៀកពាក់ស៊ីវិល។ ពួកគេមានគោលដៅតែមួយគត់គឺបង្ហាញក្រុមបះបោរ ពីវិធីសាស្រ្តគេចខ្លួន ឲ្យរួចផុតពីការវាយប្រហាររបស់ទាហានកាដាហ្វ៊ី ប៉ុន្តែមិនមែនបង្រៀន យុទ្ធសាស្រ្តយោធា ដល់ពួកបះបោរ ដើម្បី ប្រយុទ្ធតបនឹងទ័ពកាដាហ្វ៊ីទេ។ ទោះយ៉ាងណា រដ្ឋមន្រ្តីការបរទេសអង់គ្លេសបាននិយាយសង្កត់ធ្ងន់ថា អ្នកជំនាញយោធាទាំងនោះនឹងជួយគាំទ្រ និងផ្តល់យោបល់ក្រុមប្រឹក្សាជាតិលីប៊ី ដើម្បីរៀបចំរចនាសម្ព័ន្ធយោធាត្រឹមត្រូវមួយនៅភាគខាងកើតលីប៊ី។ គួរដឹងថា ក្រៅពីបញ្ជូនទាហានដ៏មានបទពិសោធន៍របស់ខ្លួន កន្លងមក អង់គ្លេសធ្លាប់បានផ្តល់ អាវក្រោះ ទូរស័ព្ទទាក់ទង និងវិទ្យុទាក់ទងដល់ទ័ពប្រឆាំងលីប៊ី។
នៅថ្ងៃម្សិលមិញនេះ ប្រមុខការទូតរបស់លោកកាដាហ្វ៊ីក៏បាននិយាយស្នើឲ្យមានបទឈប់បាញ់ ដើម្បីបញ្ចប់សង្រ្គាម នៅលីប៊ី។ រដ្ឋមន្រ្តីការបរទេសលីប៊ីនៅបានបន្ថែមថា ក្រោយការអនុវត្តបទឈប់បាញ់ពិតប្រាកដ លីប៊ីនឹងសន្យារៀបចំការបោះឆ្នោតមួយ ដែលអាចតាមដានសង្កេតការណ៍ដោយអង្គការសហប្រជាជាតិ។ សំណើរបស់លោក Obeidi មាននិយាយផងដែរពីអនាគតរបស់លោកកាដាហ្វ៊ីដែលនឹងនៅតែជាមេដឹកនាំរបស់លីប៊ី។
វត្តមានរបស់ទាហានអង់គ្លេសនៅលីប៊ី មិនត្រឹមតែធ្វើឲ្យរដ្ឋាភិបាលលីប៊ីមិនសប្បាយចិត្តម្នាក់ប៉ុណ្ណោះទេ ប៉ុន្តែ សូម្បីរុស្ស៊ីដែលជាសមាជិកមួយដែររបស់ក្រុមប្រឹក្សាសន្តិសុខរបស់អង្គការសហប្រជាជាតិ ក៏រិះគន់ដែរថា ការដែលអង់គ្លេសជួយកម្លាំងបះបោរលីប៊ី នឹងធ្វើឲ្យពួកបះបោរលែងមានចេតនាចរចា សន្តិភាពជាមួយរដ្ឋាភិបាលរបស់លោកកាដាហ្វ៊ី។
បារាំងវិញ តាមរយៈរដ្ឋមន្រ្តីការបរទេសរបស់ខ្លួន គឺ លោកAlain Juppé បានបង្ហាញហើយថា បារាំងនឹងមិនបញ្ជូនទ័ពទៅប្រយុទ្ធច្បាំងនឹងទ័ពលោកកាដាហ្វ៊ីនៅលីប៊ីទេ។ ប៉ុន្តែ នៅថ្ងៃនេះ នៅក្រោយពេលដែលប្រមុខក្រុមប្រឹក្សាជាតិលីប៊ី ដែលជាក្រុមប្រឆាំង បានចូលជួបប្រធានាធិបតីបារាំង លោកនីកូឡា សាកូហ្ស៊ី បារាំងបញ្ជាក់ថា ខ្លួននឹងបញ្ជូនមន្រ្តីយោធាខ្លះដើម្បីអមការងាររបស់ក្រុមប្រឆាំងលីប៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ