បាក់តេរីរាតត្បាតនៅអឺរ៉ុប ធន់នឹងថ្នាំផ្សះគ្រប់ប្រភេទ
ក្រុមអ្នកស្រាវជ្រាវបានរកឃើញអត្តសញ្ញាណនៃបាក់តេរី ដែលកំពុងរាតត្បាត សម្លាប់ជីវិតមនុស្ស អស់១៨នាក់ ក្នុងសហភាពអឺរ៉ុបហើយ។ វាជាបាក់តេរីដ៏កាច ដ៏កម្រកើតមាន ព្រមទាំងធន់នឹងថ្នាំសម្លាប់មេរោគ (ថ្នាំផ្សះ antibiotique)បំផុត។ ការធន់នឹងថ្នាំដែលជាហេតុធ្វើឲ្យការព្យាបាលអ្នកជំងឺជិត២ពាន់នាក់ ជួបការលំបាកយ៉ាងខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
“កម្របំផុត ពុលបំផុត រីករាលដាលលឿនបំផុត ហើយធន់នឹងថ្នាំសម្លាប់មេរោគ អង់ទីប៊ីយូទិចបំផុត” ! នេះហើយជាអ្វីដែល អ្នកស្រាវជ្រាវអាល្លឺម៉ង់ និងចិន អាចកំណត់បានអំពីបាក់តេរី ហៅខ្លីថា E-coli (Escherichia coli enterohémorragique (Eceh))។ អ្នកវិទ្យាសាស្ត្រទាំងអស់នេះ ក៏បានចាត់ទុកថា E.coli ជាប្រភេទបាក់តេរីថ្មី បំពុលសុខភាពខ្លាំង និងទំនងជាអាចធន់នឹងថ្នាំផ្សះគ្រប់ប្រភេទទាំងអស់។ ដោយហេតុតែភាពកាចចម្លែក ព្រមទាំងធន់នឹងថ្នាំ ទើបក្រុមគ្រូពេទ្យជួបការលំបាកយ៉ាងខ្លាំងនឹងធ្វើការព្យាបាលអ្នកជំងឺ រហូតសង្គ្រោះអ្នកជំងឺមិនទាន់ បង្កឲ្យមានមនុស្សស្លាប់១៧នាក់នៅប្រទេសអាល្លឺម៉ង់ និងម្នាក់នៅប្រទេសស៊ុយអែត។
ការស្រាវជ្រាវដំបូងបង្ហាញថា ជំងឺរាតត្បាតនៅក្នុងអឺរ៉ុបនេះ បណ្តាលមកពី បាក់តេរី ម្យ៉ាងដែលមានទម្រង់ដូច បាក់តេរី E.Coli O104 ដែលជាការបង្កឲ្យមានការរាករូស។ ប៉ុន្តែពេលនេះគេបានដឹងបន្ថែមទៀត មេរោគនិងការរាតត្បាតរឹតតែកាច និងសាហាវ ដោយបាក់តេរីនេះមានហ្សែនពីរជួបគ្នា គឺ Ecea និង Eceh។
ចំណែកអង្គការសុខភាពពិភពលោកវិញ បានទទួលស្គាល់ថា បាក់តេរីដ៏កាចសាហាវ ធន់នឹងថ្នាំនេះ ជាបាក់តេរី ដែលកម្របំផុត មិនដែលធ្លាប់បង្កការរាតត្បាតពីមុនមកទេ។ គេធ្លាប់ឃើញវា បង្កជំងឺនៅក្នុងករណីឯកា និងម្តងម្កាលដែរ ហេតុដូច្នេះហើយបានជាOMS មិនទាន់អាចចាត់ទុក បាក់តេរី E. Coliនេះថា ជាបាក់តេរីថ្មីទាំងស្រុងបានទេ នៅពេលនេះ។
ការងារចម្បងបន្តទៅទៀត គឺស្រាវជ្រាវរកមូលហេតុនៃការចម្លងមេរោគ ដើម្បីការពារទប់ទល់នឹងបាក់តេរីដែលហាក់ស៊ាំនឹងថ្នាំព្យាបាលស្ទើរគ្រប់ប្រភេទ នៅពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ