អាល្លឺម៉ង់អង្វរអង់គ្លេសកុំឱ្យដើរចេញពីអឺរ៉ុប
Please Don’t go ! សារព័តមានដ៏មានឥទ្ធិពលមួយរបស់អាល្លឺម៉ង់មួយបានចេញផ្សាយនៅថ្ងៃសៅរ៍នេះ អង្វរមិនឱ្យអង់គ្លេសដើរចេញពីអឺរ៉ុប ដោយបានលើកហេតុផលមកអះអាងចំនួន២៣ទំព័រ។ ក្នុងពេលជាមួយគ្នានេះដែរ ជ័យលាភីណូបែលអង់គ្លេសចំនួន១៣នាក់ បានព្រមានអំពីគ្រោះថ្នាក់នៃបំបែកខ្លួនចេញពីអឺរ៉ុប។ តែបើតាមការស្ទង់មតិចុងក្រោយ បង្ហាញកាន់ច្បាស់ថា ពលរដ្ឋអង់គ្លេសភាគច្រើនខ្លាំងចង់ដើរចេញអឺរ៉ុប។
ចុះផ្សាយនៅថ្ងៃ៖
ស្តាប់ - ០១:៤៤
ក្រុមអ្នកវិទ្យាសាស្ត្រអង់គ្លេស ជាជ័យលាភីរង្វាន់ណូបែល បាននាំគ្នាសរសេរលិខិតរួមមួយ ពន្យល់ពីគ្រោះខាតបង់របស់អង់គ្លេសក្នុងវិស័យស្រាវជ្រាវវិទ្យាសាស្ត្រ ប្រសិនបើត្រូវដើរចេញពីសហភាពអឺរ៉ុប។ វិទ្យាសាស្ត្រដែលបានចិញ្ចឹមប្រទេសឱ្យស្គាល់ភាពរុងរឿង មានប្រព័ន្ធសុខភាពល្អ មានសមត្ថភាពបង្កើតរបស់ថ្មីៗ និងមានកំណើនសេដ្ឋកិច្ចខ្ពស់ ...
ការព្រមានរបស់ក្រុមម្ចាស់ជ័យលាភីនេះ ធ្លាក់មកជួនចំពេលដែលការស្ទង់មតិបានបង្ហាញចេតនាចង់ដើរចេញអឺរ៉ុបរបស់ពលរដ្ឋអង់គ្លេសកើនឡើងជាលំដាប់ ដល់៥៥% បើប្រៀបទៅនឹងសប្តាហ៍មុនមានត្រឹម៥១%។ ឯការបោះឆ្នោតប្រជាមតិនឹងចូលមកដល់នៅថ្ងៃទី ២៣មិថុនានេះទៅហើយ។
គ្រប់អ្នកឯកទេសសុទ្ធតែសំឡឹងឃើញ អង់គ្លេសកំពុងមានទំនោរផ្អៀងទៅរកទិសដើរពីអឺរ៉ុបច្រើនជាងចម្លើយនៅការស្ទង់មតិទៅទៀត។ ហេតុដូច្នេះហើយបានជា កាសែតដ៏មានឥទ្ធិពលរបស់អាល្លឺម៉ង់ Der Spiegel បានចេញផ្សាយលេខពិសេសនៅថ្ងៃសៅរ៍នេះ ក្រោមចំណងជើងថា “Please Don’t go” និងបានពន្យល់ជាភាសាអង់គ្លេសផងថាហេតុអ្វីអាល្លឺម៉ង់ត្រូវការឱ្យអង់គ្លេសបន្តរួមរស់ជាអាល្លឺម៉ង់ ជាមួយអឺរ៉ុប។
បើតាមកាសែតអាល្លឺម៉ង់ ដែលមានសម្រង់ប្រសាសន៍រដ្ឋមន្ត្រីក្រសួងហិរញ្ញវត្ថុអាល្លឺម៉ង់ផង ការបាត់បង់សមាជិកដូចយ៉ាងអង់គ្លេស នឹងធ្វើឱ្យអឺរ៉ុបខាតបង់ធ្ងន់ តែអង់គ្លេសខ្លួនឯងក៏មិនអាចមានមោទនភាពបានយូរឡើយ និងអាចបន្តស្ថិតនៅជាមហាអំណាចបានយូរទេ។ ចេញគឺចេញ អង់គ្លេសនឹងគ្មានទទួលបានផលអនុគ្រោះអ្វីពីទីផ្សារអឺរ៉ុបទៀតឡើយ។ ប៉ុន្តែលោកនឹងធ្វើដំណើរទៅទីក្រុងឡុងដ៍ដោយផ្ទាល់ ដើម្បីទៅបញ្ចុះបញ្ចូលអង់គ្លេសកុំឱ្យដកខ្លួនពីអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ