ប្រធានាធិបតីយេម៉ែនដែលកាន់អំណាច៣២ឆ្នាំមកហើយ ព្រមចុះចេញពីតំណែង
លោកAli Abdallah Saleh បានយល់ព្រមចុះចេញពីតំណែង ប្រធានាធិបតី យេម៉ែន នៅល្ងាចថ្ងៃសៅរ៍ទី ២៣ ខែមេសា ឆ្នាំ ២០១១ ដោយសុខចិត្តទទួលយក ផែនការចេញពីវិបត្តិដែល ស្នើឡើងដោយប្រទេសក្រុមប្រឹក្សាសហប្រតិបត្តិការឈូងសមុទ្រ ពែក្ស។ ការព្រមលាលែងចេញពីមុខតំណែងរបស់លោក Saleh គឺជារឿងមួយដ៏ភ្ញាក់ផ្អើល ព្រោះ កាលពីថ្ងៃសុក្រ លោក Salehទើបនិយាយថា លោកជាប្រធានាធិបតីស្របច្បាប់ និងព្រមចុះចេញពីអំណាច ទៅតាមការកំណត់របស់ច្បាប់រដ្ឋធម្មនុញ្ញប៉ុណ្ណោះ។ តាមរដ្ឋធម្មនុញ្ញ លោក Saleh ដែលកាន់អំណាចជាង ៣២ឆ្នាំ មានសិទ្ធិដឹកនាំយេម៉ែន រហូតដល់ឆ្នាំ ២០១៣។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:៣៩
ចលនាធ្វើបាតុកម្មប្រឆាំងប្រធានាធិបតីយេម៉ែនបានកើតមានជាងពីរខែមកហើយ។ លោកAli Abdallah Saleh ប្រធានាធិបតីយេម៉ែនផ្ទាល់តែងតែ និយាយការពារខ្លួនថា លោកមិនចុះចេញពីអំណាចដាច់ខាត ព្រោះ បើលោកយល់ព្រមដើរចេញ ប្រទេសយេម៉ែននឹងជួបអសន្តិសុខ ហើយនឹងអាចធ្លាក់ទៅក្រោមការកាន់កាប់របស់ពួកអ៊ីស្លាមជ្រុលនិយម ដូចជាពួកអាល់កៃដា ជាដើម។
មានហេតុផលបីយ៉ាងដែលធ្វើឲ្យលោក Salehយល់ព្រម ដូរជំហរ ដែលគេបានរំពឹងទុកមុន។ ហេតុផលទីមួយគឺ លោក Saleh បានមើលឃើញប្រយោជន៍នៃផែនការដើរចេញពីវិបត្តិដែលក្រុមដែលក្រុមប្រឹក្សាសហប្រតិបត្តិការឈូងសមុទ្រពែក្សបានស្នើឡើង។ ផែនការនោះមាននិយាយថា លោក Saleh ត្រូវដើរចេញពីអំណាច យ៉ាងហោច ក្នុងរយៈពេលមួយខែ ក្រោយចុះកិច្ចព្រមព្រៀងជាមួយគណបក្សប្រឆាំង។ ក្នុងរយៈពេលមួយខែនេះ លោកត្រូវជួយរៀបចំបង្កើតរដ្ឋាភិបាលរួបរួមជាតិ និងប្រគល់អំណាច ទៅឲ្យអនុប្រធានាធិបតី ដែលមកពីគណបក្សប្រឆាំង។ លោក Salehត្រូវទុកឲ្យរដ្ឋាភិបាលបណ្តោះអាសន្នរៀបចំការបោះឆ្នោត ក្នុងរយៈពេលពីរខែ បន្ទាប់មកទៀត។
អ្វីដែលសំខាន់បំផុត សម្រាប់លោក Saleh គឺក្នុងផែនការរបស់ប្រទេសអារ៉ាប់ទាំងប្រាំមួយ មាននិយាយអភ័យឯកសិទ្ធិរបស់លោក ពោលគឺគេមិនអាចប្តឹងលោក Saleh សមាជិកក្រុមគ្រួសារ និងមន្រ្តីរដ្ឋាភិបាលរបស់លោក Saleh ទៅតុលាការ នៅក្រោយដែលពេលវិបត្តិនយោបាយលើកនេះទេ។ ចំណុចនេះសំខាន់ ព្រោះលោក Salehបានមើលឃើញពីគំរូរបស់មេដឹកនាំប្រទេសអារ៉ាប់ផ្សេងទៀត ដូចជាលោកបិន អាលី អតីតប្រធានាធិបតីទុយនីស៊ី ដែលតុលាការកំពុងចេញដីការចាប់ខ្លួន និងលោកមូបារ៉ាក់ អតីតប្រធានាធិបតីអេហ្ស៊ីបដែលតុលាការក្នុងប្រទេសកំពុងចាប់ដាក់គុក ដោយចោទពីបទទទួលខុសត្រូវផែនការបង្រ្កាប និងសម្លាប់បាតុករ កន្លងមក។ តាមរយៈអភ័យឯកសិទ្ធិនេះ លោក Salehអាចគេចផុតពីការចោទប្រកាន់ ទៅលើការបង្រ្កាបលើបាតុករយេម៉ែនកន្លងមក។ រហូតមកដល់ពេលនេះ មនុស្សជាង ១៣០នាក់ដែលបានស្លាប់នៅក្នុងការបង្រ្កាបរបស់អាជ្ញាធរយេម៉ែន។
មូលហេតុទីពីរ គឺលោក Saleh បានបាត់បង់បង្អែកដ៏សំខាន់ពីអាមេរិក។ កន្លងមក លោក Saleh ធ្លាប់ធ្វើជាដៃគូរបស់អាមេរិក ក្នុងការប្រយុទ្ធប្រឆាំងនឹងបណ្តាញអាល់កៃដា។ ប៉ុន្តែ នៅពេលចលនាបាតុកម្មផ្ទុះកាន់តែខ្លាំងឡើងប្រឆាំងនឹងប្រធានាធិបតី Saleh សហរដ្ឋអាមេរិកបានអំពាវនាវឲ្យលោក Salehគិតគូរពីនយោបាយដឹកនាំប្រទេស។ ហើយអាមេរិក និងសហភាពអឺរ៉ុបដែលនៅពីក្រោយការសរសេរផែនការដើរចេញពីវិបត្តិ ដែលសុំឲ្យលោក Salehដើរចេញពីអំណាចដើម្បីប្រយោជន៍សន្តិសុខក្នុងតំបន់។
ហេតុផលទីបី ដែលជម្រុញឲ្យលោក Salehប្តូរចិត្តលាលែងពីអំណាច គឺចលនាបាតុកម្មដែលរីកធំឡើងៗ នៅក្នុងប្រទេសយេម៉ែន។ នៅចំពោះមុខការតស៊ូមិនចុះចាញ់របស់ប្រជាជនយេម៉ែន ជាពិសេសនៅក្រោយមហាបាតុកម្មកាលពីថ្ងៃសុក្រ និងបាតុកម្មទូទាំងប្រទេសនៅថ្ងៃសៅរ៍ លោកប្រធានាធិបតីយេម៉ែន មិនអាចក្រាញ នៅតែចង់កាន់អំណាចទៀតទេ។ អំណាចរបស់លោក Saleh កំពុងរង្គោះរង្គើ ជាពិសេសនៅពេលសមាជិករដ្ឋាភិបាលបានដើរចេញពីលោក និងទៅចូលរួមជាមួយក្រុមបាតុករដែលចុះថ្នល់ប្រឆាំង។
សូមរំលឹកថាថា នៅពេលបាតុកម្មផ្ទុះដំបូងឡើង នៅយេម៉ែន លោក Saleh ដែលកាន់អំណាចជាង ៣២ឆ្នាំ បានធ្វើសម្បទាន ដោយថា លោកមិនឈរនៅអាណត្តិក្រោយ និងសុខចិត្តធ្វើជាប្រធានាធិបតីរហូតដល់ឆ្នាំ ២០១៣។ ក្រោយមកលោកបានបន្ទន់ជំហរទៀតដោយសុខចិត្តធ្វើជាប្រធានាធិបតីត្រឹមចុងឆ្នាំ២០១១។ ប៉ុន្តែ នៅទីបំផុត លោកសុខចិត្តឲ្យគេរៀបចំការបោះឆ្នោត នៅពាក់កណ្តាលឆ្នាំនេះ។
ក្រុមប្រឆាំង នៅថ្ងៃអាទិត្យនេះ បានបដិសេធមិនព្រមធ្វើតាមផែនការស្នើដោយប្រទេសអារ៉ាប់។ ក្រុមប្រឆាំងនៅយេម៉ែន មានពីរគឺគណបក្សប្រឆាំង និងចលនាប្រឆាំងរបស់បាតុករ ដែលដឹកនាំដោយក្រុមយុវជន និងនិស្សិត ដែលមិនពាក់ព័ន្ធនឹងអ្នកនយោបាយ។ នៅថ្នាក់នយោបាយ គណបក្សប្រឆាំងបានយល់ព្រមជារួម ទទួលយកផែនការរបស់ក្រុមប្រឹក្សាអារ៉ាប់ បើទោះបីគណបក្សប្រឆាំងបានបញ្ជាក់ហើយថា មានចំណុចមួយចំនួនដែលខ្លួនមិនអាចទទួលយកបាន នៅក្នុងផែនការស្នើឡើងដោយប្រទេសអារ៉ាប់។ ឧទាហរណ៍ដូចជា គណបក្សប្រឆាំងមិនចង់ធ្វើការក្រោមការដឹកនាំរបស់លោក Saleh នៅក្នុងរយៈពេលមួយខែ នៃរដ្ឋភិបាលរួបរួមជាតិ។
បើយើងមកមើលនៅកន្លែងធ្វើបាតុកម្មផ្ទាល់វិញ ដែលពេលនេះ ប្រជាជនយេម៉ែនចាប់ផ្តើមបោះជម្រកតង់តវ៉ា នៅតាមទីក្រុងធំៗ មេដឹកនាំចលនាបាតុករ ដែលភាគច្រើនជាក្រុមយុវជន មិនបានដូរការទាមទាររបស់ពួកគេទេ។ បាតុករទាំងនេះបានស្តីបន្ទោស រិះគន់រដ្ឋាភិបាលរបស់លោក Salehថា ជារដ្ឋាភិបាលពុករលួយ បក្សពួកនិយម និងជាអ្នកធ្វើឲ្យប្រជាជនយេម៉ែនក្រីក្រ។ ដូច្នេះ គេទាមទារចង់បានតែមួយគត់គឺ ឲ្យលោក Saleh បក្សពួក ចាកចេញពីអំណាចភ្លាមៗ ដោយមិនចាំដល់ពេលមួយខែទាន់។ បើទុកពេលយូរ គេខ្លាចថា លោក Saleh អាចនឹងដូរចិត្ត បង្កអសន្តិសុខដើម្បី រកលេសនៅដឹកនាំប្រទេសតទៅទៀត។
មួយវិញទៀត ក្រុមប្រឹក្សាយុវជន ដែលជាផ្នែកមួយសំខាន់របស់ក្រុមប្រឆាំង បានទាត់ចោលសំណើរក្សាអភិយឯកសិទ្ធិរបស់ប្រធានាធិបតីលោក Saleh។ សម្រាប់ពួកគេ លោក Salehមិនអាចរួចផុតពីការចោទប្រកាន់របស់តុលាការបានទេ។ លោក Saleh និងបក្សពួក ត្រូវតែទទួលខុសត្រូវលើការបាញ់សម្លាប់បាតុករទាំងជាង ១៣០នាក់ និងត្រូវតុលាការផ្តន្ទាទោសតាមច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ