ការបោះឆ្នោតសភា ក្រោមការត្រួតពិនិត្យដ៏ហ្មត់ចត់
នៅថ្ងៃសៅរ៍ទី ៣០ មេសា នេះ បណ្តាជនឡាវជាងបីលាននាក់ ត្រូវអញ្ជើញទៅចូលរួមបោះឆ្នោតសភា ដើម្បីជ្រើសរើសសមាជិកសភាថ្មី។ សភាឡាវ ដែលស្ថិតក្រោមការត្រួតត្រាទាំងស្រុងពីសំណាក់គណបក្សកុម្មុយនិស្តកាន់អំណាច។ ប៉ុន្តែអ្នកវិភាគនយោបាយជាច្រើនមានជំនឿថា សភានេះ បាននិងកំពុងទទួលឥទ្ធិពល ពីលោកសេរីយ៉ាងច្រើននារយៈពេលប៉ុន្មានឆ្នាំចុងក្រោយនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
ការិយាល័យបោះឆ្នោតបានបើកទ្វារតាំងពីព្រលឹម ដើម្បីអនុញ្ញាតឲ្យប្រជាពលរដ្ឋឡាវ ធ្វើការជ្រើសរើសតំណាងរបស់ខ្លួនចំនួន ១៣២រូប មកជំនួសសមាជិកចាស់ ដែលមានតែ១១៥នាក់។ ប៉ុន្តែ ក្នុងចំណោមបេក្ខជនឈរឈ្មោះទាំង១៩០នាក់ មានបេក្ខជនតែពីររូបប៉ុណ្ណោះ ដែលជាជនឯករាជ្យ មិនមែនជាតំណាងបក្សកុម្មុយនិស្ត។ លទ្ធផលនៃការបោះឆ្នោតនេះ នឹងត្រូវប្រកាសនៅក្នុងរយៈពេលមួយសប្តាហ៍ទៀត។ ហើយសភាថ្មីនេះ នឹងមានភារៈអនុម័តជ្រើសតាំងរដ្ឋាភិបាលថ្មីនៅខែមិថុនា។
ដូចជាក្នុងបណ្តាប្រទេសកុម្មុយនិស្តផ្សេងទៀតដែរ អំណាចនយោបាយទាំងមូល ស្ថិតក្នុងកណ្តាប់ដៃគណៈកម្មាធិការមជ្ឈិមបក្ស ប៉ុន្តែអ្នកសង្កេតការណ៍ អ្នកវិភាគ ព្រមទាំងអ្នកការទូតបរទេសយល់ថា សភាឡាវកំពុងធ្វើដំណើរទៅមុខ ឆ្ពោះទៅរកការប្តូរផ្លាស់តួនាទីជាប្រពៃណី ដែលមានត្រឹមជាការិយាល័យកត់ត្រា ទៅជាស្ថាប័នមួយដែលមានអត្តសញ្ញាណពិតៗ និងចេះធ្វើការកែសម្រួលច្បាប់ខ្លះប្រកបដោយខ្លឹមសារ។ បើតាមអ្នកវិភាគដដែល រាល់ការអនុម័ត ឬការកែទម្រង់របស់សភា ដែលធ្វើឡើង សុទ្ធតែត្រូវឆ្លងកាត់ការសម្រេចចិត្ត និងការយល់ព្រមពីគណបក្សកាន់អំណាច។
គណបក្សដែលបានធ្វើឲ្យពិភពលោកភ្ញាក់ផ្អើល កាលពីខែធ្នូឆ្នាំ២០១០ តាមរយៈការលាលែងចេញពីតំណែងរបស់នាយករដ្ឋមន្ត្រីឡាវ លោក ប៊ូសោន ប៊ូផាវ៉ាន់ និងការតែងតាំងលោក ថុងស៊ីង ថាម៉ាវង្ស ជាប្រធានសភា។ លើវិស័យសេដ្ឋកិច្ចវិញ នៅខែមីនាកន្លងទៅថ្មីៗនេះ បក្សប្រជាជនបដិវត្តឡាវ បានគូសវាសខ្សែបន្ទាត់នយោបាយសេដ្ឋកិច្ច សម្រាប់ពេលអនាគត។ បើតាមតួលេខផ្លូវការ កំណើតសេដ្ឋកិច្ចប្រចាំឆ្នាំរបស់ ឡាវ មានជាមធ្យម ប្រមាណ ៧,៩% ពីឆ្នាំ២០០៦ ដល់ឆ្នាំ២០១០។ ប្រទេសនេះ មានកម្មវត្ថុចាកចេញពីបញ្ជីប្រទេសក្រីក្របំផុតនៅឆ្នាំ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ