ប្រធានាធិបតីមិនចុះពីអំណាចព្រោះខ្លាចពួកអាល់កៃដាចូលកាន់កាប់យេម៉ែន
និស្សិតដែលធ្វើបាតុកម្មអស់ជាច្រើនសប្តាហ៍មកហើយ នៅ ទីក្រុងSanaaរបស់ប្រទេសយេម៉ែន ត្រូវបាន ក្រុមប៉ូលិស បង្រ្កាប កាលពីយប់ថ្ងៃអង្គារទី ៨ មីនា ២០១១។ និស្សិតមា្នក់ត្រូវគេរាយការណ៍ថា បានស្លាប់ និងមាននិស្សិតជាច្រើននាក់ផ្សេងទៀតរងរបួសធ្ងន់ ដោយការវាយដំរបស់ប៉ូលិស។ ការបង្រ្កាបចុងក្រោយនេះ ធ្វើឲ្យចំនួនមនុស្សស្លាប់ កើនជិត ៣០នាក់ ចាប់តាំងពីបាតុកម្មទាមទារឲ្យប្រធានាធិបតីចុះចេញពីតំណែង ដែលផ្ទុះឡើងកាលពីចុងខែមករា។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ឈាង បុប្ផា
បាតុករយេម៉ែនត្រូវប៉ូលិសបង្រ្កាបកាន់តែហិង្សា នៅប៉ុន្មានថ្ងៃចុងក្រោយនេះ។ ប្រធានាធិបតីយេម៉ែន លោក Ali Abdullah Saleh ឯណោះវិញ បានប្រកាសម្តងហើយ ម្តងទៀត ថា គាត់មិនព្រមចុះចេញពីអំណាចមុនចប់អាណត្តិរបស់គាត់ នៅឆ្នាំ ២០១៣ទេ។ ជំហរបិទជិតរបស់ប្រធានាធិបតី Saleh វាខុសពីឆន្ទះ និងការទាមទារចង់បានរបស់បាតុករ។ ប្រជាជនយេម៉ែន ដែលបានសម្រេចងើបឈរតវ៉ា ដោយយកតាមគំរូបដិវត្តន៍ផ្កាម្លិះ នៅ ទុយនីស៊ី នៅត្រាំត្រែងតវ៉ាជាងមួយខែមកហើយ ឲ្យប្រធានាធិបតីចុះចេញពីអំណាច ពីព្រោះពួកគេយល់ថា រស់នៅក្រោមការគ្រប់គ្រងរបស់លោក Saleh ពួកគេរងគ្រោះដោយការអត់ឃ្លាន ការអត់ការងារធ្វើ និងអំពើពុករលួយ។
គួរដឹងថា ប្រជាជនជិតពាក់កណ្តាលនៃប្រជាជនយេម៉ែនសរុប ២៣លាននាក់ រស់ជាមួយនឹងប្រាក់ចំណូលក្រោម ២ដុល្លារ ក្នុងមួយថ្ងៃ។ ហើយក្នុងប្រទេសដែលរស់អាស្រ័យនឹងចំណូលប្រេង មានប្រជាជនមួយភាគបីដែលរងគ្រោះជាអល្លជី ដោយការអត់ឃ្លាន។
ប្រជាជនបានបន្ទោសអសមត្ថភាពរបស់រដ្ឋាភិបាល។ ហើយសង្ឃឹមថា ការអត់ធ្មត់តវ៉ារបស់ពួកគេនឹងអាចធ្វើឲ្យប្រធានាធិបតីដែលកាន់អំណាច ជាង ៣២ឆ្នាំ នៅយេម៉ែន ដើរចេញពីអំណាច ដូចលោកបិន អាលី នៅទុយនីស៊ី និងលោកអូស្នូ មូបារ៉ាក់ ប្រធានាធិបតីអេហ្ស៊ីប។ ប៉ុន្តែ រហូតមកដល់ពេលនេះ មើលទៅ សម្រែកតវ៉ារបស់ពួកគេនៅតែគ្មានន័យ ព្រោះលោក Saleh នៅតែមិនព្រមចុះចេញពីអំណាច នៅចុងឆ្នាំនេះ តាមការអំពាវនាវរបស់បក្សប្រឆាំង។
បើតាមលោកAli Abdullah Saleh ការចុះពីតំណែងរបស់លោក Saleh មិនមែនជាបញ្ហាសំខាន់ទេ ប៉ុន្តែ បញ្ហាប្រឈមរបស់យេម៉ែន បច្ចុប្បន្ន គឺត្រូវរកស្ថិរភាព និងសន្តិសុខក្នុងប្រទេសយេម៉ែន។
យេម៉ែនដែលស្ថិតនៅជាប់ប្រទេសសំបូរប្រេង Arabi saoudit រងគ្រោះនឹងអសន្តិសុខជាប់ជានិច្ច។ អំពើភេរវកម្ម បំផ្ទុះគ្រាប់បែក សម្លាប់ប៉ូលិស យេម៉ែន កើតមានសឹងរាល់ថ្ងៃ។ រដ្ឋាភិបាលបង្រួបបង្រួម ក្រោមការដឹកនាំ របស់លោក Saleh ត្រូវប្រឈមមុខនឹងសត្រូវពីរ គឺ ពួកឧទ្ទាមChiites នៅភាគខាងជើង និងការបះបោររហូតមក របស់ប្រជាជនរស់នៅភាគខាងត្បូង។ ការបះបោរខ្លាំងលើកនេះ កើតចេញពីប្រជាជនភាគខាងត្បូង។
ពួកក្រុមបះបោរពីភាគខាងត្បូងដែលបានទៅចូលរួមក្នុងបាតុកម្ម ធ្លាប់បានទាមទារផ្តាច់ទឹកដីភាគខាងត្បូងពីយេម៉ែនបច្ចុប្បន្ន និង ចង់ក្លាយជាសាធារណរដ្ឋដូចមុន គឺមុនរដ្ឋាភិបាលបង្រួបបង្រួមរបស់លោក Saleh នៅឆ្នាំ ១៩៩០។ ប្រជាជននៅភាគខាងត្បូង ចោទរដ្ឋាភិបាលថា ចង់បានទឹកដីភាគខាងត្បូងយកមកកាន់កាប់ ព្រោះសម្លឹងឃើញអណ្តូងប្រេងនៅភាគខាងត្បូង។ រដ្ឋាភិបាលមិនបានយកចិត្តទុកដាក់ ជួយចម្រើនជីវភាពរស់នៅរបស់ពួកគេទេ។
គឺតំបន់នៅភាគខាងត្បូងនោះហើយ ដែលពួកឧទ្ទាមបំបែកខ្លួន បានចូលរួមជាមួយបណ្តាញអាល់កៃដា របស់បិន ឡានដិន បង្កើតសំបុកក្រុមអាល់កៃដា នៅយេម៉ែន និងដើរធ្វើភេរវកម្មពេញប្រទេស។ ពួកអាល់កៃដានៅយេម៉ែន ជាអ្នកផ្ញើកញ្ចប់មានផ្ទុកគ្រឿងផ្ទុះ ទៅវិហារសាសនារបស់ពួកជ្វីហ្វ នៅទីក្រុងChicago។ ប៉ុន្តែកញ្ចប់ឥវ៉ាន់ត្រូវបានស្ទាក់រកឃើញទាន់នៅព្រលានយន្តហោះ ទីក្រុងDubaiនៅចុងឆ្នាំ ២០១០។
គឺនៅពេលនោះហើយដែលលោក Salehប្រកាសធ្វើសង្រ្គាមជាមួយពួកអាល់កៃដា។ យុទ្ធសាស្រ្តនេះ ត្រូវបានទទួលការគាំទ្រ ពីអាមេរិក។ លោក Saleh ពេលនេះ មិនចង់ចុះចេញពីអំណាច ដោយប្រហែលនៅអាងមានអាមេរិកពីខាងក្រោយខ្នង។ អាមេរិកត្រូវការរដ្ឋាភិបាលយេម៉ែនបច្ចុប្បន្ន ដើម្បី ប្រយុទ្ធប្រឆាំងនឹងពួកអាល់កៃដា។ ហេតុដូច្នេះហើយ បានជារហូតមកដល់ពេលនេះ គេមិនទាន់ឃើញអាមេរិក ដែលជាប្រទេសប្រជាធិបតេយ្យ ស្រែកបន្ទោសខ្លាំងដាក់រដ្ឋាភិបាលយេម៉ែនរឿងបង្រ្កាបខ្លាំងលើ បាតុករ។ អាមេរិកចង់បានរដ្ឋាភិបាលបង្រួបបង្រួមយេម៉ែនមួយដើម្បី ងាយស្រួលធ្វើការប្រឆាំងនឹងពួកអាល់កៃដា។ ប្រសិនបើយេម៉ែនបែកជាពីរ ជាបី ហើយទឹកដីភាគខាងត្បូងធ្លាក់ទៅក្រោមការកាន់កាប់របស់ពួកបះបោរ ដែលនៅលាយឡំ នឹងពួកភេរវជនអាល់កៃដា អាមេរិកនឹងរឹតតែលំបាកដើម្បីក្នុងការប្រយុទ្ធប្រឆាំងនឹងពួកភេរវជន។
ប្រធានាធិបតីយេម៉ែន លោក Saleh ជាអ្នកបង្រួបបង្រួមទឹកដីភាគខាងជើង និងភាគខាងត្បូងចូលគ្នា តែមួយ នៅឆ្នាំ ១៩៩០។ លោក Saleh ដែលគេស្គាល់ថា ជាអ្នកនយោបាយប៊ិនប្រសប់និយាយបញ្ចុះបញ្ចូល ធ្លាប់បានលើកឡើងហើយថា ប្រទេសយេម៉ែននឹងបែកបាក់ទៅជាបី បួនចំរៀក ប្រសិនបើគាត់ចេញពីអំណាច។ លោក Saleh វាយតម្លៃថា គណបក្សប្រឆាំងនឹងមិនអាចគ្រប់គ្រងប្រទេសបានទេ សូម្បីមួយសប្តាហ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ