តើអ៊ីរ៉ង់អាចបិទច្រកសមុទ្រ Ormuz បានដែរឬទេ?
នៅថ្ងៃចន្ទនេះ សមយុទ្ធកងទ័ពជើងទឹកអ៊ីរ៉ង់កំពុងបន្តធ្វើ នៅក្បែរច្រកសមុទ្រ Ormuz។ មីស៊ីលជាច្រើនដើម ត្រូវបានអ៊ីរ៉ង់បាញ់សាកល្បង ដើម្បីជាការបង្ហាញសាច់ដុំដល់ប្រទេសលោកខាងលិច។ អ៊ីរ៉ង់បានព្រមានថានឹងបិទច្រកសមុទ្រ Ormuz ដែលជាផ្លូវដឹកជញ្ជូនប្រេងដ៏សំខាន់ នៅឈូងសមុទ្រពែរ្ស ប្រសិនបើលោកខាងលិចដាក់ទណ្ឌកម្មលើវិស័យប្រេងកាតរបស់អ៊ីរ៉ង់។ តើអ៊ីរ៉ង់ពិតជាមានសិទ្ធិ និងមានសមត្ថភាពបិទច្រកសមុទ្រនេះដែរឬទេ?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:០៥
កាលពីថ្ងៃសៅរ៍ ៣១ ធ្នូ ២០១១ លោកអូបាម៉ាបានចុះហត្ថលេខាលើច្បាប់ដាក់ទណ្ឌកម្មលើការនាំចេញប្រេងរបស់អ៊ីរ៉ង់ ដើម្បីបង្ខំឲ្យអ៊ីរ៉ង់បញ្ឈប់កម្មវិធីនុយក្លេអ៊ែរ ដែលគេសង្ស័យថាធ្វើឡើងក្នុងគោលដៅផលិតអាវុធនុយក្លេអ៊ែរ។ សហភាពអឺរ៉ុបក៏កំពុងតែពិចារណាក្នុងការដាក់ទណ្ឌកម្មស្រដៀងគ្នានេះដែរ។ សហភាពអឺរ៉ុបនឹងប្រជុំអនុម័តទណ្ឌកម្មនេះ នៅចុងខែមករាខាងមុខ។
កាលពីសប្តាហ៍មុន អ៊ីរ៉ង់បានគំរាមថា បើសិនជាអ៊ីរ៉ង់មិនអាចនាំប្រេងចេញទៅលក់នៅបរទេសបានទេ ប្រទេសផ្សេងទៀតក្នុងឈូងសមុទ្រពែរ្ស ក៏មិនអាចដឹកប្រេងកាត់តាមច្រកសមុទ្រ Ormuz ទៅលក់នៅបរទេសបានដែរ។ នៅពេលនេះ កងទ័ពជើងទឹករបស់អ៊ីរ៉ង់កំពុងធ្វើសមយុទ្ធ នៅក្បែរច្រកសមុទ្រនេះ។
ច្រកសមុទ្រ Ormuz (នៅត្រើយខាងជើងមានអ៊ីរ៉ង់ ហើយនៅខាងត្បូងមានអារ៉ាប់រួម និងអូម៉ង់) គឺជាផ្លូវនាវាចរណ៍តែមួយគត់ សម្រាប់តភ្ជាប់តំបន់ឈូងសមុទ្រពែរ្ស ដែលជាតំបន់ជង្រុកប្រេងដ៏ធំ (អ៊ីរ៉ាក់ អ៊ីរ៉ង់ អារ៉ាប៊ីសាអ៊ូឌីត កូវ៉ែត កាតា និងអារ៉ាប់រួម) ទៅកាន់សមុទ្រអន្តរជាតិ ជាពិសេស មហាសមុទ្រឥណ្ឌា។ ច្រកសមុទ្រនេះជាច្រកតូចចង្អៀត (កន្លែងខ្លះមានទទឹងតែប្រមាណ ៥០គីឡូម៉ែត្រប៉ុណ្ណោះ) ដោយកន្លែងខ្លះ ផ្លូវនាវាចរណ៍ត្រូវឆ្លងកាត់ក្នុងដែនទឹករបស់អ៊ីរ៉ង់។
ជាការពិតថា អ៊ីរ៉ង់មានអធិបតេយ្យពេញទី នៅក្នុងដែនសមុទ្ររបស់ខ្លួន។ ក៏ប៉ុន្តែ Ormuz គឺជាច្រកសមុទ្រអន្តរជាតិ។ យោងតាមច្បាប់អន្តរជាតិ (អនុសញ្ញាអ.ស.ប. ស្តីពីច្បាប់សមុទ្រ ឆ្នាំ១៩៨២ និងការអនុវត្តជាទម្លាប់) មិនមានប្រទេសណាមួយអាចរារាំងនាវាចរណ៍កាត់តាមច្រកសមុទ្រអន្តរជាតិបានទេ បើទោះជាច្រកនេះ កាត់តាមដែនទឹករបស់ខ្លួនក៏ដោយ។
ដូច្នេះ ការបិទច្រកសមុទ្រ Ormuz គឺជាការរំលោភលើច្បាប់អន្តរជាតិ ដែលអាចត្រូវគេចាត់ទុកថាជាការប្រកាសសង្រ្គាម។
ក្រោយពីអ៊ីរ៉ង់គំរាមបិទច្រកសមុទ្រ Ormuz ក្រសួងការបរទេសបារាំងបានអំពាវនាវឲ្យអ៊ីរ៉ង់គោរពច្បាប់អន្តរជាតិ។ ចិនបានអំពាវនាវឲ្យប្រទេសពាក់ព័ន្ធទាំងអស់រក្សាស្ថិរភាព នៅ Ormuz។ ចំណែកក្រសួងការពារជាតិអាមេរិកវិញ បានព្រមានថា អាមេរិកនឹងមិនបណ្តោយឲ្យអ៊ីរ៉ង់បិទច្រកជាយុទ្ធសាស្រ្តនេះទេ។ នេះមានន័យថា អាមេរិកនឹងប្រើកម្លាំងទ័ព ដើម្បីធានាការធ្វើនាវាចរណ៍ នៅច្រកសមុទ្រ Ormuz។ អាមេរិកមានមូលដ្ឋានទ័ពជើងទឹកជាអចិន្រ្តៃយ៍ នៅក្នុងឈូងសមុទ្រពែរ្ស (នៅប្រទេសបារ៉ែន) ក្បែរច្រកសមុទ្រ Ormuz។
អគ្គបញ្ជាការកងទ័ពជើងទឹកអ៊ីរ៉ង់ធ្លាប់បានប្រកាសថា សម្រាប់កងទ័ពអ៊ីរ៉ង់ ការបិទច្រកសមុទ្រ Ormuz គឺជារឿងងាយស្រួលជាងផឹកទឹកទៅទៀត។ ក៏ប៉ុន្តែ ប្រសិនបើមានការប្រឈមមុខដាក់គ្នា កងទ័ពជើងទឹកអ៊ីរ៉ង់ទំនងជាមិនអាចទប់នឹងកងទ័ពជើងទឹករបស់អាមេរិកបានទេ។ អ្នកជំនាញខាងផ្នែកយុទ្ធសាស្រ្តទ័ពជាច្រើនយល់ថា អ៊ីរ៉ង់ទំនងជាអាចដាក់ពង្រាយមីនប្រឆាំងនាវា និងធ្វើការលបវាយឆ្មក់ ដើម្បីរំខានការធ្វើនាវាចរណ៍ ប៉ុន្តែ មិនអាចបិទច្រកសមុទ្រ Ormuz ទាំងស្រុងបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ