បាក់តេរី E.coli O 104 ដ៏កាចសាហាវកំពុងគំរាមអឺរ៉ុប
បាក់តេរីE.coli O 104 ដ៏កាចសាហាវបានចាប់ធ្វើការគំរាមមុនគេនៅទីក្រុងHambourg ដែលឋិតនៅប៉ែកខាងជើងនៃប្រទេសអាល្លឺម៉ង់។ បាក់តេរី E.coli O 104ដ៏ចម្លែកនិងដ៏សាហាវនេះបានសម្លាប់មនុស្សយ៉ាងតិច១៧នាក់ និងបានរីករាលដាលដល់ប្រទេសឯទៀតៗនៃសហភាពអឺរ៉ុប ហើយនិងបានឆ្លងរហូតដល់សហរដ្ឋអាមេរិកផងទៀត។ បើយោងតាមរបាយការណ៍ចុងក្រោយរបស់សហភាពអឺរ៉ុបបានឲ្យដឹងថា ផ្លែត្រសក់អេស្ប៉ាញុលដែលគេសង្ស័យពីពេលដំបូងថាមានផ្ទុក បាក់តេរី E.coli O 104ដ៏កាចសាហាវនោះ បានត្រូវអ្នកវិភាគវិនិច្ឆ័យថា ជាអ្នកគ្មានការទទួលខុសត្រូវក្នុងបញ្ហានេះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:១៤
បើយោងតាមការវិភាគដែលធ្វើដោយអាជ្ញាធរអាល្លឺម៉ង់និងអាជ្ញាធរអេស្ប៉ាញនៅ២៤ម៉ោងចុងក្រោយនេះបានឲ្យដឹងថា ផ្លែត្រសក់ដែលផលិតនៅប៉ែកខាងត្បូងនៃប្រទេសអេស្ប៉ាញ ពុំមែនជាប្រភព នៃការចម្លង បាក់តេរី E.coli O 104ដ៏ចម្លែកនិងដ៏កាចសាហាវឡើយ។ ផ្លែត្រសក់អេស្ប៉ាញដែលគេសង្ស័យដោយភ័ន្តច្រឡំពីពេលដំបូងថាជាអ្នកដើមហេតុ នៃការចម្លង បាក់តេរី E.coli O 104។
សូមរំលឹកថា កាលពីថ្ងៃទី២៧ឧសភាឆ្នាំ២០១១កន្លងទៅប្រទេសអាល្លឺម៉ង់បានចោទប្រកាន់ថា ផ្លែត្រសក់ដែលផលិតនៅប៉ែកខាងត្បូងនៃប្រទេសអេស្ប៉ាញ មានផ្ទុកនូវ បាក់តេរី E.coli O 104ដ៏កាចសាហាវ ដែលជាប្រភពនៃវិបត្តិអនាម័យចំណីអាហារដែលបានបណ្តាលឲ្យមានមនុស្សស្លាប់១៧នាក់។ ការចោទប្រកាន់នេះបានត្រូវអាជ្ញាធរអេស្ប៉ាញបដិសេធតាំងពីពេលដំបូង។
មកទល់ពេលនេះ គេនៅពុំទាន់រកឃើញមូលហេតុនិងប្រភព នៃការចម្លង បាក់តេរី E.coli 0104នៅឡើយ។ ទាំងនេះបានបណ្តាលឲ្យប្រជាជនអឺរ៉ុបលែងហ៊ានទិញផ្លែត្រសក់ ផ្លែត្រប់សណ្តាយ ប៉េងប៉ោះ ឬសាឡាដយកទៅបរិភោគដូចពេលមុនៗ។ ហេតុដូច្នេះហើយបានជាទីក្រុងម៉ាឌ្រីដបានបន្ទោសទីក្រុងប៊ែរឡាំងថា ការចោទប្រកាន់របស់អាជ្ញាធរអាល្លឺម៉ង់ទៅលើ ផ្លែត្រសក់ដែលផលិតនៅប៉ែកខាងត្បូងនៃប្រទេសអេស្ប៉ាញបានធ្វើឲ្យផលិតករអេស្ប៉ាញខាតបង់ប្រាក់ជាង២០០លានអឺរ៉ូក្នុង១សប្តាហ៍ នេះបើផ្អែកលើតួលេខរបស់សហព័ន្ធអេស្ប៉ាញខាងផលិតនិងនាំចេញផ្លែឈើហើយនិងបន្លែ។
នៅថ្ងៃព្រហស្បតិ៍នេះ ប្រទេសរុស្ស៊ីបានហាមឃាត់ពុំឲ្យនាំចូលបន្លែស្រស់មកពីសហភាពអឺរ៉ុប ដោយអាជ្ញាធររុស្ស៊ីបារម្ភខ្លាចមានការចម្លង បាក់តេរី E.coli O 104។ ហើយការហាមឃាត់ពុំឲ្យនាំចូលបន្លែស្រស់មកពីសហភាពអឺរ៉ុបនេះ បានចាប់ចូលជាធរមាននៅព្រឹកថ្ងៃព្រហស្បតិ៍នេះ។
បើយោងតាមប្រភពអាល្លឺម៉ង់បានឲ្យដឹងថា តុល្យាការបច្ចុប្បន្ននេះមានអ្នកធ្លាក់ខ្លួនឈឺប្រមាណ១ ៩០០នាក់ ហើយក្នុងចំណោមនេះមាន៣៧៣ករណីដែលមានលក្ខណៈធ្ងន់ធ្ងរ។ ជម្ងឺរាតត្បាតដោយសារ បាក់តេរី E.coli O 104បានរីករាលដាល នៅទូទាំងសហភាពអឺរ៉ុប ហើយបានរាលដាលឆ្លងដល់ទៅសហរដ្ឋអាមេរិកផងទៀត។ លក្ខណៈមួយទៀតគួរឲ្យកត់សម្គាល់គឺ អ្នកទាំងនោះសុទ្ធតែបានធ្វើការឆ្លងកាត់ប្រទេសអាល្លឺម៉ង់ ជាពិសេសនៅតំបន់នៃទីក្រុងHambourg ដែលឋិតនៅប៉ែកខាងជើងនៃប្រទេសអាល្លឺម៉ង់។
ចំណែកឯតួលេខនៃចំនួនមនុស្សស្លាប់វិញបានកើនឡើងដល់ទៅ១៧នាក់ដែលក្នុងនោះមាន១៦នាក់នៅប្រទេសអាល្លឺម៉ង់ ហើយនិងម្នាក់នៅប្រទេសស៊ុយអែដ។
រីឯរោគសញ្ញាដែលបង្ហាញឲ្យដឹងថា គេបានទទួលការចម្លង បាក់តេរី E.coli O 104គឺ ជាបឋមមានការរាករូសដោយមានឈាមក្នុងលាមកហើយនិងមានលេចចេញឈាមនៅក្នុងប្រព័ន្ធរំលាយអាហារ។ នៅក្នុងករណីដែលធ្លាក់ធ្ងន់ធ្ងរគឺវាធ្វើឲ្យមានបញ្ហាប៉ះពាល់ដល់វក្កំឬតម្រងទឹកនោមផងទៀត។ ហេតុដូច្នេះហើយ បានជាសហភាពអឺរ៉ុបកំពុងខិតខំធ្វើការស្រាវជ្រាវដើម្បីឲ្យដឹងពីមូលហេតុពិតប្រាកដនៃការចម្លង បាក់តេរី E.coli O 104ដ៏កាចសាហាវដែលកំពុងតែគំរាមអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ