"សង្គ្រាមបន្លែ" រវាងសហភាពអឺរ៉ុប និងសហព័ន្ធរុស្ស៊ី
ជាប្រតិកម្មទល់នឹងការទាមទាររបស់គណៈកម្មការអឺរ៉ុប ឲ្យទីក្រុងម៉ូស្គូ លុបទៅវិញទៅជាបន្ទាន់ភ្លាម បម្រាមហាមមិនឲ្យនាំបន្លែ ពីគ្រប់ទាំង២៧ប្រទេសសហភាពអឺរ៉ុប ចូលមករុស្ស៊ី សម្រាប់មួយរយៈពេលសិន គិតចាប់ពីថ្ងៃទី២មិថុនាមក ពីព្រោះ បម្រាមនេះជា ”ជំហានលើសជ្រុល” ពីស្ថានការណ៍ដែលមានអាជ្ញាធរសុខាភិបាលរុស្ស៊ី បានដាក់ល័ក្ខខ័ណ្ឌ ៤ ឲ្យសហភាពអឺរ៉ុបបំពេញជាមុនសិន ទម្រាំខ្លួនអាចលុបទៅវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ល័ក្ខខ័ណ្ឌទាំងនោះ បានត្រូវវេជ្ជបណ្ឌិតដើមខ្សែខាងអនាម័យទូទាំងប្រទេសរុស្ស៊ី លោក ហ្គេណាឌី អូនីហ្សេនកូ ដែលជាអ្នកទទួលខុសត្រូវ ចំពោះសន្តិសុខគ្រឿងបរិភោគក្នុងប្រទេសរុស្ស៊ី និងជាអ្នកបានចេញបទបញ្ជា មិនឲ្យនាំបន្លែពីគ្រប់ទាំង២៧ប្រទេសសហភាពអឺរ៉ុបចូលមករុស្ស៊ី លើកឡើងដូចតទៅ ៖
ទី១- សហភាពអឺរ៉ុប ត្រូវកំណត់ឲ្យបានជាក់ច្បាស់ឈ្មោះមេរោគ នៃជម្ងឺរាករូស និង អំពីមូលហេតុនៃការសាយភាយមេរោគនេះ។ ជាការកត់សម្គាល់មកទល់ឥឡូវ ជម្ងឺរាករូសនេះ បានផ្តាច់ជីវិតមនុស្សគ្រាន់តែនៅប្រទេសអាល្លឺម៉ង់ អស់ជិត២០នាក់ហើយ និងឆ្លងរាលដាលដល់មនុស្សជាង១.៥០០នាក់ នៅតាម៩ប្រទេសទៅហើយនៃសហភាពនេះ។
ទី២- សហភាពអឺរ៉ុប ត្រូវវែកញែកឲ្យឃើញ “តើតាមផ្លូវណា ដែលប្រព្រឹត្តទៅការឆ្លងនៃជម្ងឺរាករូសនោះ ពីមនុស្សម្នាក់ទៅមនុស្សម្នាក់ផ្សេង ?”។
ទី៣- សហភាពអឺរ៉ុប ត្រូវប្រាប់មករុស្ស៊ី ឲ្យចំឈ្មោះតែម្តង កន្លែងជាប្រភព ដែលបន្លែត្រូវផ្ចាញ់ដោយមេរោគដ៏សែនគ្រោះថ្នាក់នោះ។
ទី៤- សហភាពអឺរ៉ុប ត្រូវបញ្ជាក់មករុស្ស៊ីថា ខ្លួនចេះក្តោបក្តាប់ស្ថានការណ៍ឲ្យនៅក្រោមការត្រួតពិនិត្យមែន រីឯជម្ងឺរាករូសផ្ទាល់ គឺឈប់ឆ្លងរាលដាលទៀតឡើយ។
បន្លែដែលរុស្ស៊ី នាំចូលពីក្រៅមានអត្រាដូចតទៅ ៖ ៣០% គឺពីប្រទេសចិន ៣០% គឺពីប្រទេសទួរគី ២០%ពីសហភាពអឺរ៉ុប និង២០%ទៀតពីបណ្តាប្រទេសផ្សេង។
២០% នៃបន្លែដែលរុស្ស៊ីនាំចូលពីសហភាពអឺរ៉ុបមានទឹកប្រាក់ ២.២០០លានដុល្លារអាមេរិក ហើយពីក្នុងនោះ ធ្លាក់ទៅលើត្រសក់ដែលជាបន្លែជាប់សង្ស័យថា ពាំមេរោគបណ្តាលឲ្យផ្ទុះឡើងជាជម្ងឺរាករូសនោះ គឺក្នុងបរិមាណ២២០.០០០តោន តម្លៃ១៨០លានដុល្លារអាមេរិក។
រុស្ស៊ីវិញមានចំណែកប្រមាណ២៥% នៃការនាំចេញនូវបន្លែ ពីខាងសហភាពអឺរ៉ុប។
គណៈកម្មការអឺរ៉ុប ក្នុងការទាមទាររបស់ខ្លួនបានព្រមានថា បើរុស្ស៊ីមិនព្រមលុបទៅវិញទេ បម្រាមហាមការនាំចូលនោះ បញ្ហានេះអាចត្រូវលើកយកទៅទទួលការពិភាក្សាក្នុង“ជំនួបកំពូលរុស្ស៊ី-សហភាពអឺរ៉ុប” ដែលនឹងប្រព្រឹត្តទៅនៅរុស្ស៊ីនៅថ្ងៃទី៩និងទី១០មិថុនា ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ