សហភាពអឺរ៉ុបព្រមព្រៀងគ្នាក្នុងការដាក់ទណ្ឌកម្មលើវិស័យប្រេងកាតអ៊ីរ៉ង់
កាលពីថ្ងៃពុធ ម្សិលមិញនេះ មន្រ្តីការទូតសហភាពអឺរ៉ុបបានឲ្យដឹងថា ប្រទេសជាសមាជិកសហភាពអឺរ៉ុបបានព្រមព្រៀងគ្នាជាគោលការណ៍ហើយថា នឹងដាក់ទណ្ឌកម្មលើការនាំចេញប្រេងកាតរបស់អ៊ីរ៉ង់។ កាលពីថ្ងៃសៅរ៍កន្លងទៅនេះ អាមេរិកក៏បានសម្រេចដាក់ទណ្ឌកម្មលើវិស័យប្រេងកាតរបស់អ៊ីរ៉ង់ដែរ។ ក្រោយពីមានទណ្ឌកម្មទាំងនេះ ទីផ្សាររូបិយវត្ថុអ៊ីរ៉ង់កំពុងតែច្រួលច្របល់យ៉ាងខ្លាំង។ ក្នុងពេលជាមួយគ្នា តម្លៃប្រេងឆៅ នៅលើទីផ្សារអន្តរជាតិ ក៏បានកើនឡើងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
ថ្វីដ្បិតតែមានការព្រមព្រៀងគ្នា ជាគោលការណ៍ នៅពេលនេះ ក៏ប៉ុន្តែ គេត្រូវរង់ចាំដល់ចុងខែមករា ទើបរដ្ឋមន្រ្តីក្រសួងការបរទេសសហភាពអឺរ៉ុប ប្រជុំអនុម័តណ្ឌកម្មលើអ៊ីរ៉ង់។ ទោះជាយ៉ាងណា ការព្រមព្រៀងគ្នាជាគោលការណ៍នេះបានទទួលនូវការអបអរសាទរភ្លាមៗ ពីសំណាក់សហរដ្ឋអាមេរិក ដែលទើបនឹងបានសម្រេចបង្កើនទណ្ឌកម្មលើអ៊ីរ៉ង់ កាលពីថ្ងៃសៅរ៍កន្លងទៅនេះ។ ទណ្ឌកម្មដែលអាមេរិកសម្រេចដាក់លើអ៊ីរ៉ង់ កាលពីថ្ងៃសៅរ៍នេះ គឺដាក់ទាំងទៅលើវិស័យប្រេងកាត និងវិស័យធនាគារ។
នៅថ្ងៃចន្ទ ពីរថ្ងៃក្រោយពីអាមេរិកសម្រេចដាក់ទណ្ឌកម្ម លុយរៀលរបស់អ៊ីរ៉ង់ (Rial) បានធ្លាក់ថ្លៃរហូតដល់ទៅ ១២% ធៀបនឹងលុយដុល្លារ។ រហូតមកទល់នឹងថ្ងៃពុធ ម្សិលមិញនេះ លុយអ៊ីរ៉ង់នៅតែបន្តធ្លាក់ចុះតទៅទៀត។ អន្តរាគមន៍របស់ធនាគារកណ្តាលអ៊ីរ៉ង់ ដើម្បីទប់លុយរៀលកុំឲ្យធ្លាក់ចុះ បានធ្វើឲ្យទីផ្សាររូបិយវត្ថុអ៊ីរ៉ង់កាន់តែច្របូកច្របល់ខ្លាំងឡើងថែមទៀត រហូតធ្វើឲ្យអ្នករកស៊ីប្តូរប្រាក់ខ្លះ នៅអ៊ីរ៉ង់ បានសម្រេចបិទទ្វារផ្អាកការលក់ដូរ។
ដំណឹងស្តីពីការព្រមព្រៀងក្នុងសហភាពអឺរ៉ុប ក្នុងការដាក់ទណ្ឌកម្មលើអ៊ីរ៉ង់ ក៏បានធ្វើឲ្យតម្លៃប្រេងឆៅ កើនឡើងយ៉ាងខ្លាំងដែរ តាំងពីថ្ងៃម្សិលមិញ។
គួរបញ្ជាក់ថា អ៊ីរ៉ង់គឺជាប្រទេសនាំចេញប្រេងដ៏ធំ លំដាប់ទី៤ នៅលើពិភពលោក។ សេដ្ឋកិច្ចរបស់អ៊ីរ៉ង់ពឹងផ្អែកយ៉ាងខ្លាំងលើការលក់ប្រេងឆៅ។ ដូច្នេះ ទណ្ឌកម្មលើវិស័យប្រេងកាតអ៊ីរ៉ង់ អាចនឹងធ្វើឲ្យសេដ្ឋកិច្ចរបស់អ៊ីរ៉ង់ធ្លាក់ដុនដាប។
ដោយសារតែទណ្ឌកម្មរបស់លោកខាងលិច ធ្វើឡើងក្រៅក្របខ័ណ្ឌអ.ស.ប. អ៊ីរ៉ង់នៅតែអាចលក់ប្រេងទៅឲ្យប្រទេសផ្សេងទៀត ដែលមិនដាក់ទណ្ឌកម្មលើអ៊ីរ៉ង់ ជាពិសេស ប្រទេសនៅអាស៊ី ដូចជា ចិន ជប៉ុន និងឥណ្ឌា ជាដើម។ ក៏ប៉ុន្តែ ប្រទេសទាំងនេះប្រាកដជាឆ្លៀតឱកាសទាមទារឲ្យអ៊ីរ៉ង់បន្ទាបតម្លៃ ទើបព្រមទិញប្រេងរបស់អ៊ីរ៉ង់។ ដូច្នេះ អ៊ីរ៉ង់អាចនឹងត្រូវបាត់បង់ចំណូលយ៉ាងច្រើនពីការលក់ប្រេង។
ក៏ប៉ុន្តែ ប្រទេសលោកខាងលិចក៏អាចនឹងត្រូវទទួលរងផលប៉ះពាល់ពីការដាក់ទណ្ឌកម្មលើវិស័យប្រេងកាតរបស់អ៊ីរ៉ង់នេះដែរ។ គឺផលប៉ះពាល់លើផ្នែកសេដ្ឋកិច្ច ដែលបណ្តាលមកពីការកើនឡើងនៃតម្លៃប្រេងឆៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ