ក្រុមប្រឹក្សាសន្តិសុខអង្គការសហប្រជាជាតិគាំទ្រអន្តរាគមន៍បារាំងនៅម៉ាលីជាឯកច្ឆន្ទ
កាលពីថ្ងៃចន្ទម្សិលមិញនេះ ប្រទេសបារាំងបានសុំអោយ ក្រុមប្រឹក្សាសន្តិសុខអង្គការសហប្រជាជាតិ រៀបចំកិច្ចប្រជុំមួយ ដើម្បីធ្វើការពិចារណា ទៅលើស្ថានការអន្តរាគមន៍របស់ខ្លួននៅប្រទេសម៉ាលី។ ជាលទ្ធផល ៖ អង្គការសហប្រជាជាតិ គាំទ្រអន្តរាគមន៍បារាំងនៅម៉ាលីជាឯកច្ឆន្ទ។ ទន្ទឹមនេះដែរ ក៏មានចោទជាសំណួរឡើង អំពីស្ថានការនៅពេលដែល អន្តរាគមន៍បារាំង ត្រូវបញ្ចប់ ព្រោះថាអ្នកជំនាញនានា បានប្រមើលមើលថា បេសកកម្មអន្តរជាតិជួយប្រទេសម៉ាលី ដែលគេអោយឈ្មោះថា Misma នោះ ប្រហែលជាមិនអាច នឹងដណ្តើមបានភាគខាងជើងប្រទេសនេះ ពីក្រុមប្រដាប់អាវុធអ៊ីស្លាមមកវិញ មុនរយៈពេលច្រើនខែនោះឡើយ។
ចុះផ្សាយនៅថ្ងៃ៖
ស្តាប់ - ០១:៥៦
នៅពេលដែលខ្លួនជាអ្នកផ្តួចផ្តើម អោយក្រុមប្រឹក្សាសន្តិសុខអង្គការសហប្រជាជាតិ រៀបចំកិច្ចប្រជុំ ទាក់ទងនឹងស្ថានការនៅប្រទេសម៉ាលី បារាំងបានប្រកាសថា ខ្លួនមានបំណងអោយអន្តរាគមន៍ ធ្វើឡើងក្នុងបែបផែនមួយច្បាស់លាស់។ នៅក្នុងកិច្ចប្រជុំ កាលពីម្សិលមិញនេះ គ្មានប្រទេសណាមួយ រិះគន់ការប្រកាសនេះឡើយ សូម្បីតែរុស្ស៊ី រឺក៏ចិន ដែលបានអនុម័តអោយមាន អន្តរាគមន៍បារាំង នៅប្រទេសម៉ាលី ក៏មិនបានហារមាត់មួយម៉ាត់ដែរ។
ប្រទេសសមាជិកក្រុមប្រឹក្សាសន្តិសុខអង្គការសហប្រជាជាតិនានា យល់ស្របថា អន្តរាគមន៍របស់បារាំង ប្រព្រិត្តិទៅស្របតាមច្បាប់ និងតាមធម្មនុញ្ញរបស់អង្គការសហប្រជាជាតិ។ យោងតាមតំណាងបារាំង នៅអង្គការសហប្រជាជាតិ លោក Gérard Araud អាទិភាពសំខាន់នៅពេលនេះ គឺផ្តោតលើ ការអនុវត្តអោយបានឆាប់រហ័ស នូវសេចក្តីសំរេចចិត្តលេខ ២០៨៥ របស់អង្គការសហប្រជាជាតិ ដែលអនុម័តនៅថ្ងៃទី ២០ធ្នូ កន្លងមក នៅពេលដែលអន្តរាគមន៍បារាំងនៅម៉ាលី ត្រូវបញ្ចប់។
សេចក្តីសំរេចចិត្ត លេខ ២០៨៥ របស់អង្គការសហប្រជាជាតិ អនុញ្ញាតអោយមានការដាក់ទ័ពមួយ មានលក្ខណៈជាអន្តរជាតិ ដែលគេអោយឈ្មោះថា Misma ដើម្បីជួយប្រទេសម៉ាលី ដណ្តើមយកតំបន់ភាគខាងជើង ពីក្រុមប្រដាប់អាវុធអ៊ីស្លាមមកវិញ។ សេចក្តីសំរេចចិត្តនេះ ក៏បានចែងផងដែរ នូវដំណើរការផ្សះផ្សារនយោបាយនៅក្រុងបាម៉ាកូ និងការចរចាជាមួយឧទ្ទាមនៅភាគខាងជើង ដែលធ្វើការផ្តាច់ខ្លួនចេញពីភេរវកម្ម។
នៅពេលនេះ បារាំងកំពុងតែរង់ចាំ អោយបេសកកម្មទាហានអន្តរជាតិជួយម៉ាលី ឈ្មោះ Misma បានរៀបចំស្រេចបាច់ ដើម្បីបន្តវេនពីខ្លួន។ កងអង្គភាព ប្រទេសសេណេហ្កាល់ តូហ្កូ នីហ្ស៊ែរ និង បៀរគីណា នឹងទៅដល់ម៉ាលី ឆាប់ៗនេះហើយ។ ប៉ុន្តែ អ្នកជំនាញនានា បានប្រមើលមើលថា បេសកកម្មអន្តរជាតិ Misma ប្រហែលជាមិនអាច នឹងប្រតិបត្តិការទៅបាន មុនរយៈពេលច្រើនខែនោះឡើយ។
លើសពីនេះ ថ្វីដ្បិតតែអាមេរិកសរសើរបារាំងថា មានជំនាញក្នុងការប្រឈមមុខនឹងការគំរាមកំហែងភេរវកម្ម ក្រុង Washington នៅមិនទាន់ទុកចិត្ត ចំពោះបេសកកម្ម Misma នៅឡើយ។ អាមេរិក ទាមទារអោយមានការពិនិត្យមើល បេសកកម្មនេះឡើងវិញអោយបានគ្រប់ជ្រុងជ្រោយ ព្រោះថាស្ថានការនៅសមរភូមិ មានការផ្លាស់ប្តូរច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ