ឃាតកម្មសម្លាប់លោកស្រី Jo Cox សម្លាប់លទ្ធិប្រជាធិបតេយ្យអង់គ្លេស
រសៀលថ្ងៃព្រហស្បតិ៍ ១៦មិថុនា ម្សិលមិញ លោកស្រីចូ ខុក Jo Cox ស្ត្រីតំណាងរាស្ត្រអង់គ្លេសមួយរូប ត្រូវបានជនជ្រុលនិយមស្តាំមួយរូប បាញ់សម្លាប់ នៅជិតបណ្ណាគារមួយ ក្នុងភូមិBirstall នៅWest Yorkshire ភាគខាងជើងអង់គ្លេស។ លោកស្រី ចូ ខុក អាយុ៤១ឆ្នាំ សមាជិកបក្សការងារ ជាអ្នកគាំទ្រពេញទំហឹងអោយអង់គ្លេសបន្តស្ថិតក្នុងសហភាពអឺរ៉ុប។ ឃាតកម្មកើតឡើងតែ១សប្តាហ៍ប៉ុណ្ណោះ មុនអង់គ្លេសបោះឆ្នោតប្រជាមតិ សម្រេចថា តើត្រូវបន្តនៅក្នុងសហភាពអឺរ៉ុប រឺក៏ត្រូវដើរចេញ។ យោងតាមការស្ទាបស្ទង់មតិ ពលរដ្ឋគាំទ្រអោយអង់គ្លេសដើរចេញពីអឺរ៉ុប មានច្រើនជាងពលរដ្ឋដែលចង់អោយអង់គ្លេសនៅបន្តជាសមាជិកអឺរ៉ុប។
ចុះផ្សាយនៅថ្ងៃ៖
ស្តាប់ - ០៥:០៨
ក្រោយហេតុការណ៍ឃាតកម្ម អង់គ្លេសបានសម្រេចព្យួរយុទ្ធនាការឃោសនាបោះឆ្នោតប្រជាមតិនេះ។ ដោយសារហេតុការណ៍នេះ នាយករដ្ឋមន្ត្រីអង់គ្លេសបានលុបចោលកិច្ចប្រជុំមួយនៅGibraltar។ លោកខាំមេរូន ចាត់ទុកឃាតកម្មលើរូបលោកស្រីចូ ខុក ថាជាសោដនាកម្ម។ ប្រមុខការទូតអាមេរិក លោកចន ឃែររី និងអ្នកនយោបាយបរទេសច្រើនរូប ក៏ដូចជាសារព័ត៌មានក្នុងស្រុក លើកឡើងថា មរណភាពស្ត្រីតំណាងរាស្ត្រ ចូ ខុក សបង្ហាញពីការវាយប្រហារលើលទ្ធិប្រជាធិបតេយ្យ។
ឃាតកម្មនយោបាយ រឺជាគំនុំផ្ទាល់ខ្លួន?
យោងតាមប៉ូលិស ឃាតកម្មនេះជារឿងផ្ទាល់ខ្លួនរបស់ឃាតករតែប៉ុណ្ណោះ។ ឃាតករសម្លាប់ស្ត្រីតំណាងរាស្ត្រអង់គ្លេស មានឈ្មោះថា ថូមី មែរ អាយុ៥២ឆ្នាំ។ យោងតាមសាក្សីក្នុងហេតុការណ៍ ថូមី បានប្រើកាំភ្លើងមួយដើម បាញ់សំដៅទៅលោកស្រី ចូ ខុក ២ទៅ៣គ្រាប់។ រួចមកទៀត ឃាតកររូបនេះ បានប្រើកាំបិតចាក់លើរូបលោកស្រី ជាច្រើនកាំបិតថែមទៀត។ យើងឃើញថា ឃាតករមិនខ្វល់ថា លោកស្រីជាស្រីភេទ ដែលមានគ្រួសារ និងកូនៗនោះទេ។ ទង្វើនេះព្រៃផ្សៃណាស់។ យោងតាមគ្រួសារឃាតករ ឃាតករថូមី មែរ នេះ ជាធ្លាប់មានបញ្ហាផ្លូវចិត្ត។
សាក្សីប្រាប់ទៀតថា ឃាតកររូបនេះបានស្រែកដល់ទៅ២លើកថា Britain First។ Britain First នេះជាឈ្មោះរបស់ក្រុមស្តាំនិយមជ្រុលមួយនៅអង់គ្លេស។ ប៉ុន្តែក្រុមនេះប្រាប់ថា មិនដែលមានទំនាក់ទំនងជាមួយ ថូមី មែរ។ យោងតាមក្រុមការពារសិទ្ធិមនុស្សអាមេរិកឈ្មោះថា Poverty Law Center ថូមី មែរ គឺជាសកម្មជនស្មោះត្រង់មួយរូប របស់ក្រុមហ្វាស៊ីសមួយក្រុម ឈ្មោះថា សម្ព័ន្ធជាតិ ហៅកាត់ថា NA។ ក្រុមនេះមានទីតាំង នៅអាមេរិក។ ក្រុមនេះចង់បង្កើតជាតិមួយដែលមានតែជនជាតិស្បែកសសុទ្ធសាធ។ ឃាតករថូមី ប្រហែលបានចាយលុយ៥៥០អឺរ៉ូ ដើម្បីទិញសៀវភៅរបស់ក្រុមនេះ ក្នុងនោះក៏មានសៀវភៅនិយាយពីវិធីធ្វើអាវុធផងដែរ។
ឃាតកម្មទាក់ទងនយោបាយរឺយ៉ាងណានោះ យើងនៅមិនទាន់ដឹងច្បាស់ទេ។ តែបើមើលទៅ វាជាទង្វើផ្ទាល់ខ្លួនរបស់ជនជ្រុលនិយមច្រើនជាង។ ឃាតករអាចជាជនដៃលស្អប់អឺរ៉ុបពេញទី ជាជនដែលមិនពេញចិត្តនឹងវត្តមានជនអន្តោប្រវេសន៍ក្នុងទឹកដីអង់គ្លេស។
គួរបញ្ជាក់ថា ស្ត្រីតំណាងរាស្ត្រអង់គ្លេសចូ ខុក មុននឹងក្លាយជាតំណាងរាស្ត្រ គាត់ធ្វើសកម្មភាពមនុស្សធម៌ច្រើនណាស់ ធ្លាប់គាំទ្រ ជួយជនភៀសខ្លួន រកយុត្តិធម៌អោយសង្គម។ អភិបាលក្រុងអង់គ្លេសសព្វថ្ងៃ រឺក៌អ្នកនយោបាយច្រើនរូប នៅប្រទេសអឺរ៉ុបផ្សេងទៀត ក៏សរសើរដែរថា គាត់ជាស្ត្រីដ៏ក្លាហាន។
ប្រធានបទអន្តោប្រវេស៍និងការភ័យខ្លាចជនអន្តោប្រវេសន៍ជារឿងថ្មីសម្រាប់ការបោះឆ្នោតប្រជាមតិ២៣មិថុនា
ប្រាកដណាស់ ប្រធានបទប្រជាមតិពេលនេះ ហាក់ប្រែក្លាយទៅជាប្រធានបទលើរឿងអន្តោប្រវេសន៍ទៅវិញ។ បើមើលភាពជាក់ស្តែង បញ្ហាអន្តោប្រវេសន៍ជាបញ្ហាចំបង ពិសេសចំពេល អឺរ៉ុបជួបបញ្ហាជនភៀសខ្លួនតាមទូក ដែលគេចសង្គ្រាម រត់មកជ្រកនៅអឺរ៉ុប ដែលចេះតែកើតរៀងរាល់ថ្ងៃទៀតនោះ។ ប្រាកដហើយ ពលរដ្ឋអង់គ្លេសពិតជាភ័យខ្លាចនឹងនយោបាយអន្តោប្រវេសន៍របស់សហភាពអឺរ៉ុប ខ្លាចជនភៀសខ្លួនបង្កជាបញ្ហាសេដ្ឋកិច្ច និងសង្គមក្នុងទឹកដីខ្លួន។ បូកផ្សំនឹងយុទ្ធនាការឃោសនា ញុះញង់អោយស្អប់អឺរ៉ុប អោយបោះឆ្នោតដើរចេញពីអឺរ៉ុបទៀត បញ្ហាអន្តោប្រវេសន៍មិនងាយបញ្ចប់ងាយៗទេ។ ជាក់ស្តែង មានការឃោសនារហូតថា ជនអន្តោប្រវេសន៍ឈ្លានពានទឹកដីអង់គ្លេសទៀតផង។ ប្រហែលដោយយុទ្ធនាការអស់នេះ ទើបអ្នកគាំទ្រអោយអង់គ្លេសដើរចេញពីអឺរ៉ុបបានកើនចំនួនជាងមុន។
ក្រោយការបាញ់សម្លាប់លោកស្រី ចូ ខុក ទីប្រឹក្សារបស់អតីតនាយករដ្ឋមន្ត្រីថូនី ប្ល៊ែរ មួយរូប បានប្រតិកម្មប្រឆាំងនឹងអ្នកសារព័ត៌មាន។ គាត់លើកឡើងថា គឺសារព័ត៌មានដែលបានជំរុញអោយមានការស្អប់ខ្ពើម ជំរុញអោយមានកំហឹងប្រឆាំងអ្នកនយោបាយ។ ឥឡូវ លទ្ធផលគឺដូច្នេះឯង គឺថា អ្នកដែលគេស្អប់ ដែលមានមតិផ្ទុយពីគេ បែរជាត្រូវគេបាញ់សម្លាប់។
ការគុំកួន រឺបាញ់សម្លាប់នោះ វាជាបទឧក្រិដ្ឋរួចហើយ តែអ្វីដែលជាបញ្ហានោះ គឺថាការស្អប់ខ្ពើមរហូតដល់ហ៊ានធ្វើឃាតមនុស្សដែលគ្មានទស្សនៈដូចបុគ្គលខ្លួន គឺជាគ្រោះថ្នាក់ធ្ងន់សម្រាប់ប្រជាធិបតេយ្យអង់គ្លេស។ យើងឃើញថា ឃាតករធ្លាប់ជាមនុស្សមានបញ្ហាផ្លូវចិត្ត។ តែបើគាត់អាចដើរហើរបានដោយសេរី មានន័យថា គាត់អាចគ្រប់គ្រងចិត្តគាត់បានឡើងវិញ។ ប៉ុន្តែ ថូមី មែរ ជ្រុលនិយម ដុះគំនិតរហូតទិញសៀវភៅអានពីវិធីធ្វើអាវុធដោយដៃ។ នេះជាការចាក់រឹសធ្ងន់ធ្ងរ នៃគំនិតជ្រុលនិយម ហើយក៏បង្ហាញដែរថា បើគំនិតជ្រុលនិយមដុះស្លែហើយ គ្មានអ្នកណាអាចជួយអ្នកណាទេ។
មេរៀនថ្មីសម្រាប់អង់គ្លេសនិងអឺរ៉ុប
ឃាតកម្មលើស្ត្រីតំណាងរាស្ត្រអង់គ្លេស អាចធ្វើអោយប្រជាជនអង់គ្លេសពិចារណាឡើងវិញ ពីផលវិបាកនៃការដើរចេញពីអឺរ៉ុប រឺក៏ការបន្តស្ថិតនៅក្នុងអឺរ៉ុប។ លទ្ធផលអាចប្រែប្រួលគ្រប់ពេល។ ឃាតកម្មលើលោកស្រីចូ ខុក ជាមេរៀនមួយសម្រាប់គ្រប់និន្នាការនយោបាយនៅអង់គ្លេសក៏ដូចជានៅទូទាំងសហភាពអឺរ៉ុបផងដែរ។ គេត្រូវមើលឡើងវិញ លើនយោបាយអន្តោប្រវេសន៍ ថាតើត្រូវថ្លឹងថ្លែង យ៉ាងណា ទើបប្រសើរ។
ការឃោសនារបស់អ្នកសារព័ត៌មាន និងការឃោសនានយោបាយនានាក៏គួរតែមើលពីខ្លឹមសារខ្លួនឡើងវិញដែរ ចៀសវាងជំរុញអោយមានការស្អប់ខ្ពើម រហូតគំរាមកំហែងលទ្ធិប្រជាធិបតេយ្យដូច្នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ