គណបក្សកាន់អំណាចបែងចែកជាពីរបក្សពួក ចំពោះគោលការណ៍បង្កើតរដ្ឋាភិបាលថ្មី
នៅចុងសប្តាហ៍នេះ គណបក្សអ៊ីស្លាមនិយម Ennahda នៅប្រទេសទុយនីស៊ី កំពុងតែជួបនូវវបត្តិផ្ទៃក្នុង ដោយសារតែការគំរាមរបស់មេដឹកនាំសំខាន់ទីពីររបស់ខ្លួន គឺនាយករដ្ឋមន្ត្រី Hamadi Jebali ដែលថា លោកនឹងលាលែងពីតំណែង ប្រសិនបើរដ្ឋាភិបាលក្រៅនយោបាយ មិនអាចមានរូបរាងឡើងនោះ។ កាលពីថ្ងៃពុធ ដើម្បីសំរាលកំហឹងរបស់បាតុករនានាដែលតវ៉ាប្រឆាំងនឹងការបាញ់សម្លាប់ មេដឹកនាំសំខាន់របស់គណបក្សប្រឆាំងមួយរូប នាយករដ្ឋមន្ត្រីទុយនីស៊ី បានប្រកាស ថានឹងបង្កើតរដ្ឋាភិបាលថ្មីមួយ ដោយមានការចូលរួមរបស់អ្នកបច្ចេកាធិបតេយ្យ។ ការប្រកាសរបស់លោក Jebali បានធ្វើអោយគណបក្សកាន់អំណាច Ennahda បែកបាក់គ្នា ជាពីរបក្សពួក។ សមាជិកនានាក្នុងគណបក្សនេះយល់ថា វាគឺជាគំនិតផ្ទាល់ខ្លួនរបស់នាយករដ្ឋមន្ត្រី តែប៉ុណ្ណោះ។ តាមក្រិតក្រម ក្រុមប្រឹក្សាគណបក្សត្រូវប្រជុំគ្នាជាមុនសិន មុននឹងធ្វើការសំរេចចិត្តបែបនេះ។ ទន្ទឹមនឹងនេះដែរ បាតុករ ៣០០នាក់ បានចុះធ្វើបាតុកម្មនៅក្រុងTunis កាលពីថ្ងៃសៅរ៍ម្សិលមិញ ដើម្បីគាំទ្រគណបក្ស Ennahda ដែលត្រូវគេចោទប្រកាន់ថា បានធ្វើឃាតមេដឹកនាំគណបក្សប្រឆាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
ការប្រកាសលាលែងពីតំណែងរបស់នាយករដ្ឋមន្ត្រី Hamadi Jebali បានធ្វើអោយគណបក្សអ៊ីស្លាមនិយម ដែលកំពុងកាន់អំណាចនៅទុយនីស៊ី រងនូវវិបត្តិផ្ទៃក្នុង។ លោក Jebali ដែលជាមេដឹកនាំសំខាន់ទីពីរ ក្នុងគណបក្ស បានគំរាមកាលពីថ្ងៃសៅរ៍ម្សិលមិញថា នឹងលាលែងពីតំណែង ប្រសិនបើរដ្ឋាភិបាលក្រៅនយោបាយ មិនអាចលេចជារូបរាងឡើងទេនោះ។
ការប្រកាសបង្កើតរដ្ឋាភិបាលថ្មីរបស់នាយករដ្ឋមន្ត្រីទុយនីស៊ី កាលពីថ្ងៃពុធកន្លងមក គឺជាដំណោះស្រាយឆ្លើយតប ទៅនឹងបាតុកម្មប្រឆាំងតវ៉ាថា គណបក្សកាន់អំណាចបានធ្វើឃាតមេដឹកនាំសំខាន់របស់គណបក្សប្រឆាំងមួយរូប គឺលោក Chokri Belaïd ដែលបានបរិហារថារដ្ឋាភិបាល បានបង្កអំពើហិង្សា។ នាយករដ្ឋមន្ត្រីទុយនីស៊ី គិតថាលោកមិនត្រូវការទំនុកចិត្តពីសភាជាតិនោះទេ ក្នុងការបង្កើតរដ្ឋាភិបាលថ្មី។ គួរបញ្ជាក់ថា គណបក្សកាន់អំណាច Ennahda មានអសនៈ ៨៩ ក្នុងចំណោមអសនៈសរុប ២១៧ ក្នុងសភា។
គណបក្សអ៊ីស្លាមនិយម Ennahda បានបែកបាក់ចេញជាពីរបក្សពួក។ សមាជិកនានាមានការជំទាស់នឹងការប្រកាសបង្កើតរដ្ឋាភិបាលថ្មី ដោយយល់ថា នេះគឺជាគំនិតផ្ទាល់ខ្លួនរបស់លោក Jebali តែប៉ុណ្ណោះ។ លោក Jebali គ្មានសិទ្ធិនឹងសំរេចចិត្តបែបនេះទេ តាមក្រិតក្រម ក្រុមប្រឹក្សាគណបក្សត្រូវប្រជុំ ធ្វើការសំរេចចិត្តជាមុនសិន។
អស់រយៈពេលច្រើនខែមកហើយ ដែលសមាជិកនានាក្នុងគណបក្សកាន់អំណាច ពិបាកនឹងចុះសម្រុងគ្នា ក្នុងការរុះរើសមាសភាពក្នុងរដ្ឋាភិបាល។ នៅក្នុងប្រទេសវិញ អសន្តិសុខ និងជម្លោះសង្គមផ្សេងៗមានការកើនឡើងទ្វេដង។
នៅថ្ងៃសៅរ៍ម្សិលមិញ បាតុករ ៣០០នាក់ បានចុះធ្វើបាតុកម្មនៅក្រុងTunis ដើម្បីគាំទ្រគណបក្សកាន់អំណាច ដែលត្រូវគេចោទប្រកាន់ថា ធ្វើឃាតមេដឹកនាំគណបក្សប្រឆាំង។
គណបក្ស Ennahda បានបដិសេធដាច់ខាតនូវការចោទប្រកាន់នេះ។ ទាហានទុយនីស៊ីបានដាក់ពង្រាយកងកម្លាំងរបស់ខ្លួន ដើម្បីចៀសវៀងហេតុការណ៍ផ្សេងៗ ដែលអាចបង្កដោយអំពើបាតុកម្ម។
កាលពីថ្ងៃពុធ កន្លងមក ក្នុងបាតុកម្មប្រឆាំងតវ៉ានឹងការសម្លាប់មេដឹកនាំគណបក្សប្រឆាំង ការប្រឈមមុខរវាងក្រុមបាតុករ និងប៉ូលិស បានធ្វើអោយស្លាប់ប៉ូលិសម្នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ