ប្រមុខការទូត ហោ ណាំហុងចេញទៅអាមេរិកនៅថ្ងៃសៅរ៍ស្អែក
លោកប្រមុខការទូត ហោ ណាំហុង នឹងចេញដំណើរពីកម្ពុជា នៅល្ងាចថ្ងៃសៅរ៍ទី៩មិថុនាស្អែកនេះ ដើម្បីទៅបំពេញទស្សនកិច្ចជាផ្លូវការនៅសហរដ្ឋអាមេរិកចាប់ពីថ្ងៃទី១២ខែមិថុនាឆ្នាំ២០១២។ ដំណើរទស្សនកិច្ចរបស់លោក ហោ ណាំហុងនៅអាមេរិកដើម្បីធ្វើឲ្យកាន់តែស៊ីជម្រៅបន្ថែមទៀតនិងដើម្បីរិះរកផ្លូវពង្រឹងស្ថិរភាពក្នុងតំបន់និងធានាវិបុលភាពរួមសម្រាប់កម្ពុជា-អាមេរិកក៏ដូចជាតំបន់អាស៊ី-ប៉ាស៊ីហ្វិកទាំងមូល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៩
លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេសកម្ពុជា និងជាប្រធានអាស៊ាន នឹងដឹកនាំគណៈប្រតិភូ អញ្ជើញទៅទស្សនកិច្ចផ្លូវការ នៅសហរដ្ឋអាមេរិក នៅថ្ងៃទី១២ ខែមិថុនា ឆ្នាំ២០១២។ លោក ហោ ណាំហុង នឹងចេញដំណើរពីភ្នំពេញ នាល្ងាចថ្ងៃសៅរ៍ ទី៩មិថុនា។
សេចក្តីជូនព័ត៌មាន របស់ក្រសួងការបរទេស ចុះថ្ងៃទី៨ ខែមិថុនា ឆ្នាំ២០១២ បានបង្ហាញថា ក្នុងអំឡុងពេលទស្សនកិច្ច លោកឧបនាយករដ្ឋមន្ត្រី ហោ ណាំហុង នឹងជួបពិភាក្សាការងារ ជាមួយលោកស្រី ហ៊ីលឡារី រ៉ូដាម គ្លីនតុន។
សេចក្តីប្រកាសលើកឡើងថា នៅអាមេរិក លោកឧបនាយករដ្ឋមន្ត្រី ហោ ណាំហុង ក៏នឹងជួប ពិភាក្សាការងារដាច់ដោយឡែកជាមួយលោក ជីម វេប (Jim Webb) សមាជិកព្រឹទ្ធសភា និងជាប្រធានអនុគណៈកម្មការកិច្ចការអាស៊ីប៉ាស៊ីហ្វិក និងអាស៊ីបូព៌ា និងលោក ដានីញែល រូស្ស៊ែល (Daniel Russel) ជំនួយការពិសេសរបស់ប្រធានាធិបតី ទទួលបន្ទុកកិច្ចការអាស៊ីបូព៌ាផងដែរ។
ក្រៅពីនោះ លោកឧបនាយករដ្ឋមន្ត្រី ហោ ណាំហុង នឹងថ្លែងសុន្ទរកថា ស្តីពី “ការអភិវឌ្ឍន៍នៅកម្ពុជា និងទំនាក់ទំនងកម្ពុជា-សហរដ្ឋអាមេរិក” នៅមជ្ឈមណ្ឌលស្រាវជ្រាវយុទ្ធសាស្ត្រអន្តរជាតិ។
ដំណើរទស្សនកិច្ចរបស់លោក ហោ ណាំហុង ត្រូវបានអ្នកនាំពាក្យក្រសួងការបរទេស លោក កុយ គួង បានឲ្យដឹងនៅថ្ងៃសុក្រនេះថា គឺដើម្បីពង្រឹងចំណងទំនាក់ទំនងរវាងប្រទេសកម្ពុជា និងសហរដ្ឋអាមេរិក ក៏ដូចជាក្នុងតំបន់ និងទំនាក់ទំនងរវាងអាមេរិក និងអាស៊ាន។
ក្នុងលិខិត កាលពីថ្ងៃទី១៧ ខែឧសភា ឆ្នាំ២០១២ លោកស្រីប្រមុខការទូតអាមេរិក ហ៊ីលឡារី គ្លីនតុន បានសរសេរលិខិតអញ្ជើញលោកហោ ណាំហុង ទៅបំពេញទស្សនកិច្ច នៅទីក្រុងវ៉ាស៊ីនតោន នៅថ្ងៃទី១២ ខែមិថុនា ឆ្នាំ២០១២។ តាមលោកស្រី គ្លីនតុន ទស្សនកិច្ចរបស់លោក ហោ ណាំហុង គឺជាឱកាសដ៏សំខាន់មួយ ដើម្បីរិះរកផ្លូវ សម្រាប់ឲ្យអាមេរិក និងកម្ពុជា ធ្វើការរួមគ្នា សំដៅពង្រីកទំនាក់ទំនងទ្វេភាគី និងជំរុញគោលដៅរួមក្នុងតំបន់ក្នុងអំឡុងពេល ដែលលោកប្រមុខការទូតហោណាំហុង ដឹកនាំសមាគមប្រជាជាតិ អាស៊ីអាគ្នេយ៍ “អាស៊ាន”។
លោកស្រី ហ៊ីលឡារី គ្លីនតុន ក៏បានជម្រាបជូនលោកឧបនាយករដ្ឋមន្ត្រី ហោ ណាំហុង បន្ថែម ទៀតថា សហរដ្ឋអាមេរិក វាយតម្លៃខ្ពស់ ចំពោះការរីកចម្រើននៃភាពជាដៃគូជាមួយកម្ពុជា ដែលបានផ្តល់ផលប្រយោជន៍ដល់ប្រជាជនយើងទាំងពីរជាច្រើនឆ្នាំកន្លងមកនេះ។
លោកស្រី គ្លីនតុន ក៏បានស្វាគមក្នុងឱកាសលោកហោណាំហុង ទស្សនកិច្ចនៅអាមេរិក ដែលប្រមុខការទូតអាមេរិក ចាត់ទុកថា ដើម្បីធ្វើឲ្យការយោគយល់គ្នាទៅវិញទៅមករវាងអាមេរិក-កម្ពុជា កាន់តែស៊ីជម្រៅបន្ថែមទៀត និងដើម្បីរិះរកផ្លូវពង្រឹងស្ថិរភាពក្នុងតំបន់ និងធានាវិបុលភាពរួម សម្រាប់ប្រទេសទាំងពីរ ក៏ដូចជាតំបន់អាស៊ី-ប៉ាស៊ីហ្វិក ទាំងមូលផងដែរ។
លោកស្រី គ្លីនតុន ក៏នឹងដឹកនាំគណៈប្រតិភូ និងអ្នកវិនិយោគអាមេរិក មកចូលរួមកិច្ចប្រជុំវេទិកាអាស៊ាន នៅទីក្រុងភ្នំពេញ នាដើមខែកក្កដា ជាមួយនឹងរដ្ឋមន្ត្រីការបរទេសអាស៊ាន និងប្រទេសដៃគូ សរុប ២៧ ប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ