គ.ជ.ប. ប្រកាសឲ្យគណបក្សនយោបាយ ត្រៀមចុះឈ្មោះបោះឆ្នោត
គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប. បានប្រកាសឲ្យគណបក្សនយោបាយ ត្រៀមលក្ខណៈដើម្បីចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះបោះឆ្នោតតំណាងរាស្ត្រ ចាប់ពីថ្ងៃទី២៩មេសា ដល់ថ្ងៃទី១៣ឧសភា។ គ.ជ.ប. នៅថ្ងៃទី២៦មេសា ក៏បានចេញសេចក្តីថ្លែងការណ៍ ឆ្លើយបំភ្លឺទៅនឹងញត្តិបាតុកម្មរបស់គណបក្សសង្គ្រោះជាតិ ចុះថ្ងៃទី២៤មេសា ផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥០
តាមរយៈកិច្ចប្រជុំជាមួយតំណាងគណបក្សនយោបាយនិងអង្គការមិនមែនរដ្ឋាភិបាល នៅព្រឹកថ្ងៃសុក្រ ទី២៦មេសានេះ គ.ជ.ប. បានប្រកាសជូនដំណឹងផ្ទាល់មាត់ ឲ្យគណបក្សនយោបាយ ត្រៀមខ្លួនចុះបញ្ជីឈរឈ្មោះបោះឆ្នោត និងបញ្ជីបេក្ខជនឈរឈ្មោះបោះឆ្នោតតំណាងរាស្ត្រ។ ការចុះបញ្ជីគណបក្សនយោបាយ និងបញ្ជីបេក្ខជនឈរឈ្មោះតំណាងរាស្ត្រ ត្រូវចាប់ផ្តើមពីថ្ងៃទី២៩មេសា រហូតដល់ថ្ងៃទី១៣ឧសភា ខណៈដែលការបោះឆ្នោតតំណាងរាស្ត្រ នីតិកាលទី៥ នឹងត្រូវធ្វើឡើង នៅថ្ងៃទី២៨កក្កដា។
ចំពោះមុខតំណាងគណបក្សនយោបាយនិងអង្គការសង្គមស៊ីវិល លោកស្រី ស៊ីន ជុំបូ អនុប្រធាន គ.ជ.ប. បានប្រកាសល័ក្ខខ័ណ្ឌនានា ដែលកំណត់ក្នុងច្បាប់បោះឆ្នោត សម្រាប់ការចុះបញ្ជីគណបក្សនយោបាយនិងបញ្ជីបេក្ខជនឈរឈ្មោះបោះឆ្នោត ជាពិសេស ការតម្រូវឲ្យគណបក្សនយោបាយ បង់ប្រាក់តម្កល់១៥លានរៀល សម្រាប់ការចុះបញ្ជីបោះឆ្នោតតំណាងរាស្ត្រ។
ការតម្រូវឲ្យគណបក្សនយោបាយបង់ប្រាក់តម្កល់ ១៥ លានរៀល ស្មើប្រមាណ ៣៧៥០ ដុល្លារ ត្រូវបានតំណាងអង្គការខុមហ្វ្រែល បានឡើងតវ៉ាក្នុងកិច្ចប្រជុំ ហើយស្នើសុំឲ្យគ.ជ.ប. ជួយបន្ធូរបន្ថយ ដើម្បីអ្វីដែលតំណាងអង្គការឃ្លាំមើលការបោះឆ្នោតរូបនេះ អះអាងថា អាចនឹងឲ្យគណបក្សនយោបាយតូចតាចមានលទ្ធភាពបានចុះឈ្មោះ ចូលរួមប្រកួតប្រជែងការបោះឆ្នោត។
ក៏ប៉ុន្តែលោកស្រី ស៊ីន ជុំបូ បានឆ្លើយតបភ្លាមថា គឺជាច្បាប់តម្រូវយ៉ាងដូច្នេះ គ.ជ.ប. គ្មានលទ្ធភាពអ្វីទៅបញ្ចុះការកំណត់បង់ប្រាក់តម្កល់ សម្រាប់គណបក្សនយោបាយនោះឡើយ។
សម្រាប់ការចុះបញ្ជីគណបក្សនយោបាយ និងបញ្ជីបេក្ខជនឈរឈ្មោះបោះឆ្នោតតំណាងរាស្ត្រ ចាប់ពីថ្ងៃទី២៩មេសា ដល់ថ្ងៃទី១៣ឧសភា ត្រូវបានលោក ទេព នីថា អគ្គលេខាធិការ គ.ជ.ប. រំពឹងថា អាចនឹងមានគណបក្សមិនលើសពី ១០ គណបក្សឡើយ ដែលមកចុះឈ្មោះនៅគ.ជ.ប. ក្នុងចំណោមគណបក្សនយោបាយសរុប ៤៣ គណបក្ស ដែលបានចុះបញ្ជីផ្លូវការ នៅក្រសួងមហាផ្ទៃ នាពេលសព្វថ្ងៃ។
និយាយពីគ.ជ.ប. នៅព្រឹកថ្ងៃទី២៦មេសានេះ គ.ជ.ប. បានចេញលិខិតផ្លូវការឆ្លើយបំភ្លឺទៅនឹងញត្តិបាតុកម្មរបស់គណបក្សសង្គ្រោះជាតិ ចុះថ្ងៃទី២៤មេសា។ តាម គ.ជ.ប. សំណើមួយចំនួន ក្នុងរបាយការណ៍របស់អ្នករាយការណ៍ពិសេសរបស់អង្គការសហប្រជាជាតិ និងអង្គការសង្កេតការណ៍បោះឆ្នោតជាតិនិងអន្តរជាតិ ដែលគណបក្សប្រឆាំងបានលើកឡើង គឺសុទ្ធតែគ.ជ.ប. បានទទួលយកមកកែលម្អ ក្នុងបទបញ្ជា និងនីតិវិធី សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៥ រួចហើយ។
ចំពោះករណីបក្សប្រឆាំងស្នើឲ្យធ្វើបញ្ជីបោះឆ្នោតជាថ្មីឡើងវិញ និងការស្នើសុំពន្យារពេលបោះឆ្នោតនោះ ត្រូវបានគ.ជ.ប.បញ្ជាក់ទៅកាន់បក្សប្រឆាំងវិញថា ជាសំណើមិនអាចទទួលយកបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ