នុយក្លេអ៊ែរ៖ សហភាពអឺរ៉ុបសម្រេចហាមឃាត់ការទិញប្រេងពីអ៊ីរ៉ង់
នៅថ្ងៃចន្ទ ២៣ មករា នេះ រដ្ឋមន្រ្តីក្រសួងការបរទេសសហភាពអឺរ៉ុបបានព្រមព្រៀងគ្នាថានឹងបញ្ឈប់ការទិញប្រេងពីអ៊ីរ៉ង់ ដើម្បីជាទណ្ឌកម្មបង្ខំឲ្យអ៊ីរ៉ង់បញ្ឈប់កម្មវិធីនុយក្លេអ៊ែរ ដែលគេសង្ស័យថា ធ្វើឡើងក្នុងគោលដៅយោធា។ ទណ្ឌកម្មនេះនឹងចូលជាធរមានពេញលេញ នៅថ្ងៃទី១ កក្កដា ២០១២។
ចុះផ្សាយនៅថ្ងៃ៖
ស្តាប់ - ០៥:៥៨
ប្រទេសសមាជិកសហភាពអឺរ៉ុបទាំង ២៧ បានព្រមព្រៀងគ្នាថា នឹងបញ្ឈប់រាល់ការចុះកិច្ចសន្យាទិញប្រេងពីអ៊ីរ៉ង់ ចាប់ពីពេលនេះទៅ។ ចំណែកឯកិច្ចសន្យា ដែលបានចុះរួចហើយ នឹងត្រូវបញ្ចប់ឲ្យអស់ នៅមុនថ្ងៃទី១ ខែកក្កដា ឆ្នាំ២០១២។
អ៊ីរ៉ង់នាំប្រេងចេញទៅលក់នៅបរទេស ប្រមាណជា ៣លានធុង ក្នុងមួយថ្ងៃៗ។ ក្នុងនោះ ២០% នាំទៅលក់នៅសហភាពអឺរ៉ុប។ ទណ្ឌកម្មរបស់សហភាពអឺរ៉ុបនឹងធ្វើឲ្យអ៊ីរ៉ង់បាត់បង់ប្រាក់ចំណូលប្រមាណពី ៥០លាន ទៅ៦០លានដុល្លារ ក្នុងមួយថ្ងៃៗ (បើគិតតាមតម្លៃប្រេងនៅលើទីផ្សារបច្ចុប្បន្ន ប្រមាណ ១០០ដុល្លារ ក្នុងមួយធុង)។
ក៏ប៉ុន្តែ ក្នុងពេលជាមួយគ្នានេះ សហភាពអឺរ៉ុបក៏នឹងត្រូវបាត់បង់ប្រភពផ្គត់ផ្គង់ប្រេងដ៏សំខាន់មួយដែរ។ ៦% នៃប្រេង ដែលប្រើប្រាស់នៅសហភាពអឺរ៉ុប គឺទិញមកពីអ៊ីរ៉ង់។ ក្នុងចំណោមនោះ អ៊ីតាលី អេស្ប៉ាញ និងក្រិក ដែលកំពុងតែប្រឈមមុខនឹងវិបត្តិសេដ្ឋកិច្ច ក៏កំពុងតែត្រូវការប្រេងពីអ៊ីរ៉ង់ខ្លាំងដែរ។ ហេតុដូច្នេះហើយទើបគេសម្រេចទុកពេលរហូតដល់ខែកក្កដា ដើម្បីឲ្យប្រទេសទាំងនេះស្វែងរកប្រភពផ្គត់ផ្គង់ប្រេងថ្មី ជំនួសប្រេងអ៊ីរ៉ង់។
សហភាពអឺរ៉ុបរំពឹងថា អារ៉ាប៊ីសាអ៊ូឌីត និងលីប៊ី អាចនឹងជំនួសកន្លែងអ៊ីរ៉ង់បាន។ អារ៉ាប៊ីសាអ៊ូឌីត គឺជាប្រទេសផលិតប្រេងច្រើនជាងគេបំផុតនៅលើពិភពលោក ហើយក៏ជាប្រទេសដែលប្រឆាំងនឹងកម្មវិធីនុយក្លេអ៊ែររបស់អ៊ីរ៉ង់ដែរ។ កាលពីពេលថ្មីៗនេះ មន្រ្តីអារ៉ាប៊ីសាអ៊ូឌីតបានធានាថា ប្រសិនបើទណ្ឌកម្មលើអ៊ីរ៉ង់នាំឲ្យមានការខ្វះខាតប្រេង នៅលើទីផ្សារអន្តរជាតិ អារ៉ាប៊ីសាអ៊ូឌីតត្រៀមខ្លួនបង្កើនការបូមប្រែងបន្ថែម ដើម្បីបំពេញតម្រូវការនេះ។
លីប៊ីវិញ ក៏កំពុងតែខិតខំជួសជុលហេដ្ឋារចនាសម្ព័ន្ធ ដែលខូចខាតដោយសារសង្រ្គាមដែរ ដើម្បីបង្កើនសមត្ថភាពបូមប្រេងឲ្យបានដូចមុនវិញ។ អឺរ៉ុប ដែលបានចេញមុខជួយផ្តួលរំលំរបបដឹកនាំរបស់លោកកាដាហ្វ៊ី រំពឹងថានឹងអាចមានអាទិភាពក្នុងការទិញប្រេងលីប៊ី។
ទោះជាយ៉ាងណា ទណ្ឌកម្មលើវិស័យប្រេងកាតរបស់អ៊ីរ៉ង់អាចមានប្រសិទ្ធិភាព ឬអត់ គឺអាស្រ័យទៅលើប្រទេសនៅអាស៊ី ដែលជាអ្នកទិញប្រេងពីអ៊ីរ៉ង់ច្រើនជាងគេបំផុត។ ចិន គឺជាប្រទេសទិញប្រេងពីអ៊ីរ៉ង់ច្រើនជាងគេ (២០% នៃការនាំចេញប្រេងរបស់អ៊ីរ៉ង់ ពោលគឺ ស្មើនឹងសហភាពអឺរ៉ុបទាំងមូល), ជប៉ុន ១៧%, ឥណ្ឌា ១៦% និងកូរ៉េខាងត្បូង ៩%។
នៅពេលនេះ សហរដ្ឋអាមេរិកកំពុងតែដាក់សម្ពាធលើជប៉ុន និងកូរ៉េខាងត្បូង ដែលជាសម្ព័ន្ធមិត្តឲ្យកាត់បន្ថយការទិញប្រេងពីអ៊ីរ៉ង់។ ចិនវិញ ថ្វីដ្បិតតែបានប្រកាសប្រឆាំងនឹងការដាក់ទណ្ឌកម្មលើអ៊ីរ៉ង់ ប៉ុន្តែ បានសម្រេចកាត់បន្ថយការទិញប្រេងពីអ៊ីរ៉ង់ជាងពាក់កណ្តាល នៅក្នុងខែមករា ២០១២នេះ ហើយគ្រោងនឹងបន្តធ្វើ នៅខែកុម្ភៈទៀត។ ក្នុងពេលជាមួយគ្នានេះ លោកនាយករដ្ឋមន្រ្តីចិន វេន ជៀប៉ាវ ទើបនឹងបញ្ចប់ដំណើរទស្សនកិច្ច ទៅកាន់ប្រទេសក្នុងតំបន់ឈូងសមុទ្រពែរស៍ ជាពិសេស អារ៉ាប៊ីសាអ៊ូឌីត និងអារ៉ាប់រួម ដែលសុទ្ធសឹងជាប្រទេសសម្បូរប្រេង និងជាគូប្រជែងខាងយុទ្ធសាស្រ្តរបស់អ៊ីរ៉ង់។
កាយវិការនេះបង្ហាញថា ចិនប្រហែលជាកំពុងតែព្យាយាមធ្វើយ៉ាងណាចៀសវាងកុំឲ្យសំណុំរឿងអ៊ីរ៉ង់ បង្កើតជាបញ្ហានាំឲ្យខូចទំនាក់ទំនងជាមួយអារ៉ាប៊ីសាអ៊ូឌីត ដែលជាប្រភពផ្គត់ផ្គង់ប្រេងដ៏សំខាន់បំផុតសម្រាប់ចិន (ចិនទិញប្រេងពីអារ៉ាប៊ីសាអ៊ូឌីត ច្រើនជាងទិញពីអ៊ីរ៉ង់)។
ម្យ៉ាងវិញទៀត ចិនទំនងជារំពឹងថា នៅក្រោមទណ្ឌកម្មរបស់សហភាពអឺរ៉ុប សហរដ្ឋអាមេរិក និងសម្ព័ន្ធមិត្តអ៊ីរ៉ង់ប្រាកដជានឹងត្រូវស្វះស្វែងរកទីផ្សារលក់ប្រេង ដើម្បីរកចំណូល។ ឆ្លៀតពេលនេះ ចិនក៏កាត់បន្ថយការទិញប្រេងពីអ៊ីរ៉ង់ ដើម្បីចរចាទាមទារឲ្យអ៊ីរ៉ង់បញ្ចុះតម្លៃ។
ប្រសិនបើអ៊ីរ៉ង់ត្រូវបង្ខំចិត្តលក់ប្រេង ក្នុងតម្លៃថោកជាងទីផ្សារមែន នេះមានន័យថា បើទោះជាអ៊ីរ៉ង់អាចបន្តនាំប្រេងចេញទៅលក់នៅបរទេសបានក៏ដោយ ក៏ប្រាក់ចំណូលបានមកពីការលក់ប្រេងនេះត្រូវធ្លាក់ចុះខ្លាំងដែរ។ ប៉ុន្តែ សំណួរនៅតែចោទឡើងថា តើទណ្ឌកម្មនេះពិតជាគ្រប់គ្រាន់អាចបង្ខំឲ្យរដ្ឋាភិបាលអ៊ីរ៉ង់បញ្ឈប់កម្មវិធីនុយក្លេអ៊ែររបស់ខ្លួនដែរឬទេ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ