ប្រធានាធិបតីយេម៉ែន អញ្ជើញទៅកាន់ Arabie saoudite ដើម្បីទទួលការព្យាបាលមុខរបួស
ត្រូវរបួសនៅក្នុងការវាយប្រហារដោយគ្រាប់ផ្លោងនៅថ្ងៃសុក្រ ទី៣ មិថុនា នាឱកាសសូត្រធម៌ នៅវិហារអ៊ីស្លាមនាទីក្រុង Sanaa លោកប្រធានាធិបតីយេម៉ែន Ali Abdalah Saleh បានអញ្ជើញទៅដល់Arabie saoudite នៅយប់ថ្ងៃសៅរ៍ម្សិលមិញ មុននឹងចូលព្យាបាលនៅមន្ទីរពេទ្យយោធានៅទីក្រុង Ryad។ ចំណែក មន្រ្តីជាន់ខ្ពស់យេម៉ែនជាច្រើនរូបទៀត ក៏បានទៅដល់ទីក្រុង Ryad ដែរ ដើម្បីព្យាបាលមុខរបួស។ មួយវិញទៀត យោងតាមរដ្ឋធម្មនុញ្ញ យេម៉ែន ក្នុងករណីអវត្តមានរូបប្រមុខរដ្ឋ គឺត្រូវលោក Abdel Rabbo Mansour អនុប្រធានាធិបតី ដឹកនាំប្រទេស ជាប្រធានាធិបតីយេម៉ែនស្តីទី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
លោកប្រធានាធិបតី Ali Abdalah Saleh ប្រហែលជាត្រូវរបួសនៅត្រង់កនិងទ្រូង នៅក្នុងការវាយ ប្រហារដោយគ្រាប់ផ្លោងប្រឆាំងវិមានប្រធានាធិបតីយេមែននៅទីក្រុង Sanaa នាថ្ងៃសុក្រទី៣មិថុនា២០១១។ ប្រភព អ្នកជិតដិតលោកប្រធានាធិបតីយេម៉ែន បានជូនដំណឹងថា លោកប្រធានាធិបតី មានការឈឺចាប់ដោយមុខរបួសនិងរលាកភ្លើងនៅលើទ្រូងនិងនៅលើមុខ។
ម្យ៉ាងទៀត តាំងពីថ្ងៃសុក្រមក គេពុំបានឃើញការផ្សព្វផ្សាយ រូបភាពណាមួយរបស់លោកប្រធានាធិបតីយេម៉ែនទេ នៅតាមទូរទស្សន៍រដ្ឋ លើកលែងតែ « សារសំឡេង » របស់លោក Saleh ប៉ុណ្ណោះដែលត្រូវបានចាក់ផ្សាយនៅយប់ថ្ងៃសុក្រ។ តាមរយៈសារដ៏ខ្លីនោះ លោកប្រមុខរដ្ឋយេម៉ែន បានចោទប្រកាន់ទៅលើក្រុមកុលសម្ព័ន្ធយេម៉ែនដែលដឹកនាំដោយ Sadek al-Ahmar ថាជាអ្នកបង្កការវាយប្រហារវិមានប្រធានាធិបតី ការវាយប្រហារដោយអាវុធធុនធ្ងន់ដែល បានបណ្តាលឲ្យស្លាប់មនុស្ស១១នាក់និងរបួសជន១២៤នាក់ផ្សេងទៀត ។
ក៏ដូចរូបលោក Saleh ដែរ ក្រុមមន្រ្តីជាន់ខ្ពស់នៃរដ្ឋាភិបាលយេម៉ែនមួយចំនួនធំ ត្រូវរបួសក្នុងនោះក៏មាននាយករដ្ឋមន្រ្តីដែរ ដែលត្រូវបានដឹកជាបន្ទាន់ទៅកាន់មន្ទីរពេទ្យយោធានៅ Arabie saoudite មុនគេ បន្ទាប់មកប្រធានរដ្ឋសភានិងព្រឹទ្ធសភា ក៏ព្រមទាំង ឧបនាយករដ្ឋមន្ត្រីយេម៉ែនទាំងពីររូប។ រីឯ លោកប្រធានាធិបតី Saleh វិញ បានធ្វើដំណើរទៅដល់ទីក្រុងRyad តាំងពីយប់ថ្ងៃសៅរ៍ ដោយជិះតាមយន្តហោះមួយគ្រឿងរបស់មន្ទីរពេទ្យ Arabie saoudite។
ដំណឹងនៃការចេញដំណើររបស់លោក Saleh នេះ ដែលត្រូវរបួសផងនិងត្រូវដឹកជម្លៀសពីប្រទេសយេម៉ែនផង ត្រូវបានចលនាបដិវត្តន៍យុវជនយេម៉ែននៅទីក្រុងSanaa នាំគ្នាប្រារព្ធអបអរសាទរយ៉ាងគគ្រឹកគគ្រេងនាថ្ងៃអាទិត្យនេះ ដោយពួកគេ បានស្រែកច្រៀងខ្លាំងៗ ដូចជា ថា”របបលោក Saleh ធ្លាក់ហើយ ឬក៏ថា ប្រទេសយេម៉ែនថ្មី កើតឡើងហើយ ។លនិងល។
ការប្រារព្ធធ្វើដូចគ្នានេះ ត្រូវបានប្រារព្ធឡើងដែរនៅ Taëz ដែលជាទីក្រុងដ៏ធំនៅប៉ែកនិរតី នៃប្រទេសយេម៉ែន និងក៏ជាជម្រុកដ៏សំខាន់នៃការកកើតឡើងនៃចលនាបដិវត្តន៍យេម៉ែនដែលបានងើបបះបោរប្រឆាំងនឹងរបបលោក Saleh តាំងពីពាក់កណ្តាលខែមករាម្ល៉េះ របបដែលបានកាន់កាប់អំណាចអស់រយៈពេល ៣៣ ឆ្នាំមកហើយនៅប្រទេសយេម៉ែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ