សហគមន៍អន្តរជាតិ កំពុងជ្រោមជ្រែងជួយដោះស្រាយវិបត្តិកូតឌីវ័រ
ប្រមុខរដ្ឋ និងប្រមុខរដ្ឋាភិបាល នៃបណ្តាប្រទេសជាសមាជិកសហគមន៍សេដ្ឋកិច្ចអាហ្វ្រិកខាងលិច បានបើកសម័យប្រជុំវិសាមញ្ញ ជាបន្ទាន់មួយនៅថ្ងៃអង្គារទី ៧ ធ្នូ នេះ នៅAbuja ដើម្បីស្វែងរកដំណោះស្រាយឲ្យវិបត្តិកូតឌីវ័រ។ ប្រទេសកូតឌីវ័រ ដែលហែកជាពីរ មានប្រធានាធិបតីពីរ គឺលោក បាក់ក្បូ និងលោក វ៉ាត់តារ៉ា ។ ក្នុងពេលជាមួយគ្នានេះ សហគមន៍អន្តរជាតិ ក៏បានបង្កើនការដាក់គំនាបប្រឆាំងនឹងលោកបាក់ក្បូ កាន់តែខ្លាំងឡើងៗដែរ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អៀង សុខម៉ិញ
សហគមន៍សេដ្ឋកិច្ចអាហ្វ្រិកខាងលិច បានបើកកិច្ចប្រជុំវិសាមញ្ញ ជាបន្ទាន់ ដើម្បីរិះរកមធ្យោបាយឲ្យបានប្រសើរជាងសហភាពអាហ្វ្រិក។ សហភាពអាហ្វ្រិក ដែលបានបញ្ជូនបេសកជនពិសេស គឺលោក Thabo Mbeki អតីតប្រធានាធិបតីអាហ្វ្រិកខាងត្បូង ទៅកូតឌីវ័រ រយៈពេលពីរថ្ងៃ ដោយមិនបានសម្រេចលទ្ធផលអ្វីសោះ។ គូប្រជែងទាំងពីរនៅតែចចេសរៀងៗខ្លួន មិនព្រមជួបចរចាគ្នាដោយផ្ទាល់ទេ។
លោក បាក់ក្បូ និង លោក វ៉ាត់តារ៉ា មិនត្រូវបានគេអញ្ជើញឲ្យចូលរួមក្នុងសម័យប្រជុំវិសាមញ្ញ នៅថ្ងៃនេះទេ។ ប៉ុន្តែលោក បាក់ក្បូ ដែលដឹកនាំប្រទេសកូតឌីវ័រតាំងពី ១០ឆ្នាំមកហើយ បានបញ្ជូនបេសកជនពិសេសទៅត្រួតពិនិត្យតំបន់ជួបប្រជុំ នោះ។ រហូតមកទល់ពេលនេះ អ្នកនាំពាក្យរបស់សហគមន៍សេដ្ឋកិច្ចអាហ្វ្រិកខាងលិច មិនទាន់អាចផ្តល់ព័ត៌មានលម្អិតទាក់ទងនឹងវិធានការទាំងឡាយដែលត្រូវលើកយកពិភាក្សាក្នុងកិច្ចប្រជុំវិសាមញ្ញនេះទេ។
សូមបញ្ជាក់ថា លោក បាក់ក្បូ និងលោកវ៉ាត់តារ៉ា សុទ្ធតែត្រូវបានប្រកាសទទួលជោគជ័យរៀងខ្លួនៗ និងបានស្បថចូលកាន់តំណែងជាប្រធានាធិបតីទាំងពីរនាក់។ លោក វ៉ាត់តារ៉ា បានទទួលការគាំទ្រពីសំណាក់សហគមន៍អន្តរជាតិ អង្គការសហប្រជាជាតិ និងបណ្តាប្រទេសជាច្រើនក្នុងលោក រួមទាំងសហគមន៍សេដ្ឋកិច្ចអាហ្វ្រិកខាងលិចផង។
ហេតុដូច្នេះហើយ បានជាសហគមន៍អន្តរជាតិនាំគ្នាដាក់គំនាបលើលោក បាក់ក្បូ ដែលក្រុមប្រឹក្សាធម្មនុញ្ញ កាត់ក្តីឲ្យឈ្នះឆ្នោតប្រធានាធិបតី។ ម្សិលមិញ សេតវិមាន និងសហភាពអឺរ៉ុប បានថ្កោលទោសជាផ្លូវការលោក បាក់ក្បូ និងព្រមានថា លោកបាក់ក្បូ កំពុងតែឯកា និងអាចទទួលផលវិបាកជាច្រើន ពីភាពរឹងទទឹងតោងអំណាចនេះ ព្រមទាំងទណ្ឌកម្មមួយចំនួនផង។ លោកប្រធានាធិបតីអាមេរិក បារ៉ាក់ អូបាម៉ា ទំនងជាបានសរសេរលិខិតមួយ បង្ខំ ឲ្យលោកបាក់ក្បូ គោរពសំឡេងឆ្នោតរបស់ពលរដ្ឋ និងដើរចេញពីដំណែងផង។ នេះបើតាមប្រភពព័ត៌មានមិនបញ្ចេញឈ្មោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ